روايه " شيروفوبيا " لِـ الاء مسعود

شيروفوبيا الحلقه 13

"شيروفوبيا ( رهاب السعادة )"
"الحلقة 13"

•
•
•
•
•
•
•
•
•
•
•
•
•
•
____________________________

( يعدي اليوم علي زينه وعمر ويبقي بالنسبالهم اجمل يوم عدي عليهم وبالنسبه لإسلام فهو اسوأ يوم عدي عليه، قاعد في اوضتو مضلمها ع الاخر وقافل الباب عليه، قاعد ساكت وباصص في الفراغ والوقت متأخر علي غير العاده، ويفضل علي الوضعيه دي كتير جدًا لحد تقريبًا تاني يوم مطبق، يخرج من اوضتو عنيه حمره وتحت عينو اسود، وشو شاحب وشكلو مبهدل، تحضرلو امو الفطار لكن يرفض الاكل ويدخل اوضتو تاني، يطلع البلكونه يبص علي بلكونتها، بيقول إسلام:
شوفتها واقفه ومبتسمه للتليفون وبتكتب بلهفه، وبعد ما بتبعت الرساله بثواني تتبعت رساله برنه مميزة، واول ما الرساله بتتبعت تبتسم هي اكتر! اكيد بتكلمو هو! الابتسامه دي كانت ليا في يوم وانا كمان كان ليا رنه مميزة! ازاي يتجرأ!! "

زينه : اهو مفاضلش كتير علي الامتحانات ربنا يستر
عمر : متأكد انك هتعديها وبدرجات اعلي كمان
زينه : إن شاءالله ياعمر، في حاجه عاوزة اقولهالك بس مش نكد مني والله😂
عمر : ولو بتنكدي يعني انتِ تاخدي راحتك ع الاخر😂
زينه : حاسه اني قلقانه وخايفه، انا مبسوطه اوي وكل حاجه ماشيه مظبوطه وتمام لدرجة تخوف
عمر : اول حاجه اكيد هيحصل مشاكل هتواجهنا بس احنا هنواجهها سوا ومش هنسمح لحاجه تزعلنا من بعض حتي، اما بالنسبه لتاني حاجه ف انتِ فضلتي مأذيه لفتره كبيره يا زينه، جه معاد انك تفرحي وتتبسطي بقي ولا ايه
زينه : بجد انت عوض ربنا ليا يا عمر، انا بجد بحبك اوي فوق ما تتخيل♥
( تبعتها زينه وتوصلها رساله بس برنه عاديه، تشوفها تلاقي إسلام )
إسلام : ايه اخبارك
زينه : بخير، انتَ اي اخبارك
إسلام : محتاج اشوفك
( تستغرب زينه وبعد ثواني ترد )
زينه : انا في البلكونه اهو؟!
