-----------------—------——————
دازت أيام و شهور و سنين على آخر مرة تلاقاو فيها أبطالنا مع بعضهم، و بالضبط دازت اكثر من 3 سنوات، تلاث سنوان لي تغير فيها كلشي، تغيرات حياة أبطالنا و حتى شخصياتهم عرفات تغيير بسيط.. نورهان ديال تمنطاش العام ماشي هي نورهان ديال واحد و عشرين عام، نضجات اكثر و ولات مسؤولة أكثر، حياتها معرفاتش تغيير كبير الا ان شخصيتها ولات قوية، بالسيف حيت لي داز من داكشي لي دازت منو و باقي كدوز منو مستحيل ميوليش قوي و مستعد يواجه الحياة بكل مصاعبها!... نورهان مبقاتش فام د ميناج فالبار ديال الاوطيل و انما ولات سرباية الشي لي خلاها تتطور حالتها المادية شوية عالاقل ولات قادة تكري دار على قد الحال فين تجمع هي و اختها ملاك، ولكن هادشي مكيعنيش ان حالتها النفسية ولات احسن بل ولات اكفس من قبل حيت ولات كتعرض لمضايقات تقريبا يوميا من بعض شي كليان و هاد الشي خاصها تتغاضى عليه و تقبل بيه الا بغات تبقا محافضة على خدمتها لي كتاكل منها و مخلياها عايشة هي و اختها تحت نفس السقف... علاقتها مع لاخديجة؟... ممم علاقة مزيانة كيف كانت من قبل ماتغير، لا خديجة باقي ديك الأم الحنونة لي حنيتها تغطي العالم كله و تشيط، شخصية جد خفيفة على القلب و نورهان كتحماق عليها معتبرها عائلتها لي معندهاش، خصوصا من بعد ما خلات عندها ملاك لمدة عام و نص.. من بعد كاع داكشي لي طرا بين ياسين و نورهان، عمر لاخديجة ما بقات هضرات مع نورهان على ياسين او كذلك نورهان عمرها سولات لا خديجة على ياسين، كيهضرو ف كلشي الا على ياسين! مع العلم نورهان عمرها ما قدرات تنساه شي نهار كل نهار كتفكر فيه و متبعة اخباره الي ولا الصغير و الكبير كيشوفها!
—————————————
على ذكر ياسين،....
أمين " دخل لواحد الصالون فواحد الفيلا كبيرة، ديكورها عصري و غالب عليها اللون الرمادي و الاسود بشكل كبير " : افين العشير، علاش مجيتيش البارح للبلاصة المعلومة؟
ياسين لي تبارك الله ولا كيبان مهيب لواحد الدرجة كتخلي الخصم ديالو يخاف حتا قبل ما يدخل للحلبة هه :كان عندي شي غرض ما نقضي
أمين باستغراب : لي هو؟
ياسين :كنت كنجمع حوايجي
امين بلا مبالاة : ايوا ديك الساعة تجمعهم ليك ديك المرا لي خدامة عندك.. " بعد لحظة استوعب اش سمع" بلاتي!... لاش اتجمع حوايجك علاه فين غادي بالسلامة؟؟
ياسين بابتسامة خفيفة : هه ما غادي فين غي ناوي نزل للمغرب نشوف الواليدة و الواليد ان شاء الله
أمين بصدمة: لاااا متقولهااااش اصاحبي
ياسين : ههه و مالك اصاحبي هكا مصدوم؟ علاه مانعين عليا ندخل للمغرب و مفراسيش!
أمين : لا ولكن غي حيت من بعد داكشي لي طرا آخر مرة فالم...
ياسين قاطعوا بجدية : أمين راه دويت معاك، غادي باش نشوف واليديا و صافي! الا كانت كدور ليك شي حاجة فبالك راه مامنها والو سمعتيني
أمين : وا مانعرف اخويا انا غي قلت زعما..
