كتبدا قصتنا مع بطلتنا (نورهان) لي فايقة مع النبوري مع الخمسة كتصاوب الفطور ليها و لختها الصغيرة فدارهم لي صغيرة و عادية جات فواحد الحي لي نوعا ما فقير فيه الناس مختلطة كاينين ناس لي من الطبقة الوسطى لي معندهومش و ماخصهمش و كاينين الناس لي مقاتلة مع الزمان على طرف ديال الخبز بكل ما تحمل الكلمة من معنى بحال البطلة ديالنا " نورهان" هي واحد البنت لي فعمرها تمنطاش العام و نقدرو نوصفوها بانها بيضاء اللون و شعرها كحل ولكن جمالها كلو كيتختاصر فعيونها الكبار و لي لونهم بني عسلي و فيهم الشفار بزاف مشاء الله اما بالنسبة للطول ديالها فهي ما طويلة ما قصيرة و عامرة شوية و عندها كلشي فبلاصتو ربي خلقها آية من الجمال ولكن للاسف الجمال ديالها مقدرش يبدل الواقع البشع ديالها بحيث انها واخا هي فقط بعمر الزهور عايشة داكشي لي مكتعيشوش مرأة فالخمسينيات ديالها هازة هموم كبر منها فالعمر بزاف ولكن هادشي ما أثرش نهائيا على جمالها الي كيريح العين بمجرد الشوفة فوجهها مقبولة و كلشي عزيزة عليه اما شخصيتها البشوشة و ابتسامتها لي مكتفارقش وجهها واخا كترة الهموم واخا تكون واصلة فيها العضم و اخلاقها تبارك الله مزيانين واخا هي لي ربات راسها براسها و انا غنقول ليكم علاش... عايشة مع راجل مها لان مها ماتت عامين هادي فاش كانت كتولد بنتها الصغيرة لي سميتها " ملاك" و من داك الوقت و البطلة ديالنا تحملات مسؤولية كبر منها و بوحدها لانه بكل بساطة زوج أمها (حميد) ماعندوش سوق فيهم كيضل سكران و كل ليلة كيجي فليل يبدا يغوت و يهجج الدار و البطلة ديالنا صابرة عليه لأنه بكل بساطه ماعندها فين تمشي و هي بنت تمنطاش العام ! و معاها طفلة فعمرها سنتين فقط.
فنفس الحي ولكن فمنزل شوية بعيد على دار البطلة ديالنا كاينة واحد العائلة كتكون من ام و اب ما كبارش بزاف فالسن (سي حمد) و (لا خديجة) و ولدهم الوحيد (ياسين) لي تبارك الله ربي عطاه الجمال فالوجه و الجسد اشمنك يا طولة و اشمنك يا تبوديرة و اشمنك يا شوفه عندو مشاء الله واحد الشخصية كتخطف القلب لاي واحد عرفو او عاشرو اما الا شفتيه من بعيد غادي تفضل انك متهضرش معاه بكثرة الصرامة لي كتبان على وجهو اما الا تعصب فراه حتا واليديه لي اقرب الناس ليه مكيقدروش يبردوه كلشي كيتاقي شرو.. كانت كتبان فيه علامات ديال الروجولة من صغرو الهواية ديالو هي الملاكمة كان من صغرو ديما مخاصم و مطايف ديما جايب التبرية لدارهم حتا لواحد النهار سيحمد طلع ليه هادشي فراسو و دخلو لواحد الصال يتريني فيها البوكسينغ بما انه عنيف و كيميل لهاد الرياضة و فنفس الوقت يخرج الطاقة السلبية ديالو تماك، و هذا احسن قرار خداه الاب ديال البطل ديالنا. و مع الوقت كبر ياسين و كبر معاه العنف ديالو و كبر معاه الحلم ديال انه يحترف فهاد الرياضة مع العلم انه راه محترف على مستوى المغرب و خدا شحال من مرة بطل المغرب فيها و عندو بزاف ديال الجوائز فيها ولكن طموحو اكبر من هادشي بزاف فهو كيطمح انه يحترف فاوروبا و يكون معروف عالميا .
ياسين غالبا مكيعمرش مع دارهم بزاف لانه كيف قلت هو محترف فالمغرب يعني كيكونو عندو بزاف ديال المباريات فمدن اخرين و حتا التدريبات بعض المرات كيطلبو من السفر فلذلك كيشوف عائلتو غي مرة مرة اغلب الوقت كيهضر معاهم غي فالتيليفون.
