روايه " شيروفوبيا " لِـ الاء مسعود

شيروفوبيا الحلقة السادسة

شيروفوبيا ( رهاب السعادة )
"الحلقة 6"

•
•
•
•
•
•
•
•
•
•
•
•
•
•

___________________________________________

( تقعد زينه في الاوضة تاخد نفسها بهدوء وتتصل علي صحابها وتستني لحد ما كلو يتجمع ويتكلمو Video Call )
مريم : ها يا شباب كنا متفقين نخرج
سهيله : زينه انتِ ناويه تخرجي معانا بجد؟
زينه : اه والله يا جماعه، يمكن لو رجعت تاني ده يحسن من نفسيتي اكتر
هند : ايه الاخبار الجميله دي بس
زينه : كان اكبر غلط اني بعدت عنكم انا اسفه بجد
نرمين : انا بقول طلعو البت دي م الجروب
زينه : والله يا جماعه حتي رقيه، بقالي كذا يوم كده مبنتكلمش  سوا متتخيلوش انا بعدت اد ايه وعاوزة ارجع تاني
سهيله : Wait كده هحشرها معانا ف الجروب
( وتضيف رقيه وتدخل معاهم في المكالمه )
رقيه : وحشتيني ي بنت الجذمه
زينه ( وتدمع ) : انتِ مقدره الضغوط اللي انا فيها مش كده؟
رقيه : مقدره طبعًا وعمري م ازعل منك ي عبيطه
زينه : ربنا يخليكِ ليا يا رقيه بجد
رقيه : ويخليكِ ليا يا حيوانه
نرمين : ايه القرف ده
سهيله : احنا نخرجهم م الجروب تاني
هند : يلا يا ولاد النكديه شوفو هتخرجونا فين
( ويتفقو ويتبسطو كلهم برجوع زينه معاهم وينامو )
"5:00AM"
( تصحي زينه من النوم وتروح الحمام تغسل وشها وتبص في المرايه لوشها من غير ميكب وتبتسم وتبدأ تتقبلو علي ماهو عليه، تنشف وشها وتسرح شعرها وتغير هدومها وتطلع البلكونه تلاقي عمر عاملهم لمون )
عمر : انا بقول كفايه كفايين شويه عشان الكلي بتصيح 😂
زينه : يا دماغك ي عمر 😂
عمر : صحيتي ف معادك انهارده بالظبط
زينه : مش بعيد تلاقيني صاحيه قبلك كمان
عمر : لا لا مفتكرش مش للدرجادي
زينه : انت عارف اني اقدر اعملها
عمر ( بابتسامه ) : عارف
( تقعد زينه علي الترابيزة ويقعد عمر قصادها )
زينه : عندي خبر حلو شويه
عمر : ياسلام قولي
زينه : انا هخرج مع اصحابي انهارده
عمر : دي احسن خطوه ممكن تعمليها يا زينه، لمة الصحاب والخروج والتمشيه والضحك والهزار كل الحاجات دي هتديكي زقه كبيره
زينه : تعرف اني مخرجتش مع صحابي من اواخر اعدادي او اوائل ثانوي تقريبًا؟ والخطوة دي متشجعتش اني اخدها غير بسببك وبوجودك انت يا عمر
عمر : وانا سعيد اني قدرت اعمل ده يا زينه
( تبتسم زينه ويسرح فيها عمر شوية ويرجع يبتسم تاني )
عمر : هتنزلي امتي
زينه : بعد الضهر مثلًا؟
عمر : تخلي بالك من نفسك اوي يا زينه
زينه : حاضر يا عمر
عمر : اقتنعتي باللمون؟
زينه : الصراحه لا
عمر : يبقي قومي اعمليلنا كوبايتين قهوه😂
زينه : لازم تثبت وجودك وتعمل لمون وبتاع ورجعنا للقهوه ف الاخر😂
عمر : اخرسي ابت واسمعي الكلام وقومي، ناس مبتجيش غير بالعين الحمرا صحيح
( تبصلو زينه بتحدي وغموض ف يضحك وتدخل هي تعمل القهوه )
