قصص فصليه♡حقيقه عراقيه:
(البارت التاسع والعشرون)
........................................
عتبه ع الوكت والدنيا والناس
الخانو شوكنه وخنكو هوانا
فتحنا كلوبنا لجانو ورانا
حبة نشوف كلشي وكلشي نقرأه
عدنه عيون بس مدري شعمانه
غدر بينا الوكت بس ماحنانه
ذا صاحبك خانك سهلة وتهون
بس شلون الخانة زمانه
................................................
نور_من هذه اليوم وبعد متقربلي حسين.. يتعامل وياي خارج الغرفه بحب واهتمام بس من نصير وحدنه لا يحجي وياي ولا شي اصلا عبالك وحده كاعد بالغرفه وميطلب مني شي حاولت أكثر من مره اوضحله موقفي بس مجان يسمعني لو يسمعني وميهتم
تعبت من المحاولات لحد معفته على راحته لابد يجي يوم ويبطل مكابره طبعا جيت وياه بكل الطرق باللبس، العطر، المكياج، الحجي الحلو، اقترب منه ابادر بالسؤال بس للاسف محصلت نتيجه.. وارجع متفشله
الحادث الي صار ويانه و وفات عمتي جان صدمه للكل وكسرنه اني صح عشت وياهم فتره قصيره بس مشفت منها غير كل الخير والطيبه متت قهر عليها من غير كسرت زوجها وأولادها بفقدانها
دنيا انتهت بوكتها دك ولطم وبجي حته صوته راح والأكل قطعته نهائياً وصراحه محد جان بحال احد كل واحد كسرته اله..
ولوما وجود احمد وياها بهيج وضعيه جان راحت بيها شكد طلع يحبها بحيث عاف كل شي َ وكابلها وكعد..
أما مينا عكس دنيا جانت اغلب وكتها تبجي بصمت اول ايام بقت يم خالتها وره مخلصت الفاتحه والناس رجعت
اشوفها دووم تكعد وحدها.. أما عمو يطب يبجي بغرفتهم ويطلع بس ابد مرجع نام بالغرفه كله ينام بالصاله يكول نفسي متتقبل الغرفه وهيه ماكو..
اما حسين جان وجعه لنفسه كام يطلع من الفجر ويرجع لنص الليل كبل ينام من التعب ويرجع ثاني يوم نفس الشي.. كل واحد بيهم اختار الطريقه الي يعلن حداده على فراق محبوبتهم
جنت كلش اتمنى ينطيني حسين مجال اشاركه حزنه و اوجاعه اكون وياه اموت من اشوفه يتوجع وحده بس كل ما حاول وياه ينفرني وميقبل احد يجي يمه..
فد يوم رجع حسين من وكت بس جان شكله هلكان من التعب وجعني كلبي عليه ومن غير شي ميته شوق اله أريد ابقه يمه مترددت لحضه رحت ركضت يمه وشبكته وهوه كبل بادلني الحضن بقوه وضم راسه بصدري
بس منطق ولا حرف مجرد قيدني بحضنه كمت امسح على راسه والعب بشعره حسيت عليه جسمه يختض معناها كاعد يبجي كمت ابجي وياه ماعرف شسوي حته اخلي يرتاح شويه
حسيت عليه غفه اباع عليه عبالك ابني ومحتاج حظني.. صرت كل يوم اسوي هيج من احضنه يجي ينام بحضني كمت اسولف وياه شغلات عاديه احاول اطلعه من حزنه ولو شويه..
هيج أيقنت حسين شخص مستحيل يبادر بحزنه لو احتياجه لبشر اله اذا هوه اجاه
بعد أربعين خاله احمد قرر ياخذ دنيا عده صح انقهرت حيل لانو راح نبتعد عن بعض بس هذا الأفضل الها لانو صارت حالها حال الميته من بقت مكابله غرفه امها ٢٤ ساعه..
