الملاكِم.. ؛ The Boxer

Part 3°

بارت 3

خرجات نورهان من الطوموبيل الواعرة  ديال ياسين و مشات كتدق على لا خديجة و هو ينزل حتا ياسين و قاليها : هادي هي داركم؟
قالت ليه : علاش كتسول
ما جا فين ينطق و هي تحل لاخديجة و شافت فنورهان  عينيها منفوخين بالبكا
لا خديجة مخلوعة : مالكي ابنتي ياشي باس مكاين مالكي صفرة هكا و عينيك منفوخين اش طرا ليك
نورهان : والو اخالتي دب نجي نعاود ليك من بعد، ياك ملاك لباس عليها ياكما صدعاتك  ودارت البسالات؟
لا خديجة : دخلي ابنتي الله يرضي عليك عفاك دخلي شربي غي كاس ديال الما راه ملاك ناعسة دب عيات باللعب مع سي حمد و نعسات دب
نورهان : لا ا خالتي والله بلا منصدعك غي جيبيها ليا راه عييتك معايا ليوما غي سمحي ليا بزاف
لا خديجة : لواه ابنتي والله حتا تدخلي و حلفت ما كاين بو صداع هذا راه واجب عليا نتي ابنتي راه كبرتي قدام عينيا ربي لي عالم بمعزتك عندي نتي و ملاك دخلي تعشاي معانا عتقي الروح بعدا و ديك الساعة سيري رتاحي فداركم
نورهان : واخا ا اخالتي انا غي نقول بسلامة لهاد السيد لي وصلني عندك و ندخل
يلاه ضارت نورهان باش تقول لياسين لي كان بعيد شوية على الباب متكي على طوموبيلتو و مربع يديه كيشوف فيها هي عاطياه بالضهر و كتهضر مع الام ديالو لي توحش يسمع صوتها و حتا لا خديجة خرجات شوية طل على هاد السيد لي وصلها حتا كتفاجئ بولدها و كبيدتها
لا خديجة : ياسيييين ولدي  اش هاد المفاجأة لولدي و بدات كتجري باش تنعقو و تلاحت عليه و كتقول ليه حرام عليك اولدي ما علمتينا ما خبرتينا غي قولها لينا اولدي نوجدو ليك و..
قاطعها ياسين : الواليدة متبقايش تقولي ليا هكا عفاك كتحسسيني بحالشي ضيف هههع انا راه لي كيهمني ا ميمتي هي نشوفك بيخير نتي و الواليد ما بغيت والو
لا خديجة و هي كتبوس فيها : واخا اكبيدتي واخا منقوليك والو اوليدي ميمتة كتكون بيخير غي فاش كتشوفك دخل اوليدي دخل
نورهان و هي كتشوف هاد المشهد لي واقع قدامها ما فهمات والو مسكينة هههههه
ولكن فنفس الوقت مسكينة بقا قلبها نغزها ملي شافت هاد المنظر ديال الحنان ديال الام لي هي مكتعرف عليه والو حتا ملي كانت الام ديال حية فيقها من شرودها غي لا خديجة لي فرحانة : دخلي ابنتي نورهان قدامك قدام الربح غي جيتي دقيتي عليا و جبتي معاك هاد المفاجأة الله يعطيك الخير
نورهان غي كتبتاسم مزال ما عارفة اش واقع هنا
دخلو كلهم الا نورهان بقات واقفة حدا الباب خلاتهم حتا تسالمو مع سي حمد و هي تعيط ل لاخديجة : عفاك ا خالتي سمحي ليا ربي ما عطيني شي حاجة نلبسها تكون طويلة حيت حشمت ندخل لعند سي حمد بهاد الحوايج ديال الخدمة هكا قصار
لا خديجة زادت كبرات ليها فعينيها : اييه ابنتي يلاه طلعي معايا لفوق نعطيك شي حاجة. من بعد ما عطاتها واحد البيجامة جاتها زوينة مع هي شوية عامرة جاتها كيوت نزلات و لقات لا خديجة كتحط العشا فوق من الطبلة و مشات كتعاونها نورهان و هي حشمانة و جلسو كيتعشاو و حتا من ياسين رد البال بلي مابغاتش تدخل لعند سي حميد بداك اللباس تاع قبيلة و ضرو راسو شنو العلاقة بين عائلتو و بينها هي حيت مافهمش اش كدير هي دب فدارهم و فنفس الوقت مبغاش يحرجها قال حتا تمشي كاع و يوسل مو عليها