نرجعو لبطلتنا لي ناضت الصباح بكري تصاوب الفطور و حتا لغدا لختها الصغيرة بحكم انها النهار كلو كتخدم كتخلي ختها فواحد الحضانة ف خاصها تخلي ليها ماكلتها ديال النهار كلو، لمهم سالات نورهان و جمعات ليها كاع لي غيخص ختها فواحد الصاك و خرجات للصالة باش تجمع الدار قبل ما تخرج تدي ختها لحضانة و تدوز ديريكت لخدمتها ولكن لقات السكايري ديال راجل امها حميد ناعس على السداري و كلا رجل فين لايحها و الصالون خانز بريحة الشراب و القراعي ديال الشراب غي مشتتثن هما و البقايا ديال الكارو و مالقات ما تجمع حيت هادشي الا بغات تجمعو غيخصها نص نهار و هي زربانة خلاتو هكاك هزات ساروتها و لبسات لختها جاكيتها و خرجات غي وصلات قدام الحضانة و هي تلقاها مسدودة مافهمتاش علاش و دقات عليهم قالو ليها بلي مولات الحضانة راه جاها شي غرض ضروري تقضيه و سافرات لبرا غي البارح
نورهان: و علاش لي ماخبراتناش راه غيكونو الناس معولين يحطو ولادهم هنا
البنت : وا اختي اش غنقوليك انا راه غي حطاتني هنا باش نوصل ليكم الخبر مابيدي ما ندير
نورهان بقات كتشوف فيها و مالقات ما تقول و فنفس الوقت مشا عليها الحال و من المستحيل تخلي ملاك فالدار مع داك السكايري تخافو لا يغتاصبها ولا يقتلها ولا يبيعها لشي حد، فاضطرات انها تمشي لعند لا خديجة (جارتها) تطلب منها تبقا عندها ملاك غي اليوم على ما تلقا شي حضانة آخرا تكون قريبة و رخيصة شوية و مشات لعندها كتدق عليها شوية و حلات ليها لاخديجة كتلوي ف زيفها على راسها
لا خديجة: بنتي نورهان ياك لباس ابنتي مالكي ياكما واقعة شي حاجة ( قالت ليها هكا حيت هداك السكايري ديال حميد موالف كيجي مرة مرة سكران و يضرب نورهان ولا كيجري عليها فنص الليل هي و ختها)
نورهان: لا ا خالتي خديجة، غير هو دب كنت داية ملاك للحضانة كي العادة باش نمشي للخدمة ولكن قالو ليا بلي مولاتها مشات لبرا على غفلة و دب سادين و مالقيت فين نخلي مالاك و ماقدرتش نقولها لشي واحد اخور و حيت مكنتيق فحتا شي واحد من غيرك اخالتي فالله يرحم الواليدين خليها عندك غي اليوما على ما نلقا ليها فالليل على شي حضانة آخرا و سمحي ليا عفاك الا تقلت عليك راه والله ما عندي الوجه لي نطلبها منك ولكن والله مالقيت شي حل اخور
لا خديجة:( خلاتها حتا سالات هضرتها) طلقي طلقي البنت لهنا قاليك تقلتي عليا انا راه بالفرحات عليا لي دقيتي عليا انا من وسط هاد الجيران كلهم اراي ليا ديك الكتيكيتة راكم بحال بناتي منسمعش منك هاد الهضرة ا نورهان الله يرضي عليك ديال تقلتي عليا ، متخافي عليها والو سيري لخدمتك مهنية ابنتي
نورهان مسكينة كتنهج : شكرا اخالتي بزاف والله مانسا ليك خيرك ( عطاتها البنت و باستها) حبوبتي هاهي خالتي خديجة اتقابلك اليوما غي شوية ونجي اكبيدة يلاه مديريش الضسارات صافي ( و باستها و ودعات لا خديجة و مشات كتجري باش توصل شوية بكري واخا هي عارفة راسها تعطلات)
وصلات للاوطيل سانك اطوال لي خدامة فيه ك فام د ميناج و جاية كتجري و كتسلت دخلات من الباب ديال الخدامة باش متشوفهاش الشاف د سيغفيس باش ما تصبنهاش حيت مكتحملهاش كون لقات تجري عليها اليوم قبل من غداا و مشات بدلات حوايجها لي كانو عبارة عن كسوة فالكحل واصلة حتا لنص فخاضها و صباط فالكحل أنيق و بابيون فالبيض جيهة عنقها و واحد البوني فوق راسها حتا هو كحل و فيه خط فالبيض اللبسة واخا كانت جد بسيطة و انها غي مجرد زي ديال العمل الا انه كان كيجي مع بطلتنا زوين لان نورهان مشاء الله ربي رزقها جسد ممشوق و كل مفاتنها كلنت بارزة كانت عاطية للعين كيفما كنقولو لي شافها يقول بسم الله عليها و هي مكانتش مرتاحة فداك الزي بزاف لانه كان عندها واحد الطرماحة تبارك الله هههه و ديك اللبسة مزيرة و مبينا ليها فصالتها زائد قصيرة و كانت كتثير الانتباه و هذا هو تماما لي مخلي الشافة ديالها متحملهاش حاسداها على داكشي لي عطاها الله و هي ماعطاهش ليها مسكينة هههه.
