روايه " شيروفوبيا " لِـ الاء مسعود

شيروفوبيا الحلقة الخامسة

شيروفوبيا ( رهاب السعاده )
"الحلقة 5"

•
•
•
•
•
•
•
•
•
•

_________________________

زينه : شكرًا اوي يا حنان التمشيه في الوقت ده بجد غريبه جدًا وجميله جدًا
حنان : لا شكر علي واجب فاضل بس نجيب فطار عشان انا عصافير بطني بدأت تزغزغني😂
زينه : طيب ماشي😂
حنان : ايه رأيك اروح انا الفرن اجيب العيش وتروحي انتِ السوبر ماركت ولا العكس
زينه : ممكن تبقي معايا في الاتنين؟
حنان : هو ممكن بس ليه؟
زينه : بصراحه مش بعرف او مش بحب اتعامل مع الناس كتير وحقيقي معرفش السبب ايه
( تسكت حنان وتهز دماغها بفهم ويروحو سوا السوبر ماركت )
حنان : صباح الخير يا عم اسماعيل ايه الاخبار
اسماعيل : صباح النور يابنتِ انا بخير انتِ عامله ايه ودكتور عمر
حنان : كويس والله جه العياده انهارده
اسماعيل : لا والله، لا ده انا اجي اشربلي كوباية قهوة مع الدكتور بتاعنا بقي
حنان : تنور يا عم اسماعيل وصحيح نسيت اعرفك، دي زينه بنت خالة الدكتور
اسماعيل : يا اهلًا يابنتِ نورتينا والله
زينه : شكرًا
حنان : جيبلنا طلباتنا بقي ياعم اسماعيل عشان والله م قادره هاكلكو كلكو😂
( تبتسم زينه وتفضل متابعه حنان بعنيها وعلي طريقة تعاملها مع الناس وهزارها المستمر وانها بتاخد وتدي في الكلام ، يخلصو ويروحو الفرن عشان يجيبو عيش )
حنان : من اختلاطي ب دكتور عمر عاوزة اقولك أن اي مشكله مش هتتحل غير لما تواجهيها وفي لحظتها، لو مش بتعرفي تواجهي الناس فعلًا يبقي خدي الخطوة واعمليها وواجهيهم
زينه ( بتردد ) : مش عارفه انا حاسه بتقل علي روحي وحاسه بضيق
حنان : لو مأخدتيش الخطوة دلوقتِ عمرك ما هتاخديها
( تتردد زينه وتفتكر انها بقالها فترة كبيرة مبتتعاملش مع حد غير اهلها تقريبًا وديمًا رقيه اللي بتكون معاها، تاخد الفلوس من حنان وتدخل الفرن وتشوف واحد واقف ف تناديلو بصوت مهزوز )
زينه : لو سمحت
الشاب : ايوة
زينه : عاوزة ب 5 جني عيش
الشاب : عيوني
( تفضل واقفه متوتره لحد ما يجيبلها العيش تاخدو وتطلع لحنان وتبصلها بابتسامه )
حنان : بكل بساطه الموضوع مفيهوش اي مشاكل😂💙
زينه : ممكن تستغربي بس بجد انا مبتعاملش مع ناس غريبه نهائي ومش خوفًا منهم لكن، مش عارفه اوصلك اللي حساه
حنان : انا فهماكِ ، افتكري كلامي وكل مره خدي الخطوه ومع الوقت هتبقي اجتماعيه اكتر والموضوع هيبقي جميل معاكِ
زينه : حقيقي انا بشكرك اوي
حنان : عيب عليكِ ده انتِ من طرف دكتور عمر يعني اشيلك في عيني وعلي راسي
زينه : ربنا يخليكِ يا حنان شكرًا