__________________

( نايم إسلام علي سريرو وفاتح تليفونو علي الشات بتاعو هو وهي وكأنو مستنيها تفتح عشان يعاقبها او يعاتبها، لكن متفتحش، هو عايز يعاقبها علي تغيرها معاه وعلي قفلها الواتساب والطريقه اللي بتكلمو بيها، ولا يعاتبها علي بعدها عنو وانها خلتو يشتاق ليها ولكلامها ولشقاوتها وعنادها معاه؟ ليه قلبو مايل للاختيار التاني اكتر؟ يمكن بعيدًا عن كبريائو وغرورو هو معترف انها الوحيده اللي بيحبها؟ وبرغم انو عارف انها بتحبو كان بيجي عليها ديمًا ويحسسها انها ولا حاجه في حياتو برغم انها كل حاجه؟ هيتجنن من التفكير ومكانش ليه حد غيرها بيشكيلها من كل اللي تاعبو وكانت الوحيده اللي بتسمعو، ياتري هيلاقي مين يسمعو لما يجي يشتكي منها؟ يحس بخنقه ويقوم يرمي التليفون ويحس انو بدأ يفقد جزء من اعصابو وخلاص فاض بيه .. )
‏
‏___________________________
‏
‏زينه : ايه اكلمهم انزل دلوقت عشان متأخرش بليل؟
‏عمر : قولتِ لمنال الاول؟
‏زينه : لسه هقوم اقولها بعدين اكلمهم بعدين البس
‏عمر : طب يلا خليني معاكِ وانتِ بتقوليلها
‏( تقوم زينه هي وعمر وتدخل لامها المطبخ ويقف عمر علي جمب )
‏زينه : ماما عايزة اقولك علي حاجه معرفش انتِ هتصدقيني ولا لا بس..
‏منال : قولي يا زينه متخافيش
‏زينه : انا خارجه مع صحابي
‏( تسيب منال الاكل من ايديها وتلف تبص لبنتها بصدمه، من زمان وهي بتتحايل عليها انها تخرج مع صحابها يخرجوها من حالتها دي شويه وكانت زينه بتزعق في وش اللي بيقولها كده، دلوقتِ هي اللي اخدت القرار وباين علي وشها الراحه، تبتسم منال وتاخد زينه بالحضن وتبص لعمر بشكر وزينه من الناحيه التانيه بتبصلو ببسمه مستغربه علي ايه الفرحه دي كلها؟ )
‏منال : انا مبسوطه بالتحسن الكبير ده يا زينه، من كتير اوي وانا بتحايل عليكِ تخرجي مع صحابك
زينه : اديني خدت القرار اهو يا ماما عشان انا واثقه أن الخروجه دي هتفرق معايا جدًا
‏منال : ربنا يريح قلبك اكتر واكتر يابنتِ
‏زينه : هخش انا البس بقي وانتِ اشكري دكتورنا الغالي
‏( يبتسم عمر ف تبتسملو بامتنان وتجري علي اوضتها بطاقه غريبه وتبعت لصاحبها رساله وتغير هدومها تلبس بنطلون بوي فريند فاتح وتيشرت زيتي وتلم شعرها كحكه وتحط روچ بس وتبتسم أن فعلًا شكلها احلي من الميكب الكامل اللي كانت بتحطو! تاخد شنطتها وتطلع تلبس الكوتشي ووهي نازله ترسم بإيدها قلب ع الهوا ف يضحك عمر جامد وتضحك هي كمان وتنزل جري تتقابل هي وصحابها )
‏هند : والله م مصدقه لحد دلوقت أن زينه معانا انهارده
‏نرمين : هي مش هتبقي معانا انهارده بس هي هتبقي ع طول أن شاءالله
‏رقيه : ايه رايك في الكلام ده يا زينه
‏زينه : معاهم حق، احنا لازم نرجع لشلتنا تاني يا رقيه انا عارفه اني بعدت وبعدتك عنهم انتِ كمان، لكن صدقوني كل حاجه هترجع تاني
‏سهيله : ياسلام علي رجوعنا شله واحده تاني هاين عليا ازغرط طب والنبي لزغرط
‏( ولسه هتيجي تزغرط تكتملها مريم بوقها ف تضربها سهيله ف يضربو كلهم في بعض ويجرو ورا بعض والشارع فاضي وصوت ضحكهم يعلي وإحساس فرحتهم اعلي♥ يطلعو علي البحر يتمشو سوا ويروحو يجيبو سندوتشات ويقعدو ياكلوها في الشارع ويروحو يشربو عصير قصب سوا ومن التعب يقعدو مش قادرين ياخدو نفسهم من الضحك )
‏مريم : خلاص بطني اتشلت طفحنا كتير
