الملاكِم.. ؛ The Boxer

Part 5°

حلات ليهم لا خديجة و هي ما قاداها فرحة : ولدي ياسين جابك الله لقيتيني فرحانة انعيط ليك تجي تغدا معانا الا ساليتي التدريبات ديالك ( و ضارت شافت ف نورهان و تعجبات من منطرها لي مكانش مرتب بحال قبل ما تمشي ) نورهان مالكي ابنتي ياكما وقعات ليك شي حاجة؟؟؟
نورهان : لا اخالتي ما وقع والو مديريش فبالك ،ياكما عياتك ملاك اخالتي
لا خديجة : لا لا ابنتي بلعكس دخلات علينا الفرحة و ونساتني انا و سيحمد،. ايوا دخلو ما تبقاوش قدام الباب راه...
نورهان قاطعاتها : لا لا اخالتي بلا منزيد نعدبك نعايا غي عطيني ملاك انمشيو للدار راه جبت الساروت
ياسين لي كان حتا دخل للدار و غي سمعها نطقات بهادشي و هو يعاود يرجع و شدها من يديها بزز و دخلها بعنف قدام عينين الام ديالو لي مافهمات والو مسكينة
لا خديجة من بعد ما سدات الباب و تبعتهم بالجرا نطقات بقلق : اويلي ياسين طلق من البنت الله يرضي عليك
ياسين باقي جار نورهان من يديها ولاحها فوق السدادر ديال الصالون : واش نتي ممربياش المرا كتعرض عليك تدخلي لدارها و كتكبري اش هاد قلة الترابي
لا خديجة : اويلي اولدي اش كتقول اشمن اكبر الله يرضي عليك صافي غي خرج شوية حتا نحط الغدا و نعيط عليك عفا ولدي
نورهان : لا اخالتي سمحي ليا عفاك حاشا واش نتكبر على عراضتك غي هو ولدك قاليا بصريح العبارة مبغانيش ندخل لدارهم بهاد الحوايج و فاش بغيت ندير بهضرتو دب كيبزز عليا ندخل دوي معاه اخالتي قوليه يخليني عليه
ياسين: ا لالة متديش على هضرتي انا حشمي غي من المرا قد أمك عرضات عليك خاصك ديري ليها خاطرها (هو كل همو هو تدخل تبدل عليها بعدا عاد ديك الساعة تمشي ماهماتو لا عراضة لا ستة حمص)
لا خديجة كتحاول تلطف الجو واخا ما فهماتش مالهم هادو تلاقاو غي ايام قليلة هادي و ولاو بحال المش مع الفار : صافي صافي عفا ولدي هاهي غتبقا غي سير بدل الساعة باخرا الله يرضي عليك على وجهي
ياسين: لا الواليدة بلا متصدريني انا غنبقا هنا غنطلع لبيتي ( و قبل مايطلع خنزر فيها)
نورهان غي كتشوف فهاد الثور لي كيصعر عليها على ابسط الحوايج ولكن متقدرش تقول شي حاجة ولا تسبو حيت واخا هو السبب فكاع هادشي لي طرا ليها هاد الايام ولكن فالاخير راه عتقها جوج مرات من الحبس و هي ماشي نكارة الخير و كذلك بما انو الام ديالو عزيزة عليها بزاف و ما شافت منها غي الخير قررات انها تبدل حوايجها و تحتارم دارهم واخا هادشي ضرها فقلبها إلى انه راه عندو الصح هما دارهم ناس مأدبين و محافظين شوية و داك اللباس لي كانت لابسة ( التوني ديال خدمتها لي كانت قصيرة) ماشي لائق نهائيا تدخل بيه عندهم
نورهان : خالتي خديجة سمحي لينا على هاد الصداع، بغيت نبدل حوايجي فين جا الحمام؟
لا خديجة لي فهماتها طايرة علاش ولدها ماخلاهاش تمشي و جاها الضحك : سيري ابنتي راه البيت د النعاس بدلي فيه، واش عندك باش تبدلي ولا نعطيك شي حاجة من عندي؟
نورهان : لا لا اخالتي صافي راه عندي جبتهم من الاوطيل شكرا بزاف
لا خديجة : ايوا مزيان ابنتي بلاه بدلي دغيا باش نحطو الغدا سي حمد ما بقا ليه والو و يدخل
________
ياسين الفوق فبيتو طلع جاهل كينهج بالاعصاب كون مكانتش مو كون هرسها من شي ضلعة على ديك قسوحية الراس لي فيها و هو عدوه هو لي مكيسمعش لهضرتو مكيتفاهمش هو الحاجة لي كيقولها كيبغيها تطبق و واخا عارف بلي هادا راه ديفو و شي حاجة لي خايبة فشخصيتو ولكن هو هكا داير ميقدرش يبدل طبعو هادشي لي مخليه يكون عنيف حتا من واليديه كيشدو معاه الخاطر لاقصى حد
