قصة نهوة استاذي
بغداد_ ساعه ٧:١٥ صباحا
ام حسين_يلا دنيا ماما كومي رح تتأخرين على دوامج شلون وياج اني بس تسهرين والصبح بالكوه اكعدج مو حته الخط رح يجي وانتي بعدج بالفراش يلا كومي ياعيني
دنيا _فدوه ماما بس خمس دقايق ميته نعس
ام حسين _لا خمس دقايق ولا دقيقه هسه تكومين يلا
دنيا _هاهيه ماما كمت اوف، كمت شفت الوقت مظل شي ويجي الخط بسرعه بسرعه غسلت وبدلت ملابسي لبست تنوره رصاصي وقميص ابيض وستره رصاصي وشال ماروني ومكياج مال سرعه كلت بالجامعه اخلي عدل نزلت على السريع صبحت على بابا
دنيا _صباح الخير بابا حبيبي
ابو حسين _صباح النور دناوي ليش هيج بتي متجوزين من التأخير
دنيا_اخير مره والله، ههه يلا اني رايحه دك عليه الخط
ابو حسين،ام حسين _الله وياج _
خل اعرفكم على نفسي اني دنيا مواليد ١٩٩٥ مواصفاتي عاديه لون شعري تمري وجسمي لا سمين ولا ضعيف طولي ١٦٠ بس اكثر شي بيه حلو هوه عيوني طالعه على ماما عيوني عسلي ورموشي ثخان شكلي أصغر من عمري ودائما الي يشوفني يكلي تنحبين ههههه،
من عائله ميسوره الحال والدي موظف بدائره الكهرباء وامي ربه بيت عدي اخ واحد اسمة حسين مهندس معماري متخرج وكاعد ينتضر تعينه، كلش احبه لانو احسه صديق اليه مو بس اخ وعدي اخت أصغر مني اسمها مينا بالثانوي واني وياها ٢٤ ساعه نتعارك ونتزاعل_
بس زعله حبايب نصالح بنفس اليوم عادي اما اني بالجامعه مرحله أولى كليه لغات قسم انكليزي عشقي وكلش احبهه، طبعا احنه بغداد بس أهل ماما موجودين لانو أقارب بابا الاغلبيه بكربلاء وعلاقتنه بيهم مو كلش بابا اخذ ماما عن حب وعاش ببغداد علمودها
وجانوا اهل بابا مقابلين انو يعوفهم خصوصا جدي لحد هل يوم ميقبل يحجي ويه بابا اما أعمامي وعمتي كلش قليل تواصلهم ويه بابا لانو جدي ميرضه احد يحجي ويه بابا
وصلت للجامعه ونفس كل يوم اخذ محاضرات وسوالف ويه بنات ونقشب بالناس
طبعا اني الحمد لله شاطره ولانو احب الانكلش سهله عليه الدراسه اني من النوع ماحب اختلط ويه ولد وكلامي وياهم بس على كد دراسه_
نور_يلا دنيا متت جوع خلي نروح للكافتريا ناكل شي
دنيا _ولج خبصتيني يمعوده متنطين صبر مراح يطير الاكل تره بس خلي اكمل نقل المحاضره
نور_اي اي رح يطير بس خلي نروح ناكل
دنيا _ههههه ديلا امشي كملت نقل
طبعا نور أقرب صديقه الي تشبهني وماعدها اذيه كعدنه بالكافتريا اشترينة لفات وعصير لانو وكت ضهريه نتغده بالكليه..
جنت كاعد اكل وصافنه افكر اليوم مشفت فادي معقوله غايب فجأه جان تحجي نور
نور_هاج عيني اجه حبيب الكلب وين مروح لاحكنه بس لو افهم شعاجبج بي جان ارتاحيت