‏نرمين : متخيلين كام سنه ضيعناهم ببعدنا عن بعض؟
‏زينه : اسفه اني اتاخرت
‏هند : ياروحي اسفه اي المهم انك دلوقتِ كويسه
‏زينه : انا كل يوم ببقي كويسه عن اللي قبلو يا هند
‏( وتبتسم وبعدين تتسحب الابتسامه كأنها افتكرت حاجه وتبص في الساعه بتاعتها تلاقيها 5 ونص وتبص للشمس وترجع تبصلهم تاني )
‏زينه : يلا كفايه عليكو كده عشان عندي مشوار
‏رقيه : مشوار ايه ده يابنتِ
‏زينه : هبقي اقولك، يلا سلام ي جماعه بوساتي ليكو ع اليوم اللذيذ ده
‏_____________________
‏
‏( يتنهد عمر براحه لما يقعد في المكان المخصص ل زينه او بقي مخصص ليهم هما الاتنين، يبتسم وكأنو حاسس بروحها في المكان، يفتح تليفونو ويبتسم اكتر لما يشوف ال Wallpaper بتاعت تليفونو وهي الصورة اللي هي مصوراها للشمس ومظبطاها بالفوتوشوب، يفضل يقلب في الصور اللي صوروها سوا وبعدين يقفل التليفون ويحطو في جيبو ويغمض عينه وياخد نفس عميق يحس ب إيد بتلمس كتفو )
‏زينه : يا سلام ع اللي بقي يجي قبلي كمان
‏عمر : فكرتك مش هتيجي
‏زينه : مينفعش ما اجيش، انزاح شوية كده وانت واخد المكان كلو
‏( يبتسم عمر ويوسعلها مكان وتقعد جمبو وتاخد نفس عميق هي كمان وترجع تبصلو )
‏زينه : يعني رافع شعرك وحاطت برفان يدوخ اللي يشمو ولابس قميص ومتشيك اخر شياكه كده افرض اتعاكست وانا مش موجوده يعني
‏عمر : ياستي هتوقفي حالي ليه بس ما اتعاكس براحتي
‏زينه : لا مينفعش 😂
‏عمر : اتبسطتي؟
‏زينه : اوي اوي اووووي
‏عمر : وانا مبسوط منك وبيكِ اوي
‏زينه : وانا مبقتش مبسوطه غير بيك وبسببك يا عمر
( يبتسم عمر ويبصلها في عنيها جامد وبعدين يضحك ويحب يغلس )
‏عمر : طب بس بقي اسكتي عشان بقيتي رغايه غمضي عينك وخدي نفس عميق واستمتعي بالمنظر
‏زينه ( بضحكه ) : علي فكرة انا اللي علمتك كل ده يا خمّام
‏( يضحك عمر ويغمضو عنيهم الاتنين ويفرد عمر دراعو عشان يحط ايدو ع الصخره تتحط ايدو علي ايد زينه ف يبصو لبعض بضحك ويطبطب علي أيدها ويفضل حاطت ايدو عليها وتكون زينه من جواها حاسه بارتياح غريب من مجرد لمسة ايد، يعدي وقت الغروب ويقومو الاتنين يتمشو سوا ويرجعو البيت سوا ، يعدي اليوم واليوم اللي بعدو واللي بعدو لحد ما يجي اخر يوم في التحدي بتاع عمر وزينه )
‏عمر : ايه حاسه ب ايه؟
‏زينه : مش عارفه مش متحمسه اوي يعني حاسه اني لو مفتحتش واتساب مش هتفرق برضو
‏عمر : جربي
‏( يقوم عمر ويسيبها لوحدها و تفتح زينه الواتساب بتاعها وتسيبو يحمل الرسايل والاقي إسلام باعت رسالتين بس "مش بتفتحي واتساب كتير ليه، خلاص قررت تختفي يعني!" ترد عليه زينه لما تلاقيه اونلاين )
‏زينه : مقررتش اختفي ولا حاجه، انا بس كنت محتاجه ارتاح
‏إسلام ( ويرد في نفس الدقيقه ) : وارتاحتي لما مبقيناش نتكلم يعني؟
‏زينه : متفهمش كلامي غلط ع الاقل انا مسحت الواتساب معملتش بلوك زيك واختفيت فعلًا
‏إسلام : كنا اتكلمنا في الموضوع ده قبل كده وقولتلك كنت محتاج اعرف هكمل مع مين ومش هكمل مع مين
‏زينه : مانا كمان زيك هو انت بني ادم وانا ضفدعه مثلًا!