إسلام : لا، محتاج اشوفك بره
زينه : في حاجه مهمه ولا ايه
إسلام : انتِ عارفه اني مبحكيش ولا بشتكي لحد غيرك، كنتِ عاوزة تعرفي موضوع هدير وانا عاوز اتكلم بس الكتابه مش هتريحني
زينه : خلاص شوف حدد مكان ونتقابل
( يشوف إسلام مكان ويقولهولها، تفضل زينه مستغربه لان إسلام عمرو ما طلب يقابلها قبل كده، تدخل تغير هدومها وتلبس بنطلون اسود وبلوزة زيتي وتعمل شعرها كحكه وتقول لامها وتفضل ترن علي عمر ميردش، تمشي وتروح المكان اللي هيتقابلو فيه تلاقيه قاعد مستنيها )
زينه : صباح الخير
إسلام : صباح النور، اقعدي
زينه : مواعيدك رهيبه الجو نار
إسلام : عشان شغلي انتِ عارفه
زينه : عارفه عارفه
( يطلب إسلام عصير ليه ولزينه، يبص علي ايدها وتحديدًا علي الخاتم ويبتسم تاخد زينه بالها وتبصلو باستغراب )
زينه : ها ايه اللي حصل بقي مع هدير
إسلام : تعبت وزهقت ف مشت ومعاها حق، مين يستحملني
زينه : قبل ما تكمل، انتَ متمسكتش بيها صح؟
إسلام : هتمسك بيها ليه وهي قررت تمشي
زينه : طبعًا وانت من امتي اتمسكت بحد، هي منامتش وصحت من النوم قررت تمشي اكيد انت اللي وصلتها لكده
إسلام : هي عرفاني من الاول وعارفه طباعي محدش جبرها عليا
زينه : هي وافقت بيك عشان بتحبك وكان عندها امل انك تتغير ولو بنسبة بسيطه
إسلام : وانا موعدتهاش اني هتغير
زينه : انت لازم تتغير عشان اللي هتكون من نصيبك بعد كده متتحطش في نفس المكانه وتتظلم تاني
إسلام : كنتِ زي القمر امبارح
( تسكت زينه ويحمر وشها، اول مره بعد سنين كتير إسلام يقولها كلمه حلوه وبالطريقه دي، نبرة صوتو كان باين فيها الحزن رغم جهادو انو ميبانش )
زينه : تسلم يا إسلام، مطلعتش دكر اهو زي ما كنت بتقول عليا
إسلام : اثبتيلي انك ست البنات يا زينه
( تبدأ ملامح زينه تتغير وتتعصب وإسلام يفضل بنبرة صوتو اللي اول مره في حياتو يتكلم بيها )
إسلام : امبارح كانت خطوبتك يا زينه، وبعد فترة هتعزمينا علي فرحك، طب وانا؟؟!
زينه : انت ايه يا إسلام؟!!
إسلام : اول ما تبقي من نصيبو هتخلص كده؟ ضيعتي كل حاجه ليه؟
زينه : هو مش احنا اخوات يا إسلام؟ في اخ مبيتمناش لاختو الخير
( يتعصب إسلام وتتغير نبرة صوتو ويمسكها من دراعها جامد )
إسلام : احنا مش هنستهبل علي بعض احنا عمرنا ما كنا ولا هنكون اخوات!
( تتخض زينه من إسلام وتتعصب هي كمان وتزق ايدو جامد )
زينه : لا والله؟!! عمرنا ما كنا اخوات؟؟ ازاي يا إسلام هو مش انت اللي كنت بتقول اني زي اخوك الصغير كمان؟؟ مش كنت بتقولي هي ليه هدير مش مكانك وهي جارتي كنت هتبسط اكتر؟ مش يوم خطوبتك عزمتني وقولتلي لازم الاخت تحضر فرح اخوها؟
إسلام : ورغم كل ده كنتِ بتحبيني وكنتِ متأكده اني بحبك!
زينه : كنت بحبك بس جبت اخري! كنت بستحملك وبفضل جمبك بكل الطرق كنت ملجأك وقوتك الوحيده وانت عملت ايه؟ كنت بتيجي عليا وتعاملني بأسلوب زباله وعايزني علي مزاجك تبعد براحتك وترجع براحتك وبسببك كنت ف اسوأ حالاتي لسنين!
إسلام : وكنتِ راضيه بده معترضتيش ولا اتغيرتي غير لما هو دخل حياتك!
زينه : عشان كنت محتاجه حد يفوقني من اللي انا بعملو ف نفسي ومش حاسه هو انت عايزني عروسة لعبه تحركها علي مزاجك!
إسلام : ايوة!!
( ويسكتو هما الاتنين تهبد زينه علي الترابيزه )
زينه : عرفت ليه عمرك في حياتك ما هتلاقي اللي تستحملك ولا اللي تقدر تعيش معاك؟ عرفت ليه بحمد ربنا كل يوم ان عمر دخل حياتي ولحقني من قرفك!
إسلام : متضحكيش علي نفسك وعلينا يا زينه انا وانتِ عارفين انك بتحبيني انا وعمرك ما هتحبي غيري!
