الملاكِم.. ؛ The Boxer

Part 12°

نورهان بدات كتعاون لا خديجة فتوجاد الغدا على ما فاق سي حمد و ملاك حتا كيوقف عليهم سي حمد و فيديه ملاك الصغيورة و هي فرحانة حيت شافت ختها ما قدتها فرحة، نورهان سلمات على سي حمد بكل احترام و هي حشمانة منو حيت ماعارفهاش فين كانت هاد تلت ايام لي غبرات فيهم، خدات من عندو ملاك لي غي كترطا بغات غي امتا تعنق ختها و كضحك حتا كيبانو ليها سنيناتها الصغيورين و كتنطق باسم نورهان بطريقة طفولية كتضحك،
نورهان هازة ختها و معنقاها بكثرة ما توحشاتها و تبوس فيها : هانا تاني على الزين فايق من النعاس فرحان، توحشتينيش اكبيدة هاه؟ ولفتي خالتي خديجة و عمي سي حمد؟ قالو ليا كاعما سولتي فيا الخوينزة
ملاك غي كتضحك و تقيس بيديتها الصغار وجه ختها الكبيرة كتعبير على الحب و الاشتياق
نورهان : يلاه سيري اكبيدة مع عمي سي حمد خرجو شوية انا عندي ما يدار غي نسالي و نجي نلعب معاك صافي ا حبيبة؟
رجعات ملاك ل سي حمد لي بدورو كيلعب معاها و يشري ليها لي بغات و يعاملها بحال حفيدتو عزات عليه بزاف هو و لا خديجة دخلات ليهم السرور و البهجة للدار، "هادو هما الاطفال ولو ان تربيتهم صعيبة الا انهم هما الروح و البهجة تاع الدار الله يرزق اي مرأة بالذرية الصالحة يارب ❤️".
رجعات نورهان كتقاد الغدا مع لا خديجة و كيهضرو و يتحتتو و يضحكو و لكن نورهان باقي عقلها مرفوع بغات تموت و تعرف ياسين معامن غندو رونديفو و علاش ما ناويش يبات فالدار مبغاتش تسرط ليها كيفاش كيقول ليها نتي ديالي و مع ذلك هو كيخرج فالمواعيد
لا خديجة: نورهان بنتي واش سمعتيني اش قلت ليك؟
نورهان : هاء! نعام اخالتي اش قلتي سمحي ليا سهيت شوية مع العيا
لا خديجة : قلت ليك واش ياسين لي دار ليك هكا فوجهك
نورهان حطت داكشي لي فيديها و تقابلات مع لاخديجة باحراج : هانتي اخالتي انا واعدتك انعاود ليك كلشي و لكن عفاك مبغيتش يكون شي صداع مزال بسببي
لا خديجة : غي دوي ابنتي انا راه عارفاه هو لي دار فيك هادشي عارفاه يديه سابقاه و مكيعقل حتا كيدير بحال هاد الحالة، ولكن كيفما عارفاه عنيف، عارفاه بلي ميضربش شي حد الا ما دارش علاش، واخا هادشي مكيبررش العنف ديالو ولكن دب بغيتك تقولي ليا كلشي من لول عفا بنتي مبغيتك تخبي عليا والو و كوني هانية مغنقول ليه والو.
نورهان ما عارفاش كيفاش تقول ليها القصة بكثرة ماهي محرجة من راسها : دب انا خالتي ديجا قلت ليك بلي حميد كان باغي يتعدا عليا هي نيت فاش هربت و مشيت جلست فواحد الجردة على ما فكرت و قررت انني خاصني نخدم فاي حاجة كيفما بغات تكون باش نقدر نكري و نلقا باش ناكل انا و ملاك ياك؟
لا خديجة بترقب : اييه زيدي
نورهان: دابا انا ديجا عرفت بلي كاين واحد الخدمة فواحد البواط دو نوي ك سرباية و الله اخالتي الا غي سرباية فقططط لا غير
لا خديجة بصدمة : اويلي متقوليش ليا ياسين ساق لخبار لهادشي
نورهان : وا كتررر اخالتي ،ياسين فهمني غلط و باقي ل دابا فاهمني غلط
لا خديجة : علاش اش طرا؟؟
نورهان: انا جاتني واحد الكوموند خاصني نديها لواحد البيت الفوق فين كيكونو قلالين الحيا حاشاك اخالتي و على سعدي و وعدي ديتو ليهم ملي جيت نخرج و نسد الباب كنتلاقا ب ياسين كيقلب عليا
لا خديجة : اويليييييييي على زهرك شحال غزال تبارك الله وا غي ملي خلاك حية ما تقوليها لحد
نورهان: ولكن اخالتي انا ما درت ليه والو و نتي عارفة انا من ديما كنخدم على راسي علاش هاد المرة دار ليا هكا و خسر ليا وجهي وليت نحشم حتا نخرج للزنقة
لا خديجة : واش نتي تعرفي ولدي حسن مني! راه طالع ل باه هكاك داير داك النوع متسنايش منو يعبر على الحب و الاعجاب ديالو بيك بحال كاع الناس، هذاك النوع ابنتي الا مشيتي حتا عجبتيه صافي كتولي ديالو و اي حاجة كتخصك كتولي ديالو يعني غي توقعي منو اكثر الا باقي عاودتي هاد البسالة
نورهان : انا فهمت اخالتي بلي ياسين كيشفق عليا و ما باغيش ليا ديك الطريق ولكن...
