روايه " شيروفوبيا " لِـ الاء مسعود

شيروفوبيا الحلقة الثالثة

شيروفوبيا ( رهاب السعادة )
"الحلقة 3"

•
•
•
•
•
•
•
•
•
•
•

________________________________________________________________________

رقيه : الجو حر اوي وانتِ ممشياني ف عز الضهر
زينه : مكنش ينفع بعد ما قولت اني نازله اقولهم لا مش نازله
رقيه : مترزعتيش مع خالتك وابنها ليه
زينه : مش عاوزة اتكلم مع عمر اكتر من كده، قعدنا مره وريحني شوية بس مش كل شوية بقي
رقيه : شكلو دكتور شاطر عرف ينطقك في الاخر😂
زينه : هو بس يبطل اللهجه بتاعتو المستفزه ده عصبني فِ الآخر، حسسني كأني مكبره الموضوع وان بعد كل سنين الوجع والقهر والحزن والحب المش طبيعي ده! هنسي وهعيش حياتي عادي لا وايه، هحب تاني!
رقيه : مش يمكن كلامو صح شوية؟ ربنا بينعم علينا بنعمه النسيان، حتي اللي بيموت بيتنسي
زينه : عشان ميت يا رقيه! عشان ميت مش موجود قدامك طول الوقت مش عايش حياتو عادي وبيحب غيرك ومتجاهلك وبيكلمك كأنك كائن اقل من العادي كمان!
( تسكت رقيه وتمسك ايد زينه ويتمشو ويروحو يشربو عصير )
زينه : اخوكِ ده بقي عره اوي، بقي بايظ اكتر م الاول تقريبًا
رقيه : والله ما عارفه يا زينه تعبت معاه معرفش عندو مراهقه متأخره ده ولا ايه؟
زينه : والله لولا انو اصغر مني ل كنت خوفت اتكلم معاه حتي
رقيه : حاولت معاه كتير بس خلي شوية البنات بتوعو ينفعوه
( تسمع زينه صوت الرنه المميزه ، يوصلها رسالة من إسلام تفتحها بسرعه تلاقيها "شوفت هدير انهارده" تتعصب زينه وتهبد التليفون علي الترابيزة في الكافيه )
زينه : بس بقي بس بقي بجد انتَ ايه!! 

______________________

( واقف إسلام في البلكونه وباصص علي بلكونتها مستني يشوفها مش شايفها، يفتح تليفونو يدخل الشات بتاعها ميلاقيهاش شافت الرساله، يفتح صورة البروفايل بتاعتها ويبتسم، يفضل يقلب في الشات بتاعهم ويشوف انفعالاتها وتعصبها وغيرتها الواضحه وعنادها ويفضل يضحك، يستغرب ازاي بتقدر تضحكو وترسم علي وشو الابتسامه وهي موجوده وحتي وهي غايبه ، تبعت رساله وهو في الشات فَ يتعصب، اتقفش!! )
زينه : حلو ياريت تشوفها ديمًا، و.. قاعد في شاتنا كده ليه
إسلام ( بعد ثواني) : اخويا انور كان ماسك التليفون، صغير  مانتِ عارفه بياخد تليفوني ويفتح اي حاجه
زينه : اه
إسلام ( ويحب يغلس عليها ) : ليه كده هدير مكانتش مكانِك وبقت هي جارتي؟
زينه ( بضيق ) : واللهِ نصيبك بقي هنعمل إيه
إسلام : للأسف
( تسرق مكانو المرادي وتعمل هي seen ومتردش، يفضل واقف في البلكونه لغاية ما يلمحها راجعه من بره يفضل باصص عليها وهي ماشيه متعصبه يفضل يضحك، تطلع زينه تخبط علي الباب يفتحلها مروان تدخل متعصبه وتدخل علي اوضتها علي طول وتهبد الباب، يبص مروان وعمر لبعض )
عمر : هو في ايه
مروان : مش عارف بس زي ما قولتلك هي بقالها فترة كبيرة اوي وهي كده، لدرجة ان ده بقي الطبيعي بتاعها
عمر : ولما هي كده من فتره كبيره ليه مسألتوهاش
مروان : زينه لو حد سألها مالِك بتفضل تقول كلام مش مفهوم وتعيط وتزعق بس لدرجة أن امي فكرتها اتجننت بجد
عمر : وايه تاني
مروان : نفس اللي قولتهولك قبل كده، بتسهر كتير اوي وبتشرب قهوه بكميات رهيبه ومبتاكلش كويس وعلي طول لوحدها في اوضة ضلمه، بتداري شكلها بالميكب بس فعليًا وشها كأن لونو رصاصي وتحت عنيها اسود ده انا فكرتها بتتعاطي حاجه
عمر : اتأخرتو يا مروان معرفتونيش من بدري ليه !
مروان : عشان محدش عارف ده سببو ايه ياعمر
عمر : طب خلي سناء تعملنا كوبايتين قهوه وانزل انت علي شغلك.
( يروح عمر يقف في البلكونه شوية ولما سناء تجيب القهوه يبعت رسالة ل زينه علي الواتس "قومي عملتلنا قهوه، يكش يطمر" وبعد ثواني يلاقي علامة seen ويسمع صوت الباب بيتفتح وتجيلو وباين علي عنيها العياط بس تداري وهو يعمل كأنو مشافهاش )
عمر : طب مانتي شاطرة وبتسمعي الكلام اهو، امال مش طايقه حد في البيت ليه، ولا تكونيش بتحبيني مثلًا وبتعامليني معاملة خاصه😂
( تضحك زينه وتقع اخر دمعه في عنيها ف تمسحها وتشد كرسي وتقعد قصاد عمر )
زينه : عشان بس انت مبتضغطش عليا زيهم
عمر : حقهم هو ده منظر تدخلي بيه، كأن حد جايبك من شعرك قبل م تيجي
زينه : حرق دمي كعادتو تاني، كأنو بيتبسط لما بيعصبني وبيضايقني، بيتبسط لما بتأذي!
عمر : اممم عايزة نكمل كلامنا يعني😂
زينه ( وتبتسم ) : يعني، لو فاضي
عمر : طب انا مش عايز اعرف هو قالِك ايه، انا عايز نبدأ ناخد خطوة في الموضوع ده
زينه : يعني ايه
عمر : عايزك تاخدي قرار، هتفضلي مكلمله علي كده؟ هتقوليلو انك بتحبيه؟ هتبعدي؟ هتحاولي تلاقي حل وتخليه يحبك مثلا؟ هتعملي ايه؟!
( تسكت زينه شوية وتبص لعمر بحزن )
زينه : تصدق يا عمر عمري ما فكرت في السؤال ده ابدًا، انت لغبطتني اوي، لما عطيتني كل الاختيارات مره واحده لغبتطني، الامتحان صعب اوي واجاباتو نتايجها أصعب.
عمر : بنعمل ايه في اي امتحان؟
زينه : يعني ايه
عمر : قدامك امتحان عبارة عن سؤال متعرفيش اجابتو وعندك اختيارات، هتعملي ايه عشان تحاولي توصلي لاصح اجابة ؟
زينه : هفكر في كل اجابه واحط الاحتمالات بتاعتها وابدأ استبعد .
( تسكت زينه لما تفهم اللي كان عايز يوصلهولها ويبدأ الشغف جواها يشتغل وتقرب الكرسي اكتر )
عمر : نفكر سوا؟
زينه ( بابتسامه ولهفه ) : نفكر سوا
عمر : خلينا نختار عشوائي مثلًا، ايه اللي هيحصل لو قولتيلو انك بتحبيه؟
زينه : احيه دي هتتقدملو علي طبق من دهب انو يبعد! إزاي احبو يعني احنا المفروض اخوات دي جريمة بالنسبالو
عمر : حلو، هتفضلي تحاولي تعملي اي حاجه عشان يحبك مثلا؟
زينه : هو ينفع؟
عمر : هو مينفعش بس في استثناءات مفتكرش هتعجبك، مثلًا لو هو بيحب البنات الواو ف هتبدأي تحطي full make-up او بيحب البنات التخينه ف هتتخني او بيحب الرفيعين ف هتخسي او او او، هتضطري تغيري حاجه فيكي عشان تعجبيه، وهتكون غالبا متعلقه بالشكل، لما يجي يوم والحاجه دي تروح هيروح يدور عليها ف واحده تانيه واكيد عارفه مصيرك هيبقي عامل ازاي
زينه : صح معاك حق
عمر : ولو جينا لاختيار انك هتفضلي مكملة كده، واخرتها ايه؟
زينه : كان عندي امل انو يقولي انو بيحبني في يوم
عمر : ليه ايه اللي هيحصل جديد محصلش في السنين دي وهيخليه يحبك
( تسكت زينه وتدمع )
زينه : صح مافيش
عمر : طب تعالي نتخيل كده لو هو فعلًا طلع بيحبك، هو فيه الصفات اللي هتخليكِ مبسوطه بعدين؟
زينه : انا مش طالبه غير اني اكون موجوده معاه وخلاص
عمر : هتبدأي تحتاجي حاجات تانيه يا زينه، هتحتاجي حنيه، اهتمام، تقدير، حد متهونيش عليه ابدًا، هتحتاجي علاقه مش مُهلِكه!
( تسكت زينه لما تتجمع كل الذكريات في عقلها وتكتشف ان ولا صفة موجوده فيه علي الاقل معاها هي )
عمر : سكتي ليه
زينه : مبيضايقنيش اد ان كلامك صح  يا عمر
عمر : لسه فيه اختيار
زينه : انهي
عمر : انك تبعدي
زينه : لا ياعمر مش هقدر
عمر : عندك حل تاني؟
زينه :  لا ياعمر اكيد في حلول تانيه مش هقدر ابعد عنو مش هقدر!💔
( تبدأ زينه تنهار وتعيط ويبدأ عمر يضايق ويقرب منها )
عمر : متعيطيش بس اهدي
زينه : عمر عشان خاطري انت اكيد هتلاقيلي حل اكيد في اختيار خامس!💔
عمر : الامتحان اللي بخمس اختيارات بتختاري منو اجابتين قريبين من بعض في نتايجهم، لكن الامتحان ده كل اختيار وليه نتيجة بعيده تمامًا عن التانيه
زينه : متكلمنيش بالمنطق ياعمر حس بيا وافهمني!
عمر : لو قولتلك اني حاسس بيكِ ابقي كداب، محدش عاش اللي انتِ عيشتيه عشان يحس بمقدار الالم اللي انتِ حساه، بس اقدر اقولك انا فاهم اللي انتِ حساه، وانا جمبك يا زينه هساعدك تتخطي كل ده
زينه : بس انا مش عاوزة ابعد يا عمر 💔
عمر : مش هسمع كلامك دلوقتِ ، لما تهدي وتفكري بهدوء وساعتها نبقي نكمل كلامنا
( تبعد عنيها وتبص علي بلكونه إسلام وتزيد في عياطها تلاقي مناديل بتتحدف في وشها )
عمر : بطلي عياط بقي يخربيتك عياطك بيأثر فيا، بتجيلي حالات بالهبل ويفضلو يعيطولي وينفنفولي كده ومبتأثرش، من واحنا صغيرين وانتِ عياطك بيقرفني
زينه : ياريتنا ما كبرنا يا عمر، كل واحد بقي في حالو والدنيا سهيتنا عن بعض، وكبرنا وهمومنا كبرت معانا
عمر : بت متنسيش نفسك انتِ لسه 22 سنه
زينه : ياسلام ياخويا مانت 25 مش اكبر مني بكتير يعني
( يضحك عمر لما يفتكر خناقاتهم وهما صغيرين علي نفس الموضوع ويسكت )
عمر : طب قومي اغسلي وشك يلا
زينه : حاضر
( تقوم زينه تغسل وشها وقاعد عمر باصص علي مكان ماكانت قاعده ومبتسم، تعدي دقيقه وترجع زينه من جوه وتقعد تاني قصاد عمر )
زينه : عمرك ما حكيتلي عن حياتك شويه يا عمر، حياتك ماشيه ازاي في الفتره اللي فاتت انا حاسه كأني مبقتش عارفه عنك حاجه
عمر : والله ياستي حياتي الفتره اللي فاتت كانت عباره عن روتين ثابت، مش ممل لكنو مافيهوش حاجه جديده، م العياده ع الچيم ع البيت اساعد ابويا في شغلو شوية وخلاص
زينه : محبيتش؟
عمر : لا
زينه : ده تعقيدًا منك يعني
عمر : مش تعقيد ولا حاجه بس محسيتش قلبي اتلهف علي واحده مثلا او كل المشاعر الملغبطه بتاعت الحب دي، محسيتهاش
زينه : مش يمكن عشان ديمًا بتفكر بعقلك؟
عمر : يمكن، بس انا مش شايف دي حاجه وحشه، اكتر حب مناسب ومريح للأنسان، هو الحب اللي بيبقي فيه القلب والعقل متفقين سوا
( تسكت زينه وتبتسم أن للمره المليون هو معاه حق )
عمر : عايز اخليكي تبدأي في شوية حاجات تقللك الضغط اللي عليكِ شويه
زينه : زي ايه
عمر : بتنامي أمتي ؟
زينه : مثلا ممكن 7 الصبح
عمر : بتسهري يعني
زينه : اه ده طبيعي
عمر : جربتي تصحي الفجر؟
زينه : هصحي م الفجر اعمل ايه
عمر : تعملي اللي بتعمليه وانتِ سهرانه
زينه : مجربتش بصراحه
عمر : مش عارف اقولك جربي ولا لا حاسِك خِرعه كده ومش هتقدري
زينه : عمر متتحدانيش
عمر : بتحداكي
زينه : وانا اد التحدي
عمر : اما نشوف، كده كده انا مقيم عندكو فتره هنا لو ميضايقكيش يعني
زينه : ايه ده بجد انت هتطول معانا؟
عمر : اه تقريبًا
زينه : انا اتبسط جدًا، بس ده مش هيأثر علي شُغلك ده؟
عمر : لا خالص انا خدت اجازة كويسه كده، حابب اعوض الفتره اللي بعدنا فيها ومنعرفش حاجه عن بعض
زينه : ده اجمل خبر سمعتو من كتير بجد😂♥
عمر : مع اني واثق لو كنتِ عرفتي الخبر ده اول م جيت كان هيبقي اسود خبر سمعتيه!😂
زينه : شوية بصراحه مكنتش حابه معاملتك ليا ع اني مريضه م المرضي بتوعك
عمر : عمومًا انا اسف لو طريقتي دي كانت بتضايقك قبل كده بس انتِ عارفه انتِ بالنسبالي ايه ومرضالكيش الحزن ابدًا
زينه : عارفه يا عمر، سيبني بقي اخش احضرلنا فيلم محترم كده نتفرج عليه سوا بمناسبه اللحظه السعيده دي مش مصدقه انك سيبت شغلك اللي روحك فيه عشان تقضي الفتره دي معانا ده انا هظبطك😂♥
( تسقف من فرحتها وتدخل بسرعه علي جوه )
عمر : اسيب شغلي وحالي وكل حاجه ليا عشانِك يا زينه، مرضاش ابدًا انك تبقي مريضه ولو بنسبه قليله بالاكتئاب الملعون! عارف لو مقدرتش الحقك ايه النتايج اللي هتترتب علي ده، وعارفك مجنونه تعملي اي حاجه مش مُتوقعه، خايف عليكِ من نفسِك يا زينه، واوعدك هعمل كل حاجه في سبيل أن ضحكتك ترجع صافيه تاني زي الاول.
( يدخل عمر الاوضة ورا زينه وتشغل فيلم ويقعدو يسمعوه سوا، يعدي الوقت وتحس زينه بالنعاس تدخل تنام ويطلع عمر ينام هو كمان )
"الساعة 5:27AM"
( تطفي زينه المنبه للمرة التالته وتفتكر التحدي بتاعها هي وعمر وتقوم تغسل وشها وترجع اوضتها تاني تحط ميكب وتغير هدوم النوم بتاعتها وتلبس بنطلون جينز وتيشرت ابيض وتطلع تعمل قهوه وتقعد في البلكونه تشرب بوق قهوه وتمسك التليفون تلاقي اللي بيسحب التليفون منها بسرعه)
عمر : لا، مافيش تليفونات، مافيش سوشيال ميديا.
