عبد الله : الخطة هي انو همس حتمش ليهم كجاسوسه
همام وهو بقوم :همس ؟ لي همس ؟ م لقيتو الا همس بعدين لو حصل ليها شي ؟
عبد الله:اولا همس د م بتهظر زينا يعني م حتتعرف ولا ايشي
محمد : طيب اها
عبد الله:همس حتمش كجاسوسه وتدمر سستم الشركه وحترسل نظام فايروس وحتنسخ الملفات حقتنا ومهمتا حتنتهي هنا
همام:انت موش قلت انو ليث د م زول ساهل
عبد الله: كلمه ساهل عليهو بسيطه بركز فايشي ممكن عادي يعرف انت بتفكر في شنو
محمد: احنا عاوزين نجيب حق ابواتنا هم مزلولين مرمين فالسجن بي سببو
..همس الحقد والكره ملاها وقالت الا تنتهي منو..
همس بغضب : انا موافقة م حارجع الا اجيب حق ابوي وعمي
اماني:طيب لنفترض مشت مش حيطلبو منها معلومات شخصيه وسي في
عبد الله: انا عامل حساب من الناحيه د
همام: يعني انت جاهز
عبد الله :انا كلمتكم انو عندي خطة فكنت بجهز
بثينه:يلا ي جماعة احسن نمش ننوم بعد د
عبد الله وهو بعاين لي همس: بكرة الصباح حتطلعي علي الكوفير حتتغيري من شعر لي عيون لي لبس وكل شي
همس وهي بتزفر : طيب
..وطلعو نامو كلهم ..
..الصباح ..
قاعدين فالهول جات همس نازله وهي مجهزة روحا عشان تمش الكوفير
همس : صباح الخير
كلهم:صباح النور
عبد الله:اها جاهزة؟
همس : ايوه
همام: همس ..همس م تخلي نار الانتقام نتنطفي جواك نهاي عاوزين نرجع حقنا.
همس وهي بتكب فالشاي :لا م تخاف برجع حقنا
..بعدها طلعت للكوفير
غيرت كل شي لمن م بتتعرف غيرت لون الشعر واشترت عدسات رماديه وجهزت روحا لي ايشي حتي الشقة جهزها ليها همام .. ورجعت البيت وهي كل م تتذكر بتتوعد بالانتقام
..الصباح ..
..صحت همس دخلت الحمام واتسوكت واتوضت وصلت وبقت تدعي بعدها عاينت للساعة المعلقة فالحيطه وقامت تجهز لبست بلوزة بلون بصلي فيها ربطة و رسم مربع بالابيض فيهو زي نظام صفق كد بالاسود سكريت بالاسود سبورت اسود بي ابيض وطرحة فالرقبه رفعت شعرا ضنب حصان وفي خصل علي وشها ونضارة سودا مثلثه بالمقلوب وطلعت شالت السي في بتاعا واي شي بتحتاج ليهو وعبد الله حفظا الكلام وقال ليها تكوني واثقة وما تتوري عشان م يكشفوك وطلعت علي الشركه ..
_فالشركه _
دخلت الي الشركه ولفتت جميع الانظار توجهت الي موظفة الاستقبال ..
همس:جيت اقدم لي وظيفة هنا
الموظفة :عندك موعد سابق
همس :ايوهه
الموظفة :طيب انتظري وعملت اتصال ورجعت ليها
الموظفة :اتفضلي من هنا تركبي الاصانصير الطابق التالت المكتب المكتب التاني علي يمينك طوالي
همس :شكرا .. وطلعت وصلت المكتب دخلت اول شي لقتو قداما مكتب السكرتيرة وتاني في باب ياهو مكتب المدير وبقت مترددة تخش لكن اتذكرت اهلها واتذكرت كلام عبد الله اخدت نفس وطرقت الباب بعد دخلت قعدت فالكرسي
ليث :جيبي السي في
.. مدت وهو بقرا باهتمام وهي بتعاين ليهو باين عليهو زول م هين رغم سماحتو د
ليث :....
#كسرة:
"واعلم ان لطف الله يحيطك من دون انو تدرك💙🌸"
يتبع ...