لا خديجة : ايوا ابنتي نورهان قولي ليا فين عرفتي ياسين العفيريتة
نورهان : لا لا ا خالتي متفهميش غلط دب هو غي فاش خرجت من الخدمة لقيت راسي معنديش فلوس كافيين للطاكسي و درت اوطوسطوب و وقف ليا هاد الدري سبحان الله و لقيتو غادي لنفس البلاصة ايوا و طرات ديك الصدفة تاع قبيلة
ياسين بقا غي كيشوف فيها كيفاش مبغاتش تقول الحقيقة لواليديه باش ميبقاش فيهم الحال و كبرات فعينيه بزاف
لا خديجة : دب ابنتي لي مكتعرفيش نتي على راسك هو انه نتي مكتعرفيش تكدبي كاع كتبان فوجهك الا كنتي كتكدبي هههههه غي قولي الصراحة ابنتي ماخفتي والو راك بحال بنتي
ياسين : الواليدة خليها دب ترتاح راه داكشي لي داز عليها ليوما صعيب بزاف فالليل ان شاء الله انعاود ليك كيفاش طرا هادشي
نورهان : يلاه اخالتي عفاك فيناهي ملاك نديها تنعس فالدار راه مشا الحال شكرا بزاف على كلشي ا خالتي الله يكتر خيرك
لا خديجة: ايوا لقيتي ليها الحضانة بعدا؟
نورهان فخاطرها الحضانة كنت غنمشي ليها انا نيت هاذ نهار 😂 : لا اخالتي ما بقيتش قلبت اصلا هاد الايام انقابلها راسي حيت مبقيتش خدامة دب
لا خديجة و هي عارفة مزيان المعاناة ديال نورهان : اويلي ابنتي واش جراو عليك ؟؟
نورهان بابتسامة صغيرة: اه ا خالتي ولكن ماشي مشكل الرزاق الله دب نبدا نقلب تاني غدا ان شاء الله، يلاه نخليك اخالتي دب ترتاحي و شكرا بزاف ليك و لسي حمد تاهو الله يكتر خيركم
لا خديجة : واخا ابنتي الله يسر ليك و الله يعاونك وقتما بغيتي شي حاجة جي لعندي راه داري ديما مفتوحة ليك وقتما بغيتي الله يصاوب ليك ابنتي ربي ما يخيبك ابنيتي
ناضت نورهان باست لسي حمد راسو و باست لا خديجة فحنكها و خرجات حتا حبسها صوت ياسين : بلاتي نمشي معاك راه الليل هادا و اراي البنية الصغيرة نهزها عليك
نورهان : لا لا شكرا بلا منعذبك هاهي الدار غي هنا
ياسين ماتسوقش لهضرتها كيلبس جاكيتو و خرج قبل منها : يلاه زيدي، اراي بنتك
نورهان جاها الضحك : علاه انا كاع كنبان كبيرة نقدر نولد بنية قدها؟ ههه هادي راه ختي الصغيرة ماشي بنتي
ياسين : علاه نتي شحال فعمرك
نورهان : تمنطاش
ياسين ضار شاف فيها بصدمة و كمل طريقو ما قال والو
نورهان : ونتا؟
ياسين: خمسة و عشرين
نورهان: خالتي لاخديجة كتبان صغيرة على انها تولد ولد قد هكا تبارك الله
يلاه بغا يجاوبها حتا كيسمعو شي غوات جاي من الدورة و بالضبط من الدار ديال نورهان كان حميد هو لي شارب ماحيا حتا خرج ليه من ودنيه و سكران بيلا و كيغوت و كيسب و الجيران كيطلو عليه و كيضرب فالباب  باش تحل ليه نورهان كيصحاب ليك نورهان كاينة الداخل و مبغاتش تحل ليه 😂
هي غي شافت هاد المنظر و هي تحس بالسخونية طلعات معاها و الخلعة شداتها و حسات بقمة الإحراج حيت حداها ياسين عمرها حشمات من الواقع ديالها حتا لدب حيت حداها شخص بحال ياسين
حميد غي شافها و هو جاي ةيجري قاصدها و كتعتر فجلايلو غي قرب ليها غوتات و زيرات على ختها و عطاتو بالضهر باش الا كان غيضربها طاكي هي على ختها و بدات ختها كتغوت حيت تخلعات من الغوات  كانت نورهان كتسنا تجي فيها شي دقة ولكن ما قاصها والو حيت الوقت لي كان ايضربها فيه حميد شد ليه يديه ياسين و لواها ليه و دفعو طيحو و مع حميد سكران مرخي مع طاح مع نعس 😂 اما هي باقية كترعد بالخلعة و كتسكت ختها و الجيران كيطلو عمر شي واحد فيهم ما تدخل فاش كيكون كيضربها داك السكايري