طلعات نورهان تبدا خدمتها و فيديها لي كارط ديال البيبان ديال لي شومبغ لي غادي تنظفهم و تجمعهم ملي سالاتهم نزلات و هي تلاقا بديك الشيبة العاصية تورية ( الشاف د سيغفيس): فين اختي هاد التعطيلة كلها سحابليك واش هادا الاوطيل ديال باك ولا شنو تجي غي وقتما قالها ليك راسك ؟
نورهان: سمحي ليا ا مدام والله الا غي لقيت الحضا...
تورية قاطعاتها فوسط هضرتها: ماتصدعينيش تاني بديك الكاسيطة ديالك نتي ديما معطلة انا مشغليش فضروفك و داك الطنز ديالك انا كنعرف الوقت هو الوقت ولا خرجي خلي بلاصتك لشي حد آخر
نورهان حدرات راسها : واخا ا مدام سمحي ليا اخر مرة
دازت تورية من بعد ما خنزرات فيها و هي تعاود ترجع
تورية : سيري دب لعند لا غيسيبسيون ( الاستقبال) يعطيوك لاكارط ديال السويت نيميغو سانك ( الجناح رقم خمسة) باش تنضفيه و ديري خدمتك مزيان
قالت هضرتها و زادت فحالها
مشات نورهان على سعدها و وعدها و هي فقلبها غصة على هاد التصبينة لي كتصبنها كل مرة هاد الشيبة العاصية و هي ماشي لخاطرها تعطل راه الظروف لي أقوى منها خدات من كريم الدري لي خدام فالاستقبال الكارط و طلعات تبدا خدمتها و هي كتفكر فحياتها لي ضاعت فرمشة عين و فشبابها لي كضيع هنا و فالمسؤوليات لي كبر منها و فقرايتها لي ضاعت لانها خرجات منها من بعد ما مات ماماها فاش كانت عندها سطاش العام و كانت كتقرا ديك الساعة فالسانكيام كانت كتقرا مزيان واخا الظروف كانت قاسحة عليها ولكن من بعد وفاة الام ديالها عرفات بلي مبقاش لي يطاكي عليها الزمان ولو غي شوية و انها بقات بوحدها فهاد الحياة لا عائلة لا حباب لا واليدين لا صحاب كاينة غي هي و اختها ورب العالمين فوق منهم فقدرات تعيش شوية بفلوس الدهب لي خلات ليها مها و مفخبارش حميد و قابلات ختها و كانت كتعاونها لا خديجة هي لي وراتها كيفاش تربي التربية فاش كيكون باقي صغير و عاوناتها فبزاف ديال الحوايج حتا نورهان دارت تمنطاش و خرجات تخذم حيت من قبل مكانش عندها كي دير كانت قاصر و كانت ختها صغيرة بزاف.. بقات نورهان كتقاد الجناح لي كان كبير و الشخص لي ناعس فيه كان مرون نيت حوايجو غي مشتتين فكاع البلايص و نورهان عيات و هي كتجمع فحوايجو لي عرفات من خلالهم ان هاذ الكليان لي نازل فهاد الجناح شخص رياضي و غالبا ايكون ملاكم حيت لقات الماتريال ديال الملاكمة فالبالكون. لمهم سالات خدمتها خلات الجناح كيشعل و خرجات مع الوقت ديال البوز د الغدا نيشان هبطات مشات ل صال ديال الماكلة و جبدات كتاكل ماكلتها لي جابت معاها من الدار حيت ماكلة البيفي ديال البيرسونيل فالاوطيل مكتعجبهاش كتجيها باسلة شوية حتا كتجي لعندها واحد البنت خدامة معاها كتجري
الهام :
أنت تقرأ
الملاكِم.. ؛ The Boxer
Romanceالسلام عليكم البنات، هادي هي اول قصة ليا نكتبها من بعد بزااف ديال القصص لي كنت مألفاهم غي فعقلي ههه كنتمنى تعجبكم ❤️. هاد القصة غادي تكون شاملة بزاف ديال الحوايج الا انه الواقع كيغطي فيها واحد النسبة لي كبيرة بزاف و من غير هكا راه فيها فن من كل طرف...