حنان : شكرًا تاني؟ خلاص ياستي العفو
( تبتسم زينه ويرجعو بالفطار وتحطهم حنان علي مكتبها ويعدي شوية ويدخل عمر )
عمر : يااه علي ريحة الفلافل الجميله وايه الفطار اللي يفتح النفس ع الصبح ده
زينه : جرا ايه ياعمر انت قاعد معانا بقالك كام يوم وفطارنا مكنش بيفتح نفسك؟😂
عمر : هتتفتح نفسي ازاي وانتِ بتبقي مخموده لسه متعلمه تصحي بدري امبارح
( تضحك زينه وحنان تبص لعمر وتضحك كأنها فهمت حاجه، يفطرو سوا وعمر وحنان يهزرو سوا ويخلو ومع الوقت بدأت زينه تهزر هي كمان، يضحكو سوا ويتبسطو وتحس زينه براحه من جواها، يخلص الوقت وتسلم زينه علي حنان وتمشي هي وعمر )
زينه : قضيت اجمل وقت عدي عليا من كتير اوي يا عمر، وحنان شخصية جميله اوي بجد
عمر : في شخصيات جميله كتير زي حنان مستنينك تتعرفي عليهم، بس اهم حاجه تحسني الاختيار
زينه : حاضر
عمر : مبسوطه؟
زينه : مبسوطه بس واحده زيي لما بتتبسط بتخاف، معروفه اي لحظة حلوة بيجي بعدها مليون ساعه مُره، طعم الفرح حلو بس انا بخاف اتعود عليه لانو بيروح بسرعه
عمر : فهمت، انتِ عندك شيروفوبيا يا زينه
زينه : شيروفوبيا؟! يعني ايه
عمر : شيروفوبيا يعني رهاب السعاده، بتخافي من السعاده او الانبساط او الفرحه
زينه : دي حقيقه، اي لحظة بحس اني هفرح فيها بعدها علي طول بيتملكني احساس الخوف والقلق والضيق، بمعني اصح مبتكملش
عمر : صدقيني انك تعيشي اللحظة بلحظتها احسن م تفضلي تفكري ف اللي جاي، هتحبي طعم الفرح وهتتمسكي بيه لدرجة انك مش هتقبلي انك تدوقي المر تاني
زينه : مش بإيدي
عمر : عارف بس عايزك تكوني عارفه أن الدنيا عباره عن طريق وفيه كام مطب في الاخر بس بيعدو، عمرك شوفتي طريق كلو مطبات وفيه كام حته مستويه بس؟
( تهز زينه راسها ب لا و تبتسم بفهم وتفضل تتمشي هي وعمر علي البحر ومستمتعين بالهدوء )
زينه : عمر
( يبتسم عمر لما تنادي عليه وسط الهدوء ويحس بدفا غريب لكن حلو )
عمر : نعم يا زينه
زينه : تفتكر هقدر اقوم تاني وارجع زينه بتاعت زمان ؟
عمر : انتِ بتقومي فعلًا وانا عارف انك هترجعي احسن واهدي واريح من الاول، وعارفه أن زينه المشاغبه هترجع تاني وهتقرفينا
( تضحك زينه وتبص لعمر )
زينه : شكرًا انك جيت في الوقت المناسب
عمر : كان لازم اجي بدري عن كده يا زينه، متعرفيش بيبقي احساسي عامل ازاي وانا شايفك قدامي زعلانه او بتعيطي او مكسوره او حتي هاديه! لما بتحكي ان حد بيأذيكي ببقي حاسس كأني عايز اقوم اكسر عضمو! طول عمرنا كنا مسميينك زينة العيله عشان كنتِ الصغيره المشاغبه واللي بتنشر روح البهجه في كل مكان، مين ده اللي قدر يطفي زينة عيلتنا؟!