‏( يعمل إسلام Seen وميردش ف تسيب زينه التليفون لانها كانت متوقعه ده لكن متتوقعش انو بعد كام دقيقه يبعتلها رسالة تاني )
‏إسلام : المهم انتِ كويسه؟
‏( تبتسم زينه لكن ترجع تسحب ابتسامتها تاني بسرعه )
‏زينه : الحمدلله يا إسلام، قولي عامل ايه انت والايام اللي فاتت
‏إسلام : معملتش حاجه حتي متكلمتش مع هدير غير مرة مرتين كده بس حاسسها وحشتني
‏زينه : يعني انت مستنيني افتح عشان تقولي هدير وحشتني ي اخي أن م قولتلي كلمه حلوه حتي😂
‏إسلام : اقولك كلمه حلوه زي اي يعني😂
‏زينه : بس بس ياشيخ ده انت تسد النفس😂
‏إسلام : ماشي😂
‏( تعمل زينه Seen وتسيب التليفون تاني وتقوم، يفضل إسلام باصص في التليفون مبتسم ويرجع يسأل نفسو "هو ده الوش التاني اللي قولت هتوريهولها؟ الوش التاني ده اللي هو انك مش هتكلمها وهتتقل عليها وهترد متاخر وي وي؟ طب وهتعمل كده ازاي وانت حاسس انها وحشاك وعايز تتكلم معاها كل ثانيه كمان؟ يطلع البلكونه يلاقي زينه واقفه مع عمر وبيشربو شاي سوا، يبصلهم بنفاذ صبر وضيق وبدأ يجيب اخرو من وجود عمر! )
‏عمر : كلمك اكيد
‏زينه : اتكلمنا اه، كلمتين كأنو كان بيعاتبني ع غيابي وبعدين عمل Seen ومردش وبعد شوية اتكلم هو، كلمتين غلسنا فيها غلاستنا الطبيعيه وبعدين انا عملت Seen ومردتش
‏عمر : وانتِ حاسة ب ايه
‏زينه : حاسه اني متفاجأة بس من طريقتو معايا عايز يفتح كلام وبيعاتب ومهزرش من كتير، انما حاسه اني مش زي الاول بهزر معاه اه بس في جوايا جزء كبير مقفول او مكسور او قرفان مش عارفه
‏عمر : خطوة كويسه، عندي خبرين واحد حلو وواحد وحش
‏زينه : الله يقرفك ي عمر انت عايز تنكد عليا عشان منكدش هو عليا يعني
‏عمر ( بابتسامه ) : الاسبوع الجاي خروجاتنا هتبقي كتير ونزولنا هيكتر سوا، والخبر الوحش اني همشي اخر الاسبوع الجاي، أنا طولت كتير وسيبت كل اللي ورايا عشانك
‏زينه : لا لا ياعمر متقولش كده عشان خاطري خليك معايا شوية كمان
‏عمر : مش بمزاجي يا زينه انتِ عارفه وبعدين احنا بقالنا سوا كتير اهو وفاضل اسبوع كمان
‏زينه : ولو قعدنا سنه يا عمر فكرة انك هتمشي دي بتضايقني
‏( يبتسم عمر ويمسك ايديها )
‏عمر : حتي لو مشيت مش هقطع زيارات عنكم تاني، مقدرش مشوفش القمر ده😂💙
