نمشيو عند ياسين لي عقله مخربق هاد اليامات او بالأحرى مخربق من نهار شاف نورهان اول مرة، كيحاول يتدرب حيت غدا عندو الكومبا و خاصه يكون واجد...
اما نورهان لي بدا شوية بشوية كتقتنع بالفكرة ديال انها خاصها تخلى على حب قلبها و انها تبدا حياة جديدة بعيدة على حميد و ياسين حيت هاد جوج هما اكثر الاشخاص كيعدبوها فحياتها، فاقت فالصباح بكري و هي مستعدة لخدمتها ،ناضت غسلات وجهها و مشطات شعرها و لبسات واحد اليونيفورم ديجا كان عطاه ليها محسن فاش قبلها انها تخدم معاهم و لي كان عبارة على صاية حدها الركبة فالكحل و شوميز بيضة و بوني و صباط طالون كحل، جاتها اليونيفورم كتحمق، شافت راسها فالمراية و عجبها الحال حيت بدات كتحس براسها قوية مرة اخرا، قررت ماديرش المكياج يكفي بركا غي داك التوني لي لابسة مخليها تبان غزاالة واخا بسيط جدا عطاها رونق زوين، خرجات من داك البيت، و طلعات للفوق كتقلب على البيرو ديال سي محسن حيت معقلاتش عليه فين جا...
واحد البنت تماك كانت غادية تشوف سي محسن علي قبل شي شغال حتا كتبان ليها نورهان كدور من مكتب ل مكتب بحال الا تالفة، وقفاتها و سولاتها : مالكي اختي تلفانة واش كتقلبي على شي واحد؟
نورهان : اه اختي كنقلب على البيرو تاع سي محسن
البنت: و علاه كاين شي واحد خدام هنا مكيعرفش البيرو تاع موسيو محسن!
نورهان و هي كتحك فشعرها باحراج : انا! حيت انا يلاه جيت البارح و معقلتش عليه فين جا، الا كان ممكن توريه ليا عفاك؟
البنت بسرور: اييه مرحبا، يلاه معايا انا اصلا غادية لعندو دبا
نورهان تابعاها : واخا شكرا بزاف اختي
البنت: اشنو سميتك بعدا ؟
نورهان : انا نورهان و نتي؟
نِهاد : انا نهاد، متشرفين الغزالة، غتخدمي هنا فام د ميناج؟
نورهان : ليا الشرف اختي، وي ان شاء الله هه و نتي فاش خدامة؟
نهاد : هاد الزين كلو و غيخدم فام د ميناج و الله الا حشومة هههه غي كنضحك معاك الغزالة الخدمة ماشي عيب مدام كتجيبيهم بعرق كتافك، و انا خدامة سرباية فالبار ديال لوطيل
نورهان : اه بصح الخدمة ماشي عيب و حتا نتي الله يسهل عليك
نهاد كضحك: ياربي يسهل عليا الله نولي انا هي المنادجر ديال داك البار هههههههه
نورهان : هههههههه الله يسهل عليك و تحيدي كاع من خدمة البار من الأساس
نهاد : لا لا اختي غي خليني فيه انا عاجبني الحال تماك هههههههه
نورهان : اييه صافي حتا هادا نظر هههههههه
نهاد عجباتها بزاف نورهان و حسات بيها قريبة لشخصيتها و بغات تعرف عليها كتر و لكن لقات راسها وصلات ل بيرو تاع سي محسن
نهاد : ها حنا وصلنا ا نورهان عقلي على الطريق مرة اخرا مغاديش نجيبك لعنده ههه
نورهان : صافي عقلت هه شكرا
دقات نهاد عاد دخلو بجوج لعندو
نورهان بابتسامة بريئة : صباح الخير موسيو محسن
نهاد حتى هي بدورها : صباح الخير سي محسن كي صحبتي مزيان كلشي بيخير؟
محسن : صباح النور البنات، الحمد لله كلشي مزيان، جابك الله ا نهاد نيت باش تاخدي معاك نورهان توريها لوطيل و تعرفيها على البنات لاخرين و تعطيها كاع داكشي لي غيخصها
نهاد : اييه اسي محسن ولكن هي فين غتخدم بالضبط؟
محسن : اه بصح، فين بغيتي تخدمي ا نورهان؟ ف لي شومبغ ( الغرف) ولا فال Spa ولا تخدمي فالبار؟
نورهان بتوتر : انا معنديش مشكل اسي محسن لي بغيتي..
نطقات نهاد بزربة : ايوا صافي اسي محسن غي صيفطها معايا البار احسن باش نيت تماك نقابلها و نوريها كلشي اصلا خاصنا تماك فام د ميناج
سي محسن : ههه زعما نتي اشنيولة عزيز عليك تستغلي الظروف
نهاد : هههههه ايوا اسي محسن راك عارفني كون ما جاتني ضريفة و معقولة منديهاش معايا للبار كون خليتها تمشي تحاك مع دوك البايرات ف لي شومبغ (زعما البنات لي خدامين ف خدمة الغرف)
نورهان غي كتبتسم ما عارفة والو ههه
محسن : هههه يلاه صافي سيري معاها انورهان توريك فين غتخدمي من هنا للقدام
أنت تقرأ
الملاكِم.. ؛ The Boxer
Romanceالسلام عليكم البنات، هادي هي اول قصة ليا نكتبها من بعد بزااف ديال القصص لي كنت مألفاهم غي فعقلي ههه كنتمنى تعجبكم ❤️. هاد القصة غادي تكون شاملة بزاف ديال الحوايج الا انه الواقع كيغطي فيها واحد النسبة لي كبيرة بزاف و من غير هكا راه فيها فن من كل طرف...