( تبتسم زينه بحنيه وتمسك ايدو تطبطب عليها وتضحكلو )
زينه : زينة العيله بتبدأ تنور من جديد بسببك يا عمر
( يبصلها عمر في عنيها جامد وتطول نظرتو ويرجع يبتسم تاني ويطبطب علي ايديها هو كمان، يعدي الوقت بيهم ويوصلها علي الكليه بتاعتها ويرجع هو البيت وتحضر هي المحاضرة بتاعتها وتخلص وتطلع ، تشوف شله من صحابها القدام تبصلهم وتفكر، تهرب منهم عشان ميشوفوهاش زي ما بتعمل كل مره؟ ولا تسمع كلام حنان وعمر وتواجه! والمرادي تاخد القرار الصح وتمشي في اتجاههم لحد ما يشوفوها يجرو عليها )
مريم : زيناااااااااااه وحشتيينااااااااااي
زينه ( بضحك ) : وانتِ اكتر يا مريومه واللهِ
هند : مبتجيش الكلية ليه يا زينه
زينه : باجي والله يا هند لكن كان في شوية مشاكل ف كنت باجي بسرعه وامشي بسرعه، متزعلوش مني بجد اني قطعت معاكو الفتره اللي فاتت
نرمين : نزعل ايه يا بت انتي اتعبطي ف دماغك، احنا مقدرين انك محتاجه تكوني لوحدك شوية
سهيلة : مع اني نفسي ترجعي معانا تاني يا زينه، ع الاقل نتجمع كل فتره تطمنينا عليكي حتي
زينه : حاضر والله يا سهيله
هند : طب ما تيجو نخرج سوا بعد الكلية انهارده بما اننا قابلنا زينه
مريم : والله فكره جميله احنا مخرجناش سوا تقريبا من تانيه ثانوي😂
زينه : طب بلاش بعد الكليه عشان ورايا مشوار مهم، نتكلم بليل مكالمه جماعيه ونتفق
( يبصو لبعض كلهم بفرحه ويبصولها تاني وتجري عليها نرمين تحضنها )
نرمين : وحشتينا اوي يا زباله!♥️
( تضحك زينه وتحضنها اكتر وتسلم عليهم واحده واحده )
مريم : يبقي علي اتفاق بليل نتكلم سوا كلنا
زينه : عيوني
سهيلة : بس مشوار ايه اللي وراكي بعد الكليه يا صايعه😂😉
زينه ( بابتسامه ) : الغروب يا سهيله! 😂♥️
( تسلم عليهم كلهم وتمشي ووهي ماشيه تحس بطاقه ايجابيه جواها، اد ايه هي كانت مفتقداهم جدًا لكن مكانتش قادره تواجههم ولما واجهتهم لقيتهم مقدرين شعورها مع انها هي اللي بعدت، تبتسم وهي ماشيه وتقابل عمر يلاقي علي وشها ضحكه مميزه )
عمر : ايه الضحكه الجميله دي؟
زينه : حصل موقف مفرحني اوي ياعمر
عمر : ياسلام احكيلي
زينه : قابلت الشله بتاعتي صحابي بتوع زمان اللي كنا ديمًا سوا ايام ابتدائي واعدادي واول ثانوي، كنت عارفه انهم نفس الكليه اللي انا فيها مع ان منهم شوية ف كليات تانيه بس الاكتر معايا، لكن كنت ديمًا بتجنبهم ولما بشوفهم بهرب منهم وبروح من الكلية بسرعه قبل م اشوفهم، كنت خايفه من العتاب برضو. لكن انهارده انا خدت الخطوه وواجهتم وسلمت عليهم وتخيل طلعو مش زعلانين مني ومتفهمين اني مبعدتش بمزاجي!❤
( يبتسم عمر بسعاده ليها لأنو شايفها بتتحسن اكتر من الاول بكتير )
عمر : كل حاجه هتبدأ تتحل من تاني وكل ما حاجه هتتحل هتتبسطي اكتر واكتر وكل ده بالمواجهه والمبادره بالخطوه الاولي يا زينه
زينه : عمر انت بجد احلي حاجه حصلتلي من كتير اوي انا، انا مبسوطه اوي اووي عايزة اتنطط من الفرحه!