زينه : تبقي بتحلم يا إسلام، انا حبيتك اه بس كرهتك اضعاف اضعاف ما كنت بحبك، وعمري ما حبيت حد قد عمر
إسلام : عمر مين ده اللي حبيتيه من شهور واحنا سوا بقالنا سنين!
زينه : اديك قولت لنفسك احنا بقالنا سوا سنين!! لما انت بتحبني اوي كده كنت مستني ايه؟ انت ولا حتي لمحتلي ب ده مره!! كنت ناوي تقولي امتي ولا تاخد خطوة امتي كنت مستني ايه فهمني!
إسلام : كنت مستني الوقت المناس..
زينه : وقت ايه اللي مناسب؟ كنت مستنيني ادخل في الاربعينات يعني ولا ايه مش فاهمه؟ ايه اللي يمنع واحد بيحب واحده انو يقولها ويطلبها؟!!
( يسكت إسلام مش لاقي مبرر )
زينه : ايه اللي يخلي واحد بيحب واحده يقولها انو بيحب واحده تانيه لا وايه؟ يروح يخطب اللي مبيحبهاش كمان!
إسلام : انتِ عارفه اني كنت بغيظك ب هدير وخطبتها لما لقيتك بتقربي من عمر ده! كنت عايز اثبتلك ان انا كمان مبسوط في حياتي
زينه : علي قفا هدير؟
إسلام : هدير اللي فضلت تقرب مني رغم انها متأكده اني بحبك انتِ وهي اللي وافقت وفرحت عشان تبقي معايا وعشان بتكرهك ومتأكده ان الخطوبة دي هتكسرك!
زينه ( وتضحك بسخريه ) : اللهم لا شماته بس شوف ربك مين اللي اتكسر في الاخر
( وتقرب تاني من الترابيزه )
زينه : الفرق بينك وبين عمر، عمر حنين في تعاملاتو وعمرو ما اذي حد ولو بكلمه، ويوم ما حس بحاجه من ناحيتي قاللي وبعدها اتقدملي واتخطبنا، انت بقالك سنين حاسس بحاجه نحيتي جيت عليا واذتني وكرهتني في حياتي كلها! شايف شكلي؟ شايف الفرق بين زينه اللي حبتك وزينه اللي بتحب عمر؟ عمرك شوفتني في الفرحه اللي انا فيها دي كده قبل كده؟ ابدًا ! عمرك شوفتني مبسوطه معاك بالشكل ده؟ ابدًا ! عمرك فرحتني ولو بكلمه؟ ابدًا طبعا!
إسلام : وايه اللي جبرك تكملي معايا كل ده طلاما انا وحش بالشكل ده
زينه : كان عندي امل انك تتغير عشان كنت بشوف في عنيك انك بتحبني وكنت مشوشه مش عارفه مصلحتي فين
إسلام : وكل ده عرفتيه لما عمر دخل حياتك
زينه : ايوة! بدأت استوعب ان عمرك ما هتتغير وان حتي انت لو بتحبني ف انا مش عيزاك! عمرنا ما كنا هنبقي لبعض يا إسلام، انا كان عندي بالظبط اختيارين، ياهعمل حاجه ف نفسي بسببك يا اني اشوف حياتي واعيش! وانا اختارت الطريق التاني بمساعدة عمر، ولو يتعاد بيا الزمن عمري ما هقبل اضيع السنين دي كلها معاك انا حقيقي ندمانه! كان هيجي يوم ويفيض بيا سواء ده كان ب عمر او من غيرو
إسلام : زينه انا بحبك ومستعد اعمل اي حاجه عشان تكوني ليا!
