جئت اليك لا أدري

البارت الرابع والعشرون

جئت اليك لا ادري

للكاتبات نور و زينب

البارت 24

🌸🌸🌸🌸🌸🌸🌸🌸🌸🌸🌸🌸🌸🌸
لا تشـرقُ الـروح إلا من دجـىٰ ألـمٍ

هل تزهر الأرض إلا إن بكىٰ المطرُ
🌸🌸🌸🌸🌸🌸🌸🌸🌸🌸🌸🌸🌸🌸

رحت اودي شاي لأيهم واسامه كاعدين بالحديقه ،، قبل لا أروح سمعت باب يدك راح ايهم فتحه وشفت اروئ دخلت بدون سلام باوعتلي بتكبر وراحت بغرفه عمتي وسدت باب وراها  ...

كلت بكلبي الله يستر من جيتها

سمعت ايهم كال شعجب سامحتها وخليتها تدخل لبيت بعد ماطردتها ...

اسامه كال امي اكلت رأسي تطرد بت عمك علمود مرتك بس كلت خلي بالله ترجع تدخل اشوفها شنو تسوي بعد...

ايهم كال ليش هي شنو سوت...

اسامه غير هي دفعت شوق وطيحتها وخلتها تجيب بالشهر سابع وحالتها خطره ،، رحت لبيتهم وتعاركت وياها هددتها اذا وصلت لبيتنا اكول لأخوانها وابوها ،، هي خافت وسكتت ....

عكد حاجبه ايهم وكاله منو كالك هذا كلام ....

كال انوار سمعت اروئ كالت امي ،، بس لحد الان مااعرف امي مشتركه وياها لولا ،، سكت ونوبه كال تدري مرات اشوف امي واروئ يصعدن لغرفتي بس لحد الان مااعرف شنو يدورن بس اشك حسبالهن شوق تسوي سحر وحاطته بالغرفه وهنا يدورن علي ....

ضجت يعني يدري بسوالف امه ومخليني يمها ،، وشدعوه عليه ماكال اهل اروئ عليها يخاف عليها لو شنو ،، انقهرت معناها انا ولا شي بحياته والطرد من بيت مو عقاب كافي الها ،، عادي ترجع وهمات يطردها وترجع يعني ماسوه شي الها ،، وهسه خايفه على بناتي منها ...

فزيت على صفنتي من لجين كالتلي ليش واكفه شاي راح يبرد ...

تنهدت وكتلها ودي بدالي اريد اصعد اشوف بنات خاف يبجن ...

شافتني منقهره كالت بيج شي ...

هزيت براسي بأي كتلها اسامه يدري بأروى هي الي دفعتني وماسوالها شي بس طردها من بيت وهسه رجعت ،، على اقل يعاقبها بشي علمود ماتتمادى اكثر ،، ونوبه من اجت وشافتني وباوعتلي بنظره تهديد وتكبر ...

جرت نفس كالت معليج غرض بيها تولي واطيني صينيه اودي الهم وروحي صعدي فوك ارتاحي ،، طيتلها وصعدت فوك ...

وكمت ابجي ،، حزت بنفسي يعني كلش صعبه من تشوف واحد ايأذيك والناس كلها تدري بي يأذيك ،، بس مايكفون بوجهه وخاصتن الي اقرب منك ...

رحت وكفت يم توائم وشفتهن نايمات خفت عليهن يتأذن ،، صفنت اواجه اسامه وتعارك وياه ليش محجه عليها هالدرجه انا بناتي رخيصات عليه ،، هو مو دائمن يكلي احبج زين شلون كدر يتحمل يشوف واحد اتأذى الي يحبه وصله للموت ،، هذا مو حب ...