( يضحك عمر بفرحه لما يحس بفرحتها وصلالو، يروحو يجيبو ايس كريم ياكلوه سوا ويروحو المكان المخصص لزينه، ويقعدو سوا لحد الغروب )
عمر : هتخليني ادمن المنظر ده
زينه : منين م تحب تيجي، انا مبمشيش م المكان ده حرفيًا
عمر : ليه مش قايله ل منال انك بتيجي هنا كل يوم
زينه : عشان محدش يعرف مكاني، لما بتعارك معاهم او بزعل او بتخنق او اي مشاعر سلبيه بحسها باجي هنا، ومش عايزة حد يوصلي ويضايقني ف وقت زي ده
عمر : وانا الوحيد اللي عرفتيني
‏زينه ( بابتسامه ) : بالظبط
‏عمر : وانا سعيد انك مخلياني اشاركك وحدتك وضيقتك يا زينه
‏( تبتسم زينه ويعدي الوقت وترجع مع عمر البيت يطلع عمر وتروح زينه تشتري حلويات وتدخل العمارة بتاعتها تقابل إسلام في دخلة العماره )
‏إسلام : اهلًا بالمُختفيه
‏زينه : عامل ايه يا إسلام
‏إسلام : لما عاوزة تعرفي انا عامل ايه مبتفتحيش ليه تكلميني؟!
‏زينه : عاوزة ابقي مع نفسي شوية يا إسلام هو ده يضايقك في حاجه ؟
‏إسلام : تبقي مع نفسك ولا تبقي مع ابن خالتك اللي كل شوية رايحين جايين سوا ومش فاهم بيمشي معاكِ بصفتو ايه؟!
‏زينه : وانا كمان مش فاهمه انت بتتكلم معايا كده بصفتك ايه؟!
‏( تسكت زينه بعد اللي قالتو بتلقائية وبعدين تبص ل إسلام جامد )
‏زينه : عمر ابن خالتي يا إسلام، والناس كلها عارفه ده ومش نازله معاه من ورا اهلي مثلًا !
‏إسلام : اعملي اللي تعمليه انا مش عارف ايه اللي بيحصل الايام دي ومش مهتم اعرف اصلا
‏زينه : كده اريح برضو
‏( تطلع زينه وينزل إسلام واول ما تحس انو مبقاش موجود تعيط بوجع وتستغرب من الطريقه اللي بتكلمو بيها كأن حد غيرها فعلًا اللي بيتكلم، تفضل واقفه قدام باب شقتهم وتمسح عنيها من الدموع وتحاول تهدي عشان محدش يسالها عن سبب العياط، تخبط الباب واول ما يفتح عمر تدخل بسرعه وهي باصه ف الارض وتروح الحمام تغسل وشها وتبص في المرايه كأنها بتقوي نفسها، تهدي من جواها وتطلع تروح اوضتها وتقعد تاخد نفسها براحه، بعد ثواني تلاقي عمر ماسكها من ايديها وبيوديها البلكونه )
‏عمر : الهوا هنا احسن من هوا الاوضه
‏زينه : انا باخد نفسي بس
‏عمر : ايه اللي حصل
‏( تبصلو زينه بسؤال ف يشاور علي عنيها )
‏عمر : انا حافظهم
‏( تبتسم زينه وتمسح عنيها )
‏زينه : شوفتو، اتكلمت معاه بطريقه اول مره اتكلم بيها، رديت بتدبيش ومفرقش معايا يزعل ولا لا زي كل مره، الطبيعي اني لما بتكلم معاه باخد بالي من اقل كلمه عشان ميزعلش ويقلب عليا!