زينه : متأخره اوي الجمله دي يا إسلام، غير اني مخطوبه لاكتر حد حبيتو الا اني بكرهك يا إسلام ومش عوزاك، انت بني ادم مريض، ابعد عني بمرضك بحياتك بقرفك وسيبني ف حالي
( تقوم زينه وتمشي بضيق وتدمع علي ندمها انها ضيعت كل السنين دي مع واحد شبهو، يفضل إسلام باصص عليها بحقد وحزن وندم وحيره، تمشي زينه وتقع منها كام دمعه وهي ماشيه تمسحهم وتردد في خنقه )
زينه : انت غبي يا إسلام غبي!💔
( وتفضل تعيط غصب عنها تحس انها مش عارفه تفكر في حاجه تركب وتروح في طريقها للعياده بتاعت عمر، قاعد عمر ومعاه حاله ويخلصها يلاقي حنان دخلالو )
عمر : كوباية قهوه يا حنون عشان صدعت جامد
حنان : لا هما تقريبًا هيبقو كوبايتين قهوه، زينه مستنياك بره
عمر : بتهزري
( يقوم عمر بسرعه من مكانو ويطلع يلاقي زينه قاعده بتعيط اول ما تشوفو تجري عليه تحضنو، يستغرب عمر من عياطها ويشد عليها في الحضن اكتر ويطبطب عليها ويمسح علي شعرها )
عمر : اهدي بس اهدي يا زينه في ايه يا حبيبي مالِك؟
( تفضل زينه تعيط بحرقه في حضن عمر وتعدي دقايق علي نفس الحال لغاية ما تهدي وتبطل عياط يبعد عمر عنها ويحاوط وشها بكفوفو ويبص في عنيها بزعل )
عمر : هديتي؟
( تهز زينه راسها ب اه )
عمر : انتِ كويسه طب حد حصلو حاجه؟
( تهز راسها ب لا وتمسح اخر دمعه ف عينها يقرب منها عمر تاني ويبوس راسها ويمسك ايدها ويبصلها بحنيه )
عمر : تعالي ندخل نقعد شوية حنان هتعملنا قهوه تهدي كده وتفهميني في ايه
زينه : حاضر
( يبتسم عمر ويدخلو سوا اوضة المكتب، تقعد زينه ع الكرسي ويقعد عمر قصادها ويمسك ايدها تعدي ثواني وتدخل حنان بالقهوه وتطلع علي طول عشان تسيبهم براحتهم، تحكي زينه لعمر علي كل اللي حصل لكن من غير ما تقول برضو انو إسلام، بيسمعها عمر وبيغلي من جواه والضيق باين علي وشو بس بيحاول يتمالك اعصابو لانو كان الدكتور بتاعها قبل ما يبقي حبيبها وخطيبها )
زينه : مش سايبني في حالي انا ماصدقت بقيت مبسوطه ومرتاحه جاي دلوقتِ يقولي انو بيحبني، لما هو بيحبني عمل فيا كل ده ليه ودمرني ليه بالشكل ده؟ ليه لما بدأت اعيش جاي يضايقني تاني؟
( يسكت عمر شوية وبعدين يمسح وشو ويتكلم بهدوء )
عمر : انا حاليًا عشان ارد عليكِ لازم ارد عليكِ بشخصيتين يا زينه، شخصية دكتور عمر هتقولك أن زعلك ده نتيجة الضغط ونتيجة انو راجع وندمان في الوقت الغلط، وشخصية عمر خطيبك اللي بيحبك هيقولك حاولي ب اي شكل تقطعي اي حاجه ممكن تخليه يتواصل معاكِ، مافيش داعي أن يفضل بينكو حاجه لان ولا انتِ كنتِ بتعتبريه اخوكِ ولا هو عمرو شافك اختو
زينه : انا نهيت معاه كل حاجه وقولتلو ميحاولش يوصلي خالص ولا يكلمني تاني، وحقيقي لو فكر يكلمني تاني هزعلو جامد
( يفضل عمر ساكت والضيق باين علي وشو تقرب زينه منو وتبتسم براحه )
