✨🤍احببت ابن خالتي 🤍 ✨

🌟الحلقة 77...🌟

💫🌻💫

من غدوة قام دوش حضر روحو وطلع للسارة بش يقومها ويهزها لطبيب دق الباب وقعد يستنى كيف محلتش حلو و دخل .. يلقى فرشها مستوي و مفما حد في البيت.. دخل للصال دوبان زادة ملقاهاش قعد يفكرس ويعيط شي حتى تلفونها مسكر... عاود طلع لبيتها لقى شطر دبشها مفماش حس الدم طلعلو لراسو والافكار الكل دارت في مخو لين تلفت لقى ورقة فوق الكوافوز حلها وقعد يقرى فيها

"مهدي سامحني نعرف لي عملتو معاك ميتغفرش نعرف روحي كثرتلها فرضت روحي عليك خليتك تعرس بيا ووليت نعمل في حجات عمري متصورت نعملها .. اما انت السبب انت لي خليتني نكون هكا انت دمرتني لعبت بيا و بمشاعري كيما حبيت ..  نحب نقلك راني كذبت عليك لا فما صغير ولا شي .. لقيت انو هذاكا الحل الوحيد بش نخليك تكمل معايا رشيت الطبيب بش يقلك راني حبلة مفهمتش كيفاه دخلت في لعبة كيما هكا .. مشى في بالي بش كيف نعرسو تتبدل حاجات قلت نجم نحبل منك برسمي و نخليك تسامحني بالوقت.. شوية لقيت روحي نعوم في الشايح الوقت يمشي وانا قاعدة نغرق وحدي .. مهدي انا منيش خايبة للدرجة والله حبي ليك عماني .. سامحني ..
هاني مشيت ومعاش بش نقلقك ولا نوريك وجهي .. عيشك متقول لحد عالي صار تتعدى ايامات و نرجع لتونس و نقلهم لي احنا طلقنا .. "

كان يقرى وجهو لخلخ وعينو حمارو قطع الورقة وقام يصيح ضرب البلار بيدو كسرو الدنيا قلبها كلب وجن .. لعبت بيه كيما حبت خلتو يصدقها خلتو يتعذب خلتو يستنى في صغير و يعيش في كذبة شهرين كاملين..

في ضرف نهار طلّع بلاصتها مشالها يلقاها في اوتال.. دخللها قلب عليها الدنيا سخسها و مرمدها وهزها بالوقت زاد عمللها كونترول حب يتأكد بش متزيدش تعديها عليه و خاف لتهربلو بصغيرو .. تأكد انو مفما شي .. بعثها طول لتونس في اول طيارة و بدى في اجراءات الطلاق لا همو كلام الناس ولا كلام العايلة اش بش يقولو...

قعد فترة كبيرة منقطع عالدنيا الكل نحى تلفونو بعد من غادي سافر وقعد في بلاصة رايضة ما همو حد و منجم حد يلقاه.. كره كل شي ..معاد ينجم ياثق في شي حتى في روحو .. نقم و خاصة ع حاجة اسمها مرى.. تعدات ايامات موش قليلة وهو عالحالة هاكي .. فترة صعيبة تعدات عليه داوا فيها روحو بروحو
..
  وين حس روحو خير وتحسن وتجاوز لي تعدى عليه .. رجع ..بقوة.. نار تڨدح.. شد خدمتو و وقف ع ساقو من جديد معاش هامو شي رجع مهدي لقوي لي ميرشفها لحد و ميخمم كان في روحو. حلف بش معاد يخلي شي يضعفو ويرