خرجات نورهان و هي حزينة من الداخل ديالها، نفسيتها مبقاتش متزنة من نهار شافت هاد ايمان و هي كتحس بلي كلشي مبقاش ديالها واخا لاخديجة كتبغي تبين ليها بلي باقي بلاصتها كيفما هي عندها الا انها ملي شافت ايمان لي كانت كتوجد الفطور مع لاخديجة و كيضحكو و يتحدتو، حسات بلي بلاصتها بدات كتزعزع شوية داكشي علاش اصرت على انها تلقا خدمة و ترجع توقف على رجليها و تبعد.. بغات تبعد على ياسين بالخصوص وجودو فحياتها ولات كتحس بيه ضروري ولكن وجودو كيعدبها فحياتها مقدراتش تفهمو غادي يسطيها، كيفاش كيقول ليها بلي هي ديالو فالوقت لي جايب خطيبتو لدارهم و كيعرفها على مو و ناوي يكمل معاها حياتو.. كيفاش يقدر يدير هادشي ولو ميكونش كيبغيها و كيبغيني انا عمرني غنرضا على راسي نكون انا الplan B. يا اما انا بوحدييي يا اما عمرك تحلم ليا نكون ليك.
خرجات نورهان و هي لابسة رسمي و هازة فايديها وراقها و فطريقها للشارع العام باش تاخد طاكسي دازت من قدام دارهم القديمة و لقات الباب محلول و قدام الدار كاين الزبل و الوسخ، ضرها قلبها على حال دارهم لي كانت ديما نقية فاش كانت ساكنة فيها هي ولكن صبرات راسها و كملات طريقها، الماضي كيبقا ماضي مخصناش نضيعو حياتنا فالحزن عليه حيت ما عندنا ما نديرو باش نصلحوه و انما خاصنا نفكرو فسمتقبلنا و نخدمو عليه حيت هو لي فايدينا نبدلوه.
خدات طاكسي وصلها لواحد البلاصة لي فيها بزاف ديال الاوطيلات الكبار و الصغار بقات كضور فيهم من واحد لواحد كتحط السيفي ديالها و كتخرج و هي كطلب الله شي واحد فيهم يعيط ليها حيت محتاجة بزاف لانخا تخدم و توقف على رجليها من جديد واخا هي مكرهاتش تبقا مع عائلة ياسين فالدار لانها حسات بالدفئ العائلي لي كانت محرومة منو حياتها كلها الا ان ماعندهاش بلاصة بيناتهم داكشي علاش من الافضل انها تخرج و تبدا من جديد.
---------------------- عند ياسين لي فاق معطل دوش و نزل باش يفطر
لا خديجة شافتو هابط بشوية عليه من الدروج بمشيتو الرجولية كالعادة : صباح الخير امولاي السلطان كون غي زدتي نعستي مزال
ياسين باس لمو راسها و هو مبتاسم : ياك كنقوليك مع الصباح الوليدة كتري من الابتسامة و نقصي من النكير
سي حمد لي جالس و هاز ملاك كيلعب معاها تقولي بنتو، موجه هضرتو ل لاخديجة : هاهو جا لي كيعرف ليك باش يلاه تسكتي شوية من النكير
لا خديجة : اييه دابا وليتو تحاماو ايوا سري نيت انا لي نوض بكري و نوجد ليكم المسمن و البغرير و ندير ليكم فطور ديال النفس ولكن نتوما ما ديال لس يةبر بيكم كون غي نعست
ياسين :وا لا الوليد هانتا قلقتي لينا لا خديديج وا شوف دابا لي يدير ليك المسمن انا بعدا مكناكلوش هههه
سي حمد : كاينة بنتي نورهان دير ليا احسن من المسمن ديالها
ياسين شاف فمو : فين هي نورهان بعدا؟
لا خديجة بزعف : معرفتش 😑
ياسين قصد الكوزينة يقلب عليها كيلقا ايمان كتخشي فوجهها هادي ضر هادي تنفع
ياسين : غي بشوية عليك راه مغيهربش
ايمان مستمرة فماكلتها : ديها فراسك هادشي راه كناكلو غي فالمغرب ،فاسبانيا والو مكايناش حس البنة
ياسين : معرفتيش فين هي نورهان
ايمان وقفات الماكلة و ناضت مسحات يديها و تقابلات معاها : ياسين نيت بغيت نهضر معاك بخصوص نورهان
ياسين بقلق : ياك لباس مالها فين مشات؟
ايمان : صافي اخويا بركا عليها من هاد التمثيل البنت راه بقات فيا حقك منها راه خديتيه، كنتي باغي تعرف واش كتبغيك و كتغير راك عرفتيها و كلشي عرفها ولكن بركا صافي سير هضر مع البنت و دير خطوة رسمية و خليها تكون معاك
ياسين : هادشي عارفو ا ايمان غي قولي ليا فين مشات
ايمان : الصباح فاقت لقاتني كنوجد الفطور مع عمتي و معجبهاش الحال حسيت بيها كرهاتني فديك اللقطة و من بعد قالت لعمتي اتمشي تخرج تقلب على خدمة باش تخرج تمشي تكري بوحدها.. انا عارفة علاش دارت هكا حيت شافتني خديت ليها بلاصتها و انا مبغيتهاش تحس هكا
ياسين بانفعال : كيفاش تقلب علي خدمة علاه اشنو ناقصها هنا؟؟
لا خديجة لي جات من وراه : ماعرفتي كاع اش خاصها ؟ خاصها تحس بانها عندها قيمة هنا و انك باغيها كيفما هي باغاك ماشي تبقا تعاملها على حسب gانتك
ياسين : واش الوليدة انا لخاطري! ايمان قولي ليها اشنو تابعني مزال فاسبانيا
ايمان : بصح ا عمتي ياسين راه فاش غيمشي لاسبانيا عندو عام كامل و هو غي فواحد البلاصة فين غادي يتدرب مزيان باش ينطلق فمسيرتو فاوروبا، عمتي هادشي راه ماشي اللعب هادي راه خطوة كبيرة ايديرها ياسين فحياتو و انا فاهماه مبغاش يخلي نورهان تعدب معاه و هو مزال مستقبلو مضبب (شافت فياسين) ولكن انا ضد انك تخلي الوضع بينكم هكاك حيت راك عارف قدما بغاتك البنت الا مشافتش منك الاهتمام و الحب المطلوب غادي تخليك و تقلب على لي يبغيها و يقدرها، عالاقل فهمها بلي انني بنت خالك و اختك فالرضاعة و ان هادشي كلو غي تمثيل باش ترتاح حتا هي.
أنت تقرأ
الملاكِم.. ؛ The Boxer
Romanceالسلام عليكم البنات، هادي هي اول قصة ليا نكتبها من بعد بزااف ديال القصص لي كنت مألفاهم غي فعقلي ههه كنتمنى تعجبكم ❤️. هاد القصة غادي تكون شاملة بزاف ديال الحوايج الا انه الواقع كيغطي فيها واحد النسبة لي كبيرة بزاف و من غير هكا راه فيها فن من كل طرف...