زينه : عمري ما حبيت حد ادك، ولا حاجه في الدنيا تقدر تشوش علي حبي ليك انت كل حاجه ليا ياعمر، انا من قلبي ندمانه علي كل المده اللي قضيتها مع الحيوان ده واستهلكت طاقتي، لكن طاقتي متجددتش غير بيك ومعاك ياعمر، قولتلي مره ان الحب اللي بيريح صاحبو هو اللي فيه القلب والعقل متفقين، وانا قلبي وعقلي وروحي متفقين عليك يا عمر♥
( يبتسم عمر بهدوء وراحه ويبوس ايدها ويبص في عنيها )
عمر : ربنا ما يحرمني منك ابدًا يا زينه
زينه : ولا منك يا عمر♥
( يعدي الوقت ويطلع عمر وزينه ويركبو سوا عشان يروحها )
عمر : وانتِ بقي جيتي كل ده لوحدك
زينه : كنت محتاجالك، مترددتش ابدًا اني احكيلك رغم أن اكيد هتخرج من كلامي كام كلمه تضايقك، بس انت ملجأي، ماليش غيرك ومش عاوزة غيرك
( يبتسم عمر ويبصلها بحب وامتنان، يوصلها علي البيت ويقعد يشرب معاهم شاي ويقفو شوية في البلكونه )
عمر : فرح حنان قرب ومحلفاني ميت يامين احضر انا وانتِ
زينه : نحضر اكيد ربنا يسعدها يارب
عمر : بس مش كده بس، صممت ان الفوتوجرافر اللي هيعملها سيشن فرحها يكون حد شاطر جدًا ومضمون وتكون كل الناس واثقه فيه و..
زينه : لا لا مش لدرجة فرح متهزرش يا عمر
عمر : محدش غيرك هيعمل السيشن ده، انا واثق انك هتبدعي فيه كعادتك يا زينه
زينه : بس انا قلقانه
عمر : انا مش باخد رأيك اصلًا انا قررت خلاص
زينه : ده مش عدل علي فكره 😂
عمر : والله اسمعي كلامي، انتِ كل مره بتثبتي نجاحك اكتر من المره اللي قبلها، وكل المرات الجايه هتكون احسن واحسن المهم نتشجع ونكمل خطواتنا منوقفش عشان خايفين، لو فضلتي خايفه مش هتتقدمي ولا خطوة
زينه : صح معاك حق
عمر : حكيم انا ها
زينه : طول عمرك يا فيلسوف😂
( يضحك عمر جامد ويحط دراعو علي كتفها ويضمها ليه ويبوس راسها ويفضلو واقفين، تحس زينه بإسلام واقف وفعلًا تلاقيه واقف وباصصلهم بحقد وغل مختلطين بزعل وندم )
زينه : تعالي ندخل شوية يا عمر
عمر : ليه الوقفه هنا اريح
زينه : كنت سامعه صوت مروان وكان عايز يقعد معاك شوية قبل ما تمشي
( يسمع عمر كلامها ويدخل وتدخل هي كمان وراه، ويدخل إسلام يقعد علي سريرو وساكت وباصص في الفراغ، تدخل عليه امو تدمع وتقرب منو وتحاوط خدو بكفها )
هبه : انا قلقانه عليك يابني مش عارفه ايه اللي جرالك كده مره واحده
( يفضل إسلام ساكت )
هبه : طب يا حبيبي احكيلي فهمني كلمني فضفضلي اعمل اي حاجه غير انك تفضل علي الحاله دي، خسيت النص ف وقت قصير ووشك بقي شاحب وتحت عيونك اسود جامد، قاعد ديمًا في الضلمه وبتسهر كتير وبقيت بتدخن!
( يسحب إسلام ايديها من علي وشو ويبعد عنها شوية )
هبه : إسلام انت لو فضلت ع الحاله دي كتير انا كده هضطر اوديك لمُعالج نفسي!
( يبص إسلام لامو وتفضل الجمله تتردد في دماغو كتير، كتير اوي.....)