زينه : ايه ده انتَ صاحي برضو؟
عمر : اكيد طبعًا
زينه : شوفت انا اد التحدي ازاي وصحيت بدري
عمر : متأخرة نص ساعه
زينه : عمر فوكك مني انا كنت بنام 9 بصحي المغرب😂
عمر : هتقريفي شوية في نص اليوم بس مع تكرار الايام هتتعودي
زينه : طيب يا سيدي انت دلوقت خدت مني التليفون انا اعمل ايه دلوقت
عمر : مجربتيش تعرفي قبل كده هوايتك او موهبتك ايه؟
زينه : لا
عمر : بتحبي تعملي ايه اكتر حاجة
زينه : زمان كنت بحب التصوير اوي لكن انا مصورتش بشغف من سنين تقريبًا
( يفهم عمر ويترجم انها حتي بطلت تعمل الحاجه اللي بتحبها بسبب الشخص ده )
عمر : قومي البسي
زينه : البس ليه
عمر : هننزل
زينه : ننزل نروح فين ياعمر الساعه 5 ونص الفجر 😂
عمر : ياستي انجزي، انا هروح البس انا كمان واقول لامك
( تستغرب زينه وتضحك ويروح عمر يلبس بنطلون اسود وقميص Baby blue ويلبس ساعتو والبيرفيوم بتاعو وزينه تلبس بنطلون جينز بوي فريند وتيشرت اسود وترفع شعرها كحكه وتظبط الميكب وتطلع ل عمر يلبسو الكوتشيهات وينزلو سوا )
زينه : برضو انت واخدني علي فين
عمر : بتحبي تحضري غروب الشمس صح؟
زينه : اوي
عمر : يبقي هتحبي الشروق اكيد
زينه (بابتسامه) : يبقي تعالي انتَ معايا بقي
( يبتسم عمر ويمشو سوا وتاخدو زينه علي المكان اللي عمر ماحد قعد معاها فيه واللي بتقضي فيه اغلب وقتها، يقعدو علي صخرة قصاد المايه والمكان كلو فاضي ونسمة هوا لطيفه في المكان تريح قلوبهم هما الاتنين )
زينه : يوم ما اتعاركت انا وماما كنت هنا، لما مبروحش الكلية ببقي هنا، لما بحزن وبتعب ببقي هنا، ومحدش بيشاركني المكان ده ابدًا حتي رقيه عمرها م قعدت معايا فيه
عمر : افهم بقي اني اول حد يقعد معاكي فيه
زينه : فعلًا دي حقيقه
( يبتسم عمر ويفضلو قاعدين مستمعتين بمنظر شروق الشمس )
عمر( ويديها تليفونو ): ده ايفون، الجو فاضي والمنظر تحفه، عاوزك تطلعي الفوتوجرافر اللي جواكِ 😂💙
زينه : مش عارفه حاسه اني مش هعرف، انا بقالي كتير اوي بجد😂
عمر : جربي وبعد كام صورة هتظبط معاكِ انا واثق انك هترجعي تاني احسن ❤
( تبتسم زينه وتقوم تبدأ تصور المكان ومع كل صورة تكتشف غلطه وتصلحها في الصورة اللي بعدها لحد ما بعد صور كتير جدًا صورت واحده جميلة جدًا مصدقتش انها هي اللي مصوراها فعلًا، طلعت تجري علي عمر اللي باصصلها بابتسامه ونجاح وسعاده انو نجح في الخطوة التانيه )
زينه : عمر مش مصدقة شوف دي كده
عمر : ايه الجمال ده بجد
زينه : حلوة بجد؟
عمر : فوق ما تتخيلي
( تضحك زينه وتقوم تكمل ويفضل قاعد يتفرج عليها، يعدي الوقت ويرجعو البيت سوا يشوفهم إسلام راجعين سوا لكن يسكت ويكتم عصبيتو، تطلع زينه وتدخل البيت علي وشها ابتسامه تبصلها امها باندهاش لانها مشافتش ضحكتها من كتير، يدخل عمر وراها تبصلو امها يغمزلها بهدوء ويدخل وراها ويقعدو في الصالون كلهم سوا عشان يفطرو، تمسك زينه تليفونها يقرب منها عمر يهمس في ودنها )
عمر : تيجي ناخد خطوة جديده؟
زينه : ايه هي
عمر : نتحدي بعض نمسح الواتساب لمدة اسبوع مثلا!
زينه : بتهزر طبعًا مقدرش😂
عمر : مش اد التحدي يعني
( تتعصب زينه ويبتسم انو نجح يشعل جواها نار التحدي )
زينه : انا ادو بس هزهق
عمر : ملكيش دعوه بالزهق، لو تقدري امسحيه وسيبي الباقي عليا، وياستي همسح الواتساب بتاعي انا كمان ونشوف مين اد التحدي
زينه : وانا موافقه
( وللمره التالته يبتسم لنجاحو .. )