ياسين: داك الموضوع تسد هادي سنين دبا راه ياسين واحد اخور لي قدامك
أمين دار يديه فوق فمو : صافي هاني ساكت 😑
ياسين : ايوا هاكك! و قول ليا؟ نتا ما باغيش تمشي معايا؟ متوحشتيش عمتك؟
أمين : رجلي على رجلك قالاك مغنمشيش انا اصلا ناوي كاع ندخل للمغرب بمرة مليت اخويا من الشهبات الصفرات توحشت زين بلادي هه
ياسين : هادشي فاش كتفكر نتا داكشي علاش عمرك طفرتيه
_______________________
بقاو دراري ضاحكين مع بعضياتهم و قررو انهم يجيو للمغرب من بعد يومين و ميقولوهت لحتا واحد حتا يفاجؤوا لا خديجة و سي حمد لي سنين هادي ما شافوا ولدهم...
__________________________
بعد يومين، و اخيرا ياسين رجع لوطنه و لدارو و للمكان لي كينتمي ليه، للبلاد لي كانت الانطلاقة ديالو منها، نزلات طيارته الخاصة فالمطار و خرج منها كيتنفس هواء بلاده و هو فرحان و فنفس الوقت قلبه مضيق عليه، شحال من ذكرى دازت من قدامه بمجرد ما خطى أول خطوة فوق ارض المغرب، نفض دوك الذكريات من راسه و هز راسه بكل ثقة و كمل طريقه فاتجاه دار واليديه مباشرة مبقاش قادر مزال يتحمل وحش واليديه
———————-——————-
عند نورهان لي فاقت فالصباح شوية بكري باش تنوض ملاك اختها لي أصبح عندها دبا خمس سنوات، فيقاتها و غسلات ليها وجهها و لبساتها كسيوة و صبيبيط و دارت ليها بابيون فوق راسها و عطاتها تفطر على ما تمشي تجمع ليها محفظتها و تديها للروض للي كتقرا فيه
نورهان : يلاه كولي ا نعاسة نمشي نشوف اش خاصك فديك الشكارة
ملاك فيها الموت د النعاس: وا راه باقي الحال
نورهان بغصب مصطنع : كولي دغيا راه مشا الحال قاليك باقي الحال
ملاك: واخا ولكن اجي كولي معايا عفاك
نورهان بدلع: نجي ناكل معاك الحب نجيي علاش لي مناكلش مع الكبيدة ديالي
ملاك غي كتفرنس حتا كيتسدو ليها عينيها كتولي كيوووت
من بعد ما فطروا بجوج خرجوا قاصدين الروض، دخلات ملاك للروض و رجعات نورهان لدارها من بعد ما تقدات داكشي لي خاصها ،جمعات دار و ستفات داكشي لي تقدات فالثلاجة و باقي عليها الحال باش تمشي للخدمة حيت كتخدم من الخمسة د العشية حتا للجوج د الصباح (خدمة الليل اللي لهلا يعطيها لشي وحدة )، هزات تيليفونها و بقات كدور ف فب و انستا حتا طاح ليها فبالها ياسين و كيف كل مرة كيطيح ليها فبالها كتمشي تقلب على اخباره فالسوشل ميديا، بدات كتقلب حتا كتفاجئ بلي راه جاي للمغرب او بالأحرى جا للمغرب من بعد تلاث سنوات، قلبها تهز و حسات بالرعدة شداتها ،معرفات واش تفرح ولا تبكي ولا تصدم ولا شنو تحس، كلشي تخلط عليها واخا هي عارفة بلي علاقتهم سلات حتا قبل ما تبدا كاع ولكن فالداخل ديالها مكرهاتش تلاقاه و تشوفو مباشرة قدامها...
____________________________
نمشيو عند لا خديجة لي كانت كطيب غداها هي و سي حمد مجمعين فالكوزينة مرة يضحكو مرة يتناكرو مرة يقلبوه صباط و الحياة كتستمر المهم الحب و الاحترام ديما حاضر فعلاقتهم من زمان
أنت تقرأ
الملاكِم.. ؛ The Boxer
Romansالسلام عليكم البنات، هادي هي اول قصة ليا نكتبها من بعد بزااف ديال القصص لي كنت مألفاهم غي فعقلي ههه كنتمنى تعجبكم ❤️. هاد القصة غادي تكون شاملة بزاف ديال الحوايج الا انه الواقع كيغطي فيها واحد النسبة لي كبيرة بزاف و من غير هكا راه فيها فن من كل طرف...