كيضور فبيتو كيمشي و يجي و كيدير شي حركات ديال المصارعة فالهوا باش يبرد شوية  فيه عادة و كيفكر مع راسو انه علاش هو دب معصب و علاش هو اصلا كيتسوق لهاد البنت لي يلاه عرفها اش هاد الاحاسيس المخلطين لي كيحس بيهم دب و الاهم من هادشي كامل و لي كيزيد يعصبو هو ان الماتش ديال ضد الملاكم هشام الزنيتي مابقا ليه والو و هو خاص يكون واجد مية فالمية لهاد الماتش حيت الا ربحو غيقدر من خلالو يدخل للعالمية من بابها الواسع الشي لي كيطمح ليه من صغرو ولكن باش يحقق هاد الحلم خاص يكون مدرب مزيان و الذهن ديالو صافي و كيشوف هدف واحد بلا ما تشتتت انتباهو حتا حاجة
بقا كيفكر ياسين فهادشي و كيدير دوك الحركات ديال التسخينات حتا كيسمح الام ديالو كتعيط ليه باش ينزل يتغدا
-------------------------------------
نورهان فالكوزينة مع لا خديجة كيوجدو باش يحطو الغدا
لا خديجة : نورهان بنتي هانتي شوفي الله يرضي عليك راه ياسين واخا يبان ليك معصب راه قلبو بيض غي متبقايش تجاوبي معاه الا طلب منك شي حاجة والله ابنتي الا فاش كتنوض ليه القنديشة حنا لي واليديه مكنقدروش عليه
نورهان و هي كتستغرب علاش كتقول ليها هاد الهضرة : ولكن اخالتي انا غي دافعت على راسي قدامك باش ميسحابليكش تكبرت على عراضتك كيفما قال هو و ضلمني
لا خديجة : وا راه عارفة ابنيتي هادشي راه نتي لي معرفتيش بلي هو ما هموش انكي تقبلي العراضة ولا لا لي همو هو انه تدخلي تبدلي عليك دوك الحوايج باش هو يبقا على خاطرو
نورهان جاها الضحك حيت هي اصلا ذكية و بحال هادشي كتفهمو طاير: ههههه ولكن ا خالتي خويا ياسين علاش غيدير هكا
لا خديجة بكل صراحة : اويلي  على "علاش غيدير هكا" تبارك الله هاد الزين كلو لي شاف و هاد الشعورات و هاد العوينات و هاد الجسد لي ربي عطاك و بغيتيه ميتعجبش بيك هههههه انا نقوليك الهضرة لي تسمعي مني راه ولدي هداك و كنعرفو و كنفهمو مزيان راه غي غار مسكين ( قالتها و هي كضحك)
نورهان لي تزنكات و حشمات: لا ويلي اخالتي الله يهديك حتا كاع الا كان هادا هو السبب علاش بغاني نبقا هنا راه غي حيت حسبني بحال ختو الصغيرة
لا خديجة و هي كتهز الطبسيل و خارجة: ختو هي ولدات ليه مو و انا ما ولدتش ليه حتا شي ختو هههه
خرجات لا خديجة و خلات موراها نورهان لي قلبها بدا يضرب فالتسعين هي ديجا كانت عارفة بلي هادشي لي كان واقع حيت كان واضح جدا انه مغاديش يدير ديك الحالة غي على عراضة ولكن فاش زادت اكدات ليها الام ديالو هادشي حسات بواحد الاحساس زوين يلاه بدات كتحاول تفهم هاد الاحساس لي جاها حتا كتسمع لاخديجة كتعيط ليها باش تغدا و قادات حوايجها و صاوبات شعرها عاد خرجات لعندهم
لقات ياسين جالس و عاقدهم و لاخديجة حيدات ملاك الصغيورة من ضهرها و حاطاها على ركبتها و سي احمد لي يلاه غسل يديه و جاي يجلس يتغدا
نورهان : عطيني اخالتي ديك شنويلة نوكلها راه متبغيش تجلس ليك
لا خديجة : هاكي ابنتي راه كتبان ليا توحشاتك نيت ( ملاك غي شافت ختها جاية عندها و هي تهز يديها بمعنى هزيني)
جلسات نورهان مقابلة مع ياسين لي كيشوف فكاع البلايص الا فيها الشي لي معجبهاش الصراحة و خلاها تحس بالعكس ديال داك الاحساس لي حساتو قبيلة بحال شي خيبة امل جاتها
و بدات لاخديجة كتقسم فالخبز و كتقول ليهم يلاه بسم الله و بداو كياكلو فصمت حتا قاطعو سي احمد لي دوا مع ياسين : ايوا البطل هاد المرة فين غيكون الماتش
ياسين لي كياكل فالصلاد ديالو حيت طبعا هو رياضي داكشي ديال الطواجن و ليدام خاطيه خصوصا فهاد الأيام :ههههه غي هنا الوليد علاش؟
سي احمد بمزاح : ايوا قلنا نجيو نتفرجو و نشجعوك و نهزو التيفو حنا كاع
ياسين و ضحك واحد الضحيكة بانو فيها سنانو خلا قلب نورهان كيرفرف في العلالي مسكينة : ههههه ياك الواليد و جيب معاك كاع نتا الايلتراس ديالك و دير لاخديجة هي الكابو
