(البارت الخامس والثلاثون)
.......................
التمّن ترا الما خلن بعيني نظر
الـ شوگ،
والـ ليش
وتواريخ الصور...
.......................
دنيا _نزل احمد عصبي وعافني انقهرت من تصرفاته ساعه حنين وزين وياي وساعه يصير هيجي عصبي
هسه اني شعليه بجاسم اذا هوه اجه اهناك شذنبي اني غير لوما هوه كلي روحي بيت جدج وهسه تعصب عليه
كلهم هيجي بس كدرتهم عليه يعيطون ويضربون بدنيا بس هذنيج الحيايه محد عرف يوكفهم عد حدهم..
والله ولا الي بعد دخل بي خلي شيسوي بعد خلي يسوي واني بابا جان موجود وكل حجي جاسم كباله صاار..
كمت غسلت وجهي لانو دخنت من العصبيه نزلت جوه شفت خاله بالمطبخ كاعد تشتغل و ساره كاعد تنظف__
خاله احمد وين؟؟
ام احمد _قبل شويه طلع يمه
دنيا _هااا..
عود زعل لو شنو الموضوع والله تجيك التهايم وانته نايم..
خاله اكلج اليوم خلي اني اسوي الغده ضايجه وأريد التهي بشي
ام احمد _براحتج يمه المطبخ كبالج يلا اليوم اني اخذ استراحه من الطبخ بفضل جنتي
دنيا _تدللين من عيوني..
طلعت دجاجه سلكتها وراها سويت حشوه مال برياني نص منها حشيت بيها الدجاجه والنص الخ سويت تمن وخبطته ويه الحشوه..
وسويت صلصه مال دجاج على جهه الي يعجبه يخلي منها.. اني اشتغل وخاله هم توجهني تكلي حطي من هذا يطلع أطيب وهيج
كملت الدجاجه دخلتها للفرن وهدرت التمن جبت الخضر حته اسوي زلاطه كعدت يم خاله على الميز باعت عليه ونصت
حسيتها تريد تحجي بشي وياي معقوله شي يخص احمد هل فتره الكل ينصحني بي مدري شنو السالفه خلي ينصحوا هوه هم عليه ههه
هاا خاله احسج عدج سالفه..
ام احمد _اي يمه صح بس اخاف تاخذين على خاطرج مني
دنيا _لا خاله شنو السالفه انتي مثل امي احجي الي يعجبج
ام احمد _دنيا انتي وأحمد بعدكم موو
دنيا _احس صخنت من الفشله شنو لهل درجه مفضوحين احنه..
نزلت راسي ماعرف اجذب
ام احمد _رفعي راسج يمه لا تستحين قابل مسويه مكسوره تره عادي يامه ويامه نسوان يظلون كم اسبوع ويه زلمتهن يحاولون مره وثنين لحد متفض سالفتهم..
هسه اني مو هنا كلامي اريد اكلج شغله شوفي ماما انتي على نياتج كلش وكل تصرفاتج جايه من طيب كلبج وبرائتج نياله لأحمد عليج لانو نقيه من جوه بس ديري بالج من شهلاء وبناتها حته من البقيه
اني سمعت البارحه جاسم جاي لبيت جدكم ومحاجيكم مدري شلون واعرف احمد كام يعيط عليج سمعته حسه واصل ليمنه