‏( تضحك زينه وتبعد أيدها عنو وتضربو ف كتفو ويحمر وشها وإسلام متابعهم بعنيه، مسك ايديها وقالها حاجه خلت وشها احمر؟ قالها ايه ويمسك أيدها بتاع اي اصلا وازاي هي تتجرأ وتسمحلو وتضحك كمان! اي التهريج ده! يفضل متابعهم ب عينه ومتابع عمر بالاخص ويفهم من عينه انو بيحب زينه ولما يتنقل بعنيه لعيون زينه يحس باستجابه وقبول من ناحيتها لعمر! يتنرفز اكتر وتفضل عينه عليهم لحد م تبص زينه علي بلكونه اسلام وهو يفضل باصصلها كالعاده ف تحس بخنقه )
‏زينه : تيجي نخش ي عمر؟
‏عمر : ولو اني بحب البلكونه بس ماشي نخش يا عمر
‏( تضحك وتدخل ويدخل عمر وراها، يقعدو سوا عمر ومروان وامها وام عمر ويتكلمو ويضحكو كلهم وللمره الاولي زينه بتشارك في الحوار وبتضحك معاهم وبتغلس عليهم بشقاوتها من جديد! يفضل عمر مبسوط بيها وكأنها انجاز عظيم. يخلصو قعدتهم سوا ينزل عمر وزينه سوا يقعدو علي نفس الصخره اللي قصاد البحر المخصصه ليهم عشان الغروب )
‏عمر : ملاحظ ان التحدي بتاعنا خلص وبرضو ممسكتيش التليفون
زينه : اتعودت اني مبمسكهوش وحتي بيتبعتلي رسايل ومش حابه ارد، حتي هو رغم انو رجع يكلمني بس بيكلمني عن البت بتاعتو دي برضو وانا عايزة اقولو اولع انت وهي ف ساعة واحده انا لا طيقاه ولا طيقاها
عمر : حسيتي ب ايه بعد م رجع يتكلم عنها
زينه : حسيت ب قرف، الاول كنت بغير وكنت بضايق جدا، دلوقتِ انا قرفانه منو اوي بجد وبينزل من نظري اكتر لاني متاكده انو بيلعب بيها لانو بتاع بنات اساسًا
عمر : مبقيتيش بتحني ليه تاني؟
زينه : حاسه انو لا، وحتي لو في نسبه بسيطه جدا عمري م هكون زي الاول الانسان لما بيتقفل من حد صعب يرجع تاني
عمر : انا كده بالنسبالي كل الصعب عدي، لو حاجه حصلت بعد كده ف ممكن تحني ليه تاني ممكن الذكريات اللي كانت بينكم تحيا من تاني في احتمالات كتير هتحصل، بس للاسف لما تحصل مش هعرف اكون معاكِ
زينه : يعني ايه
عمر : لازم تبدأي تواجهي لواحدك، انا مهما فضلت جمبك هيجي يوم وهمشي سواء اليوم ده قريب او بعيد
زينه : عمر انا خايفه اواجه لوحدي، انا بتطمن وانت معايا بحس اني بقدر اتغلب علي كل حاجه صعبه وكل حاجه متعبه، ارجوك متسيبنيش يا عمر
عمر : لسه شوية يا زينه، بس خلي ديمًا الفكره دي ف دماغك، اي شخص في العالم هيجي يوم ويسيبك مهما اختلفت الطرق موت او ظروف او مرض او او المهم انك لازم تقوي نفسك عشان تقدري تتغلبي علي بعد الناس عنك
( تسمع زينه كلامو بعيون مدمعه وتهز دماغها ب حاضر )
عمر : وانا مهما بعدت عنك هتلاقيني رجعتلك تاني، انا مقدرش ابعد عنك يا زينه او مبقتش بقدر ابعد عنك، انا حبيتك اوي يا زينه