لا خديجة : لا لا اولدي انا كون جيتي عليا كون جلستي غي حدايا انا منقدرش نحضر فداكشي ديال الضريف و العنف عاد بغيتيني نحضر ليك نتا لي ولدي و كبدتي
ياسين : و الله يهديك الواليدة غي جي حضري و شوفي ولدك اش غيدير فهاداك لي ايلعب ضدي
نورهان لي كانت كتوكل ختها ملاك و فنفس الوقت بقات غي كتشوف فيه كيفاش كيهضر مع واليديه و كيضحك معاهم و الطريقة ديالو باش كيضحك كانت رجولية حمقاتها ،وعات على راسها و نزلات راسها حتا كتسمع لاخديجة كتهضر معاها
: ايوا و نتي ا نورهان شنو غديري دب
نورهان بالتلفة: هاء فاش ا خالتي؟
لا خديجة : فالخدمة، ياك مبقيتيش اتخدمي معاهم فالاوطيل
ياسين هز راسو كيشوف فيها كيتسناها باش غتجاوب
نورهان توترات فاش حسات بيه كيشوف فيها : ان شاء الله اخالتي انلقا شي خدمة آخرا مدبرها حكيم
لا خديجة لي بغات تلعبها كبيرة و تأكد نيت واش ولدها مهتم بنورهان نيت كيفما كتشك ولا غي جاب ليها الله : ايوا ابنتي ان شاء الله ربي يكمل عليك و علاش لا يجيك كاع نتي شي ولد الناس لي يكون محتارم و برزقو و تتزوجو و تهناي من هاد الشقا ديال الحياة
ياسين لي محملش هاد لهضرة يسمعها ولكن كيحاول يقنع راسو بلي خاصو يبعدها من تفكيرو و انه هو دب عندو بزاف ديال الحوايج اخرين فحياتو المهنية يحققهم و هز راسو فنورهان بابتسانة صفرة و قال من فوق قلبو : اييه علاش لا الواليدة ان شاء الله ربي يسر ليها
نورهان لي ضرها قلبها من هادشي لي سمعات و حسات بحال الا انها رفعات سقف آمالها بزاف لدرجة انها تخيلات واحد بحال ياسين يديها فوحدة بحالها
هزات راسها فيه : اللهم امين الله يسهل على الجميع غي هو كيفما كتعرف اخالتي خديجة انا مادايراش فبالي فكرة الزواج دب حيت باقي صغيرة و عندي مسؤولية تاع ختي و ممحتاجاش شي حد لي يهنيني من شقا الحياة انا قادة عليها و مكنشكي على حد
لاخديجة لي ندمات كاع علاش قالت ليها هكا من لول: لواه ابنتي ضروري من البنت ما تتزوج واحد النهار و دير دارها و وليداتها
نورهان : بصح ا خالتي متافقة معاك حتا انا ان شاء الله غادي ندير داري و وليداتي واحد النهار مع شي ولد الناس لي يستاهل
ياسين لي محملش هاد الجو و بدا يتنيرفا حيت فالداخل ديالو واخا يعيا ما يخبي مامتقبلش انه يسمع هاد الهضرة : الواليدة ،الواليد هاني مشيت دب ان شاء الله حتا للعشية و ندوز تاني الا ساليت
سي احمد : واخا اولدي الله يرضي عليك
نورهان تاهي وعات براسها و ناضت كتجمع فالطبلة و قالت ل لا خديجة : يلاه ا خالتي هاني غنمشي حتا انا شكرا على كاع هادشي لي درتي على قبلي (باست ليها راسها) لهلا يخطيك، خليتك على خير
لا خديجة : اويلي ابنتي اش كتقولي مالكي رخيصة عندي ( بدات كتغوت و كتعيط على ياسين لي كان كيليس سبرديلتو باش يخرج) ياسيين اجي اولدي الله يرضي عليك وصل نورهان و ختها لدارهم
نورهان لي تصدمات حيت متوقعلتش نهائيا هادشي : لا لا ا خالتي صافي انا انمشي راسي ماغندي مناش نخاف راه الدار غي فالدريبة لاخرا
ياسين لي جا لحداهم و كان لابس مزيان و ريحتو تشمها من بعيد و تبارك الله كان كيبان هيبة : هاني قدام الباب كنتسناك
نورهان: لا لا اخويا ياسين (تعمدات تقولها) بلا منعدبك الدار راه شفتيها غي قريبة غي سير بلا منعطلك
ياسين شاف فيها ديك الشوفة ديال من نيتك و نطق : يلاه طلقينا عفاك
فهمات بلي راه مغبمشي حتا يوصلها و جمعات قشاوشها و هزات ختها الصغيرة لي باقي مكتعرفش تمشا و خرجات لقاتو متكي على طوموبيلتو و هاز تيلي كيتسناها غي شافها خرجات مشا جيهتها و هو يهز ليها داكشي لي كانت هازة بلا ميدويها و بقا غادي سابقها و هي تابعاه من لور بلا ميهضرو بجوج بقاو غاديين حتا ضور ليه شي حد فتيلي
ياسين: الو وي