لا خديجة : تي اشمن كيشفق عليك اويليييي على هضرة!! وا تي راه باينة الدري مسكين طاح هكا باه كان كيتعامل معايا قبل منتزوجو، راه خضرين ميعرفوش يكونو رومانسيين بزاف عليهم
نورهان : هههههههههههه
لاخديجة تاهي بدات كضخك : ولكن واخا هكاك والله احن من ياسين متلقايش بكثرة ما هو قاسح بكثرة ما حنين فالداخل ديالو و ميخليكش واخا ماعرت اش يطرا
نورهان بدات كتضورها فراسها و عرفات بلي بصح مكدباتش ياسين واخا بعض المرات كيكون همجي و كيقمعها بزاف الا انه ديما كياخد ليها حقها و عمرو خلاها و خرج قلب عليها فنصاصات الليل ولكن واخا ملي لقاها نفخ ليها وجهها بالعصا ولكن الا جينا نشوفو راه غي حيت مبغاش ليها تمشي فديك الطريق و كون شي واحذ آخر عمرو يتسوق ليها.
بعد ما سالاو الغدا و تغداو مع بعضياتهم بدون ياسين طبعا لي كان غايب من الصباح و نورهان كتفكر فين غيكون دابا و معامن، لا خديجة شافت نورهان لي حزينة شوية واخا مكتبينش و اقترحت عليها يخرجوا فالعشية يضورو شوية و نورهان لي وافقات فالبلاصة بغات غي امتا تخرج تفوج شوية حيت الا بقات فالدار غتبقا تفكر غي فياسين
وصلات الستة د العشية ناضو كيوجدوا راسهم باش يخرجوا ،نورهان لبسات جينز فالزرق مغلوق كان مزير مبين ليها لاطاي تاعها و تيشورت ابيض قصير شوية و سبادري بيضا و خلات شعرها مطلوق على طولو لي كان تبارك الله فايت ليها الخصر تاعها، و دارت شوية ديال الميكاب لي كان عبارة عن فاونديشن خفيف غي باش يتضرقو شوية الاثار ديال الضرب لي كانو باقي فوجهها و ايلاينر و عكر خفيف و لبسات ملاك واحد الكسيوة كانت شراتها ليها فعيد ميلادها جاتها كيوت و قادات لختها شعرها على شكل كرينات و خرجات تلاقات مع لاخديجة لي كانت تاهي لابسة مزيان داكشي مستور و محترم و شيك بزاااف
نورهان باعجاب: هاي هاي على خالتي فين كنتي مخبية هاد الزين كلو عليا
لا خديجة : و علاه سحابليك غي نتي لي زوينة ، راه قاليك المثل الا مشا الزين كيبقاو حروفو 😌
نورهان : هههههه وا انا بعدا بان ليا باااقي الزين ما مشا فين هاد الساعة
لا خديجة بغرور : لا راه كنقصد سي حمد هو لي مشا ليه الزين اما انا باقي فيا ههههه
سي حمد سمعها من البيت و جاوبها : اييه الالة غي سيري حتا تجي و نتفاهمو على هاد الهضرة
نورهان : ناري سمعك قفرتيها اخالتي ههه
لا خديجة بهمس : متديش عليه مسكين راه كيغير مني حيت زوينة عليه 😌
نورهان ميتة بالضحك : ههههه يلاه اخالتي نخرجو قبل ما يسمعك تاني و يجي لينا