‏عمر : تغيرك معاه ده طبيعي لانك زي ما بتقولي"اتقفلتي" ودي حاجه بتبان في المعامله، هتستغربي نفسك وهتضايقي من أن ده حصل وانكو ف يوم كنتو كويسين وتفتكري الايام الحلوه، لكن صدقيني مع الوقت هيبقي زي اي شخص كان ليكو مواقف جميله سوا بس في النهايه هو مجرد شخص عادي ولا بتكرهيه ولا بتحبيه
‏زينه : بس انا بحاول اكره نفسي فيه
‏عمر : الكره ده في حد ذاتو اهتمام يا زينه، انما العادي عادي زي اي حد عادي، وصلتلك الفكره؟
‏زينه : وصلت
‏عمر : اوعي اشوف دموعك دي تاني
‏زينه : والله انا زهقت من كتر العياط
‏عمر : اركني قلبك علي جمب شويه عشان تعبتيه الفتره اللي فاتت، خلي عقلك اللي يتحكم في اغلب المواقف الجايه وصدقيني عمرك ما هتندمي
‏زينه : حاضر هحاول
‏عمر : جيبتي سوداني بالشكولاته؟
‏زينه : انت تافه اوي يا دكتور!😂
‏
________________________
‏
‏( قاعد إسلام في اوضتو بيهبد علي مكتبو ودماغو صدعت من التفكير والعصبيه وبيمسح ايدو مكان ما الشاي اتكب علي ايدو وهو مش حاسس، يفضل قاعد بيفكر "هي اتهبلت دي ولا ايه؟ من أمتي بتتكلم معايا بالاسلوب ده! دي اول مره تبص في عيني بالجرأة دي وهي بتتكلم! ماشاءالله الباشا مغيرها ع الاخر!" يفكر ويستنتج لو فعلًا ابن خالتها اللي مغيرها وهي حبتو؟ يتخض من الفكره ذات نفسها ويتعصب اكتر ويهبد المكتب برجلو )
‏إسلام : لا! لا زينه مبتحبش حد غيري طول السنين دي هي اللي متمسكه بيا وبتحبني وبتجري ورايا مستحيل اصدق انها تحب حد! انا هعرفك يا زينه ازاي تعملي معايا كده وحيات امي لتشوفي الوش التاني اللي طول عمرك بتخافي تشوفيه!
‏
____________________

عمر : الوحش هيموت
زينه : لا هيرجع بني ادم وهيتجوزها
عمر : لا هيموت ماهو اتنفخ واخر ورقه في الورده وقعت حتي لو عاش تاني مش هيرجع بني ادم
زينه : عمر انا سامعه الكرتون ده مليون مره قبل كده متخترعش
عمر : طب كملي ياختي
( تشغل زينه الكرتون تاني ويخلصوه )
زينه : مش قولتلك
عمر : بت متسمعينيش حاجه انتِ سمعتيها قبل كده تاني
زينه : انت اللي معيشتش طفولتك زي البني ادمين هو في حد في الدنيا مسمعش كرتون الجميله والوحش؟
عمر : انا طفولتي كلها ضاعت علي شركة المرعبين المحدوده مكنتش بسمع غيرو
زينه : ده اخرك في الكرتون😂
عمر : كنت بحبو😂
زينه : جيت لشخص مناسب هيسمع جميع انواع الكرتون وهتحبهم كلهم صدقني
عمر : ادينا هنشوف
( تبتسم زينه وتاكل فشار وتبص لعمر )
زينه : متخيل أن ده تالت يوم من غير سوشيال ميديا؟
عمر : فاضلك 4 ايام وهيخلص التحدي، انا مش ناسي
زينه : وانا هقدر اكملهم
عمر : انا عارف
( تضحك زينه وتبص لعمر بأمتنان يحس هو بيها )
عمر : ضحكتك جميله اوي يا زينه، اوعي تبطلي تضحكي، ضحكتك بتدي نور ونغمه في المكان بطريقه غريبه لكن حلوه، ف متحرميناش منها
( تبتسم زينه اكتر وتتكسف ويحمر وشها لاول مره وكأن الروح ردت فيها من جديد، يبتسم عمر من اجمل حاجه شافها بالنسبالو وهي تحسن زينه كل ثانيه عن اللي قبلها، يقفل اللاب بتاعها ويزقها بضحك )
عمر : يلا قومي بقي انتِ مش هتصاحبيني جتك القرف
زينه : لا بقولك اي انا ممكن اسهر واسهرك معايا غصب عنك علي فكره
عمر : وانا ممكن اقوم اديكي بحاجه علي دماغك تخليكي تنامي غصب عنك علي فكره
زينه ( بضحك ) : تصدق بتفكر😂
عمر : يلا نامي عشان نصحي ف معادنا، ليله سعيده بس تكوني اسعد منها ي زينه💜
( ويخرج ويقفل الباب )
زينه : مببقاش سعيده غير وانا معاك يا عمر💜