ياسين بقا كيشوف فيها زعما يلاه دخلي لداركم : يلاه حلي و دخلي فحالك و الا فاق هاد الشماتة متحليش ليه
نورهان علات راسها فيه بحكم فارق الطول بينهم كبير : راه معنديش الساروت كلشي بقا تماك كنت ناوية ندق عليه هو يحل ليا ولكن هاهو دب ناعس حدايا تاهو ماعندوش الساروت بحالي
ياسين: ايوا يلاه رجعي لعند الواليدة ختا لغدا ان شاء الله و نفرعو الباب
نورهان : لا لالا غي سير دب نلقا شي حل
ياسين قاطعها : زيدي بركا من كترة الهضرة اشمن حل غتلقاي
نورهان مبغاتش تقل على لا خديجة حيت هي من النوع لي مكيحملش يكون عالة على شي واحد : لا متخافش انا غاناخد من عند جارتي تيليفون و نضور لخويا نمشي نبات عندو غي سير و متقول لخالتي خديجة والو
ياسين بشك : اييه واخا بلا منزيد نحكر عليك نخليك على خاطرك
مشا رجع كيجري لعند مو كي دخل قال لمو : الواليدة شنو قصة هاد البنت راه لقينا واحذ كيغوت حدا دارهم و سكران كان بغا يضربها كون ما حبستو
لا خديجة باسف : اييه مسكينة ديك البنت شحال كتعاني من صغرها، هذا الجحموم راه راجل مها راه ديما ضاربها و كيجري عليها من الدار هي و ختها واخا هي لي كتخلص الكرا
ياسين تعصب : و داك خوها علاش لي ميديها تعيش معاه و يجمهو خواتاتو من هاد العيشة ديال الدل
لا خديجة : شكون خوها ؟ هي راه ماعندها حتا حد راه كاينة غي هي و ختها ماعندها لا خوها لا باها لا خالها لا سيدي بوزكري
ياسين ناضت ليه التشاشة : و مال ديلمها عالكدوب يلاه دب فاش لقات راسها ناسية الساروت و حتا داك الشماتة ناسي الساروت قالت ليا اتعيط لخويا تمشي تبات عندو
لا خديجة : اويلي راه غي قالت ليك هكاك باش متحكرش عليها تجي لهنا نوض اولدي الله يرضي عليك شوف فيناهي الليل هادا و هي ماعندها فين تمشي اياكلوها غي الذياب لي ساكنين هنا
ناض ياسين كيجري هز لوطو و ديمارا و كيضور فالحي عالله يلقاها فشي بلاصة حتا بانت ليه داخلة لواحذ الجردة تماك غي حداهم نيت و هو يحبس و نزل و الدخان خارج ليه من ودنيه على هاد الكذوب لي كدابت عليه هي كانت غادية و داخلة و خايفة لا تلقا شي حد كاين فيها و كانت ناوية تبقا فايقة ليل كلو حاضية ختها واخا فيها الموت ديال النعاس حيت من النبوري و هي فايقة و داكشي لي داز عليها نهار كلو.. حتا كيوقف عليها ياسين و هو معصب و شاد راسو غي بزز لا يعطيها بشي تصرفيقة على هاد الحالة لي حاطة راسها فيها فبلاصة ما تقبل المساعدة : مال مك نتي على الكذوب شكون هاد خوك ولا الحبس لي غيجي يديك تباتي عندو اش هاد الحالة حاطة فيها راسك زعما مفكرتيش فهاد البنية لا يضربها البرد فهاد الليل مافكرتيش نتي فهاد الدياب لي غيهنشروك فهاد اليل و يديو ليك ختك دوزي لبرهوشة مك قدامي و منسمعش منك شي حرف من الاحسن حيت الا زدتي كدبة آخرا غادي نفرشخك
نورهان خلعها خصوصا فاش هز من عندها ختها الصغيرة بزز و جرها هي من يديها و ورك عليها بكترة الخلعة مقدراتش حتا تقول ليه راه ضريتيني رخي عليا
حل الباب و لاحها و عطاها ختها  تشدها لي ناعسة مسكينة ماعارفا كاع اش طاري حولها و دار ليهم السمطة و داز ركب تاهو و كسيرا فجيهة دارهم  غي وصل لقا لا خديجة كتسناهم...