بارت الاخير
دنيا _كاعدين نتعلل بالليل ونشوف اخر الاخبار الي للأسف جانت من سيء لاسوء المرض كلش انتشر والحظر كعد الكل بالبيت والناس حايره بروحها بهل أثناء جهاز احمد دك رفعة يجاوب شوية
وكام كمل مكالمتة فوك كلبي لعب شنو القصة ليش صعد وعافنة الا اذا جان اكو فد موضوع لو شغلة مهمه شوية وصعدت وراها دخلت جان مكمل المكالمة وديكلب بالجهاز..
احمد _تعاي دنيا زين جيتي عدي موضوع وياج..
دنيا _خير صاير شي؟؟
احمد _لا ماكو حبيبتي بس هيج داسألج شنو وضع اختج مينا
دنيا _هاا مينا!
شنو تقصد بوضعها وليش؟
احمد _صديقي مؤمل بحفلة تخرجج شافها من جنه هناك وعجبتة ومن هذاك اليوم سألني عليها بس اني بوكتها كتله تره صغيره أهلها وبعدها سادس ممكملة ولانو اعرف نفسيتها تعبانة بهذاك الوكت والخطبة ممكن تأثر على دراستها هم لهذا سديت السالفة من يمي
دنيا _اي؟
احمد _اي فقبل فتره رجع فتح الموضوع وكلي هسه خلصت سادس شنو حجتك صراحة فاجأني انو بعده منتضر وطلب مني افاتح والدج وهسه اتصل ديكلي حجيت لو بعدني..
دنيا _هااا والله الصراحة ماعرف..
احمد _للأمانة الولد دره وخلوق ماعده سوالف مكسره واني قبل من سديت الموضوع لانو جانت صغيره بس هسه عمرها مناسب حتى تفكر بهيج قرار واكيد بعد مترجع لعمي..
دنيا _بأجر وديني عد اهلي وعود نحجي ويه بابا سوية وهم رح اجس نبض مينا حتى متنحط كدام الامر الواقع..
احمد _ يكون افضل..
دنيا _رحنه ثاني يوم لبيت اهلي حاجينه بابا وشفت مينا هم مجان اكو رفض قطعي لهذا بعد اسبوع اجو اهل الولد طلبوها رسميا منه وبابا طلب وقت وينطيهم الجواب بعدين..
شهر وصار العقد مينا اخر العنقود كبرت واليوم صارت على ذمة رجال مسؤول عنها نضرات الخجل منها ونضرات الفرح من مؤمل جان كفيلة ترسم السعاده بيهم دعيت الها بكلبي يكون الها سند وعون ويعوضها عن كل خساره وفقد عاشته بمراهقتها..
دخلنة بشهر محرم الحرام وهل سنة من دون كل السنين مرحنة لكربلاء من وره المرض اني حامل وعدي طفله صغيره وخالة جبيره بالعمر نخاف عليها فبس احمد راح لبيتنه الي هناك رغم مجنه قابلين بس اكيد الرجال إذا حط ببالة شغلة لازم يسويها..
بليلتها كلبي جان ناغزني من روحته هاي ماعرف ليش وضليت ابجي اكله لا تروح ممطمنة وهوه يضحك عليه يكلي شنو قابل حظل أشهر هناك هيه كم يوم اروح ادعيلكم وارجع ظل طول الليل يشاقيني ويضحك يحاول يغير حزني نمت على صدره حاظنته بقوه واشم بي ماعرف شبية يمكن الحمل مأثر عليه ومتعبني..
