ممر ضيق

ممر 16

#ممر_ضيق
#ذكرى١٦
ذكرى كل سنه بتعدى وتيجى وكل ما تيجى تجدد احزان أو افراح على حسب نوعها
بس لما جيت فكرت في الذكريات لقيتها غريبه جدا فكرة الذكرى نفسها حتى لو انت نفسك عايز ما تفتكرهاش بتيجى وتقولك نو فوق انا موجودة ولازم تفتكرنى

بحس انى ضعيفه اوى ادام حاجه زى كدة
زى النهاردة مثلا ذكرى وفاه والدى
واللى ما يعرفش والدى فاته اكيد كتير
بابايا الله يرحمه بجد ومش عشان انا بنته كان راجل طيب وشيك ومتحضر ومثقف وعنده كميه حنيه غريبه مستخبيه
ومش بتظهر لاى حد كان الا لو كان عزيز وغالي

مش عارفه يمكن عشان كان برج سرطان الله اعلم
بحس أن الأبراج المائيه عموما بتبقا عندها حنيه وعاطفة مستخبيه وقرب من الوالدة بشكل غريب

بس انا كنت بشوف معاملته مع نينتى اللى هى والدته
فظيعه قريبه جدا من معامله فاطمه تعلبه والحاج درويش في مسلسل الوتد ودة كان حقيقى والله فعلا

ثانيا معاملته لاخواته البنات فيها حزم بس فيها حنيه مستخبيه شديدة

الناس دى شكلها كانت متعوده ما تظهرش الجانب دة عشان الناس ما تقولوش عليه ضعف والله اعلم
لازم الراجل يتصف بالشدة. والقوة

ثالثا بقا معامله من نوع آخر وهى والدتى كنت حاسه انها امتداد لوالدته ونينته والدة والدته مع انها فضلت موجودة ما شاء الله  لحد ما انا كنت مثلا في تانيه إعدادى كانت عدت ال٩٠سنه وكانت شخصيه ظريفه جدا كنت مسمياها الست الصغننه الصغننه أيام بقا  ربنا يرحم الجميع

كنت بحس دائما أن بابايا حظه حلو اوى مع الكائن. الاخر
زى نينته أو والدته اللى هى نينتى أو والدتى اللى هى زوجته
كنت بحس سبحان الله إن ربنا زرع حب الستات دى في قلبه
وخلاص مكتفي بيهم

الحنيه الخاصه بيه كانت بتبان في مواقف كتيرة اوى بس دى فعلا للى كان عايز يشوف
يعنى انا افتكر مثلا
موقف كان بيتكرر على طول
عمرة ما اجتمع مع نينته أو والدته الا وقدم فروض الاحترام ووطى باس ايدهم
عمرة ما كان يخجل من حاجه زى كدة مع أنه اسد برة هههههه والناس تقدم ليه فروض الولاء والطاعه

رابعا معاملته مع اخواته البنات والولاد
ودول بطبيعه الحال بردة مختلفين
يعتبر أكبر. اتنين بعديه هما اكتر اتنين فاهمينه وفعلا اخدوة زينا كدة بكل طباعه المستخبيه أو المعلنه
الباقي أصر هو على تعليمهم
عمتى الكبيرة اتجوزت اول واحدة وكونت أسرتها
وهنا والدى بعد الزن عليه قرر أنه يتجوز
وفعلا اتجوز في مسقط رأس والدتى واستقرينا حوالى ٣سنين كنت جيت انا واختى وبعد كدة رجعنا واستقرينا هنا في بلدة والدى

ابتدت عماتى تتجوز واحدة ورا التانيه واخر بنتين هما اللى فضلوا موجودين في التعليم إلى أن اتجوزوا واحنا في المرحله الابتدائيه
ودى كانت ليها ذكريات أخرى

خامسا معاملته معانا بناته الاربعه بقا
الأولى والأخيرة ودى حاجه لازم تذكر الاثيرين إلى قلبه
ودى حاجه ولا تعيبه ولا تضايق حد خالص

مش عارفه كان عامل ميكس غريب ما يخليش حد يشيل من حد الا لو هزار يعنى لما كبرنا وكنا نغلس على اختنا الصغيرة حبتين تلاته

اختى الأكبر منى كانت الابنه الاولى ليه والحبيبه والصديقه
انا بقا كنت الحنيه كان دائما بيبص ليا ويقول انتى القلب الطيب بتاع العيله دى

حبيبى دائما اختى اللى بعد كدة كانت أكثرنا طيبه وأكثرها عصبيه بس بردة عارفين طبعها وبنحبها

قلبى اختى  اخر العنقود الصغنن يا ناس
كنت من زمان بتعامل معاها على أنها بنتى الكبيرة
بحبها بقا بعاملها بحنيه تفوق الكل ولا كان بيفرق معايا عشان انا كنت بعمل كدة كمان ههههههه

مش عارفه ليه يمكن طريقتها المحببه انها في تعاملها تحسسك كدة انها ما كبرتش خالص

مش عارفه بصراحه
اخونا الصغير كان امتداد ليه
فكرة وجود اربع بنات اكبر من الولد
دى في حد ذاتها ليها جانبين
جانب ايجابى وجانب سلبى
الجانب الايجابى انك تحس أن انت عندك خمس أمهات مش واحدة بس
وكل واحدة من جانبها بتعمل عليه أم بطريقتها
الجانب السلبى بقا انك مش عارف تفلفص يا حرام من كميه المخاوف على شخصك الكريم هههههههه

انت ديك البرابرة  بقا اللى جه بعد غيبه وحامل اسم العيلة

وتفوت الايام وتعدى الايام و نكبر ومتأصل جوانا تربيه بابايا ومامتى  ونينتى كمان لانها كانت عايشه معانا  ومنورانا دائما
لكل لمحه من الطيبه والبركه موجودة و متعززة من  وجود جددتين في نفس البيت  زى نينتى و نينه والدى
بصراحه بحس أننا كنا محظوظين وحياتنا كانت عامله ميكس كله حب وخير ما شاء الله

لكن كل دة خلاص بح ما فيش بيت ما فيش أسرة ما فيش كبار ما فيش ونس ما فيش سند الا الله

ولا زوج ولا ابن
ما فيش غير ربنا

ربنا يرحم موتانا واموات المسلمين يا رب

ما تزعلوش منى بفضفض معاكم لأن الذكرى في القلب عمرها ما تغيب ما حبتش افتكر الوفاه بتفاصيلها اللى في عيونى زى شريط السينما لن تختفي ودايما هتفضل موجودة في ممر ضيق لروحنا لغايه ما نعدى ممر النور ونقابلهم في جنات النعيم باذن الله