سمعتهم بتكلمو عن انه يوسف صااحب احمد متقدم لي،، هنا انا اتناسيت الثبات الكنت بدعيه الفتره الفاتت دا كلو، لحد الان انا بتعامل ببرود وقسوه قلب ما كانو متخيلنها،، كنت بكتم وبكبت لكن انا من ما حبيت حبيت يوسف خطيبي كيف لمجرد تشابه اسماء يخطبوني لي يوسف كيف،،
انا : ممكن افهم في شنو ويوسف منو
ابوي : شهد اهدي شويه امشي غيري وتعالي عشان نتفاهم انتي هسه ما حا تستوعبي كلامي
انا : انا حاليا في اكمل هدوئي فا لو حابي نتفاهم هسه ما غيره
ابوي : طيب اقعدي،، قعدته في طرف الكرسي وبطقطق في اصابعيني وهو بدا يتكلم.
يوسف دا صاحب احمد ولد عمتك وهو زول كويس شديد وجا اتكلم معاي انا وهو عايزك علي سنه الله ورسوله وانا اديتهم يوم الجمعة الجاية عشان يجي تعارف هو واهله
انا : طيب انا قلت لي زول فيكم عايزه اعرس ولا بفكر في كدا
أبوي : ياشهد العمر ما معروف وانتي ما صغيره علي العرس وما تخلي حاجة تاثر عليك والفات مفروض يتنسي ما يبوظ مستقبلك
انا : كنت بتكلم والعبره خنقتني، ،،انت اذا خايف علي مستقبلي ما بتدي كلام بدون رايي وبعدين هدي شيراز قاعده واكبر مني ليه ما خايف علي مستقبلها ما تشوفها هي انا خليني في حالي وعمره يوووسف وذكرياته ما كانت شي ياثر علي مستقبلي لانه انا للان مسنوده بيه وهو المقويني ما انتو،
وطلعت فوق وانا بتحسس الدبله والمحبس الفي يدي وببكي،، يداب اطلقت دموعي يداب بديت ابكي علي فراق يوسف الوقت داك كنت مصدومه وعشته في صدمه بس هسه حصل الكنت متوقعاه ما حا يخلوني ليك يا يوسف ما حا يريحوني يااخ ليه انا ما مشيت ليه وكنت معاه لييه.
صح انا كبيره عمريا وفكريا بس لحظات كدا بتخلي الزول يجوط وعقله يبقي زي حبه السمسمه دا لما مسكت المشرط بتاع الورق وقطعته بيه يدي،، ما كنت حاسه بي شي ما حسيت بوجع لانه الجواي كان بوجعني اكتر كان بياكلني كل لحظه وكل ثانيه وانا بتجاهل الشعور دا،،، شويات كدا وغمضته بس كنت حاسه وسامعه الحوليني وتقريبا عديت فتره 10 دقايق وانا مرميه في الارض والدم حوليني لاني شرطه يدي بالطول ما بالعرض ما عارفه السبب شنو بس حبيت حتي في اذيتي لنفسي اكون مختلفة،،
بالصدفه جاتني شيراز عشان عارفاني حا اكون اتضايقت من كلامهم ولقتني في حالتي ديك بقت بتصرخ ليهم وجا مازن شالني وياهو هسه انا في المستشفي وفتحت ولقيت اني لسه ما مع يوسف لسه ما طلعته ليه عقدته حواجبي بانزعاج وقلت ليهم انا بعمل هنا شنو،،، دخل يوسف صاحب احمد وقاطع كلامي وهو لابس لابكوت وقال لي اهدي،، هنا انا اتعصبت زياده وبقيت بصرخ فيه انت عايز مني شنو ياااخ وما فصلت الا لما اداني مهدئ قواي خارت بس كنت بحاول اكابر وانا ما قادره،،
اهلي طلعو بره ويوسف كان بغير لي في الفراشه لانها نزفت أثناء هيجتي،، قال لي انتي سامعاني ومتاكد من كدا،، انا لما اتقدمت ليك ما عشان انتي تعملي كدا ولا عشان ااذيك بس انا حبيتك حتي وانتي قلبك لغيري بس انا اتعلقت بيك ودي حاجة ما بيدي انا بيد ربنا هو الزرع في قلبي الحب دا واكترواحده مفروض تفهمني انتي،، وانتي حره في حياتك ماف زول حا يجبرك علي اختيار ابدي زي دا،، والموضوع ما بستاهل الانتحار لانك ما حا تمشي لي يوسف بالعكس حا تمشي النار وكدا حا تكوني ما لميتي فيه دنيا واخره كبري مخك بس ❤️
عارف كلامي كتيير يلا انا اخليك ترتاحي شويه،، طلع وانا لسه بسمع في كلامه كانه بيتقال لسه قدامي ،بس حتي وكلامه صح ما كنت قادره استوعبه ،،احتمال لانه لسه بنكون عايشين علي اثر الماضي ومخلينه يتحكم فينا بس برضو دا ما بيمنع انه نتخلى عنه،
اخدته وقتي الكافي في النوم ولما صحيت ماف زول في اهلي اتكلم معاي بخصوص موضوع يوسف خالص كانه ما كان في موضوع زي دا،، واخته فتره نقاهه كم يوم كدا مع وحده من خالاتي مع اني م كنت محبذه الفكره بس اطريت اتماشي معاهم،، رجعته لي غرفتي الحلوه كنت بحب ريحتها عشان نفس عطر يوسف ونفس الالوان البنحبها انا وهو،،،
في يوم من الايام كان عندي مقابله مع دكتور زين مشيت ليه معاي احمد وانا حسيت في الوقت داك اني اتسرعته وما اديته وقت يتكلم حبيت الطف الجو واعتذرته منه عشان بسببي حصل مشكلة بينه وبين عروس "الريكاتا" وهو مرر لي الموضوع عادي وحكي لي انه ما كلمها ولا حكي ليها شي عني بس صحبتها شافتني داخله عنده وهو قال ليها ايوه شهد بتاخد جلسات،،
اخدته جلستي وكنت خلاص بديت احكي كل البحس بيه بالضبط ل زين وهو بيسمعني لحد الاخر بدون ما يقاطعني ولا يغلطني علي شي انا عملته ،،
اما يوسف ما حصل اتلاقيت معاه تاني ولا لمتني معاه صدفه وانا شبه اتناسيت الحصل واتناسيته هو زاته.
_لا شيء يشبه شيء ولا أحد يعوض غياب أحد ، أشياؤنا المختلفه إن ضاعت ليس لها بديل.
#إعتزل_ما_يؤذيك
#شهد_محمد
