Morte Tranquilla2: Perdita Moderna

6

Тэнгэр бүүдийчхээд сааралтаж суунагласан үүлсээс бороо дуслуулж дийлэхгүй байсан. Бушуухан асгаруулж, тэгээд гунигаа нимгэлсэн үүлс хөнгөрвөл үдэн явуулаад тэргэл сар, түмэн оддоор түнэр харанхуйг гэрэлтүүлэх гэсэн юм. Гэвч үүлс хөнгөрч бороо асгаруулаагүй. Тэнгэр ердөө л бүүдгэр байсан, маш бүүдгэр.

Үүлний өнгөтэй адил утаа агаарт уусан шингэнэ. Тамхины үзүүрт ассан цог бага багаар цаашлан үнс газарт нуран унахдаа халтардаж хуучирсан даавуун гуталны дээр будрав. Яг л цас шиг, гэхдээ халуун. Балетын хөнгөн гутал дорхноо шатаж тэрүүхэн тэндээ цагираглан цоорлоо. Тэгээд шарх, шалбархай дутаагүй хөхөрсөн арьсанд өнгө нэмж хорсгоно.

" Дараагийн жүжгийн тов гарсан. Энэ удаа бид Жизелийг шинэчлэн хүргэнэ. Чамайг дахин Жон гэр бүлийн бахархлыг батлан харуулна гэж найдаж байгаа шүү! "

Үёны чихэнд эцгийнх нь тушаал давтагдан сонсогдох ба тэр үүнд тийм ч таатай хандсангүй. Үргэлж л тийм байсан. Тэр бэлтгэл хийх үедээ хоёр хөлнийх нь шагай хавдаж хамаг цус нь хурууных нь үзүүрт цуглараад хүрэх төдийд бутраад уначих хэврэг хумснуудаа хэрхэн час хийж өвдөхийг мэдэрдэг. Тэгээд өөрийгөө байх ёсгүй газартаа байгаагаа ойлгоно, гэсэн ч явахыг хүсэхгүй гэж зүрх нь тархиа зэмлэхийг сонсоно.

Lacrime di mare түүнд асар их нэр хүндийг авчирч өгсөн. Дэлхий нийтийн анхааралд өртөхөд ердөө хоёр өдөр л болсон. Тэр жүжгээ тоглоод 48 цагийн дотор л сонгодог урлагийн том ярианы сэдэв болоод зогсохгүй Солонгосын үндэсний театр ерөнхийлөгчөөс маш их талархал болоод итгэл найдварыг хүлээн авсан юм. Тиймээс л дараагийн жүжгийн тов асар хурдан шийдэгдсэн. Тэдний төсөв урьд хойчид байгаагүй богино хугацаанд бүрдээд зогсохгүй цалин нь ч хангалттай их хэмжээгээр нэмэгдсэн нь Үёныг инээд алдахад хүргэсэн юм. Нэр алдар тийм хүчтэй аж.

Үён ганц л зүйлд маш их талархсан нь Комаки балетын гэрээт жүжигчин болсон явдал. Тэр энэ тухайгаа Санд хэлээгүй байгаа ч түүнийг аль хэдийн мэдсэн гэдэгт итгэлтэй байсан юм. Хэдийгээр түр хугацааны гэрээ боловч энэ хугацаанд аз таарвал тэр Чүэ Сантай нэг тайзан дээр гарах болно.

Тамхины цогонд түлэгдсэн хөлнөөсөө илүү гутландаа санаа зовох залуу ийм байдалтай хэрхэн бэлтгэл рүүгээ орохоо бодно. Өнөөдөр бэлтгэлийг ахалж байгаа багш нэлээд хатуугаас гадна түүнд гойд анхаардгын хувьд гутлыг нь харах л юм бол тамхи татдагыг нь мэдчихнэ. Тэгвэл тэр эцэг эхдээ чангахан донгодуулах байх.