البارت الأربعون
نهوة استاذي ❤️
.........................
الحياة رواية جميلة،
عليك قراءتها حتى النهاية...
لا تتوقف عند سطر حزين،
فقد يكون السطر الذي بعده جميل،
وتكون النهاية اجمل..
............................
دنيا_ثاني يوم طلعنه نور من المستشفى طبعا مقبلت تروح لبيت أهلها خافت لا يرجع حسين يروح لهذا اجت امها يمنه..
ذبحنه ذبيحه على سلامتها هيه وعلاوي حضرنالها الغرفه الجوه اني ومينا.. خطيه نور تخاف تفارك حسين دقيقه اذا يكوم من يمها رأسا تكله وين ههه..
احمد الي عرفته منه دز جماعه للموصل ادور على أثر لسعد حتلو جثه على الاقل يصير عنده قبر اذا جان متوفي بس للاسف ماله اي أثر..
مينا ذبلت كلش بعد خبر سعد ادري بيها متعلقه بي بس شبيدي عليها كل وحده بينه اخذت حصتها من الوجع والخذلان بهاي الدنيا حاولت اواسيها شكد ما اكدر واسولف وياها جانت مرات تستجيب لكلامي ومرات لاا..
مرت الايام واني بيت اهلي اهتم بنور وابقه اكثر وكتي ويه مينا ماريد تنعزل عنه.. احمد محاولاته وجياته مستمره زادت منقصت.. اني جنت اغلس بس هاي الفتره بين متتحسن نور وراها ارجع لانو شفت ماكو امل من أحمد يعوفني وصراحه اكثر بعد فقدان سعد دخل الخوف بكلبي ماريد اخسر احد احبه..
علاوي حسيته مله حضني بي وسد الفراغ والحزن الي جنت احس بي بحيث دائما مخليته يمي واهتم بي وصدك طالع على حسين ههه بس لون بشرته حنطاويه مو اسمر مثل حسين..
بيت جدي من سمعوا بخبر فقدان سعد بالحرب انكلبت العشيره كلها ادور عليه بس هم ماله أثر ناس سوتله فاتحه وناس بقت بأمل هوه عايش وراح يرجع...
رسل رجعت لبيت أهلها مكسوره وهذا يمكن اكبر عقاب الها صارت تحت رحمه مرت اخوها.. ابو جاسم بعد مصيبه بته رفل الي الكل تقريبا عرف بيها والناس أكلت وجهه ضربته جلطه وتوفه اما عمتي شهلاء صار عدها شلل نصفي حته حجي متكدر تحجي بشكل واضح وهيج صاروا كلهم تحت رحمه زوجه جاسم بحيث لاعبه بيهم لعب ..الله سلط عليهم الي أظلم منهم
جاسم سمعنه كلش مريض وكل يوم واكع عليهم لحد ما لمن فحص طلع بي ايدز!!
الكل تخبل من سمع بي ومحد وكف وياه لو شافله طبيب علاج الكل تبره منه..
رفل بعد مصيبتها السوده وبس عرفوا اعمامها جاين ماخذيها ومحد يعرف هسه هيه وين...كتلوها، ميته، عايشه محد يعرف ومحد سأل عليها اصلا..
نرجس وره فتره ولدت ولد بس الطفل جان عده ثقب بالقلب وفهد تخبل على ابنه بحيث بس صار عمر الطفل شهر اخذه وسافر بي إلى لبنان هوه وخاله منال..
نرجس أثناء الولاده صاير عدها نزيف حاد وبعدها صايره عدها مضاعفات بحالتها وهيه مراجعت طبيب بقت فتره هيج لحد ما الوجع زاد عدها من فحصت طلع عدها سرطان بالرحم ولازم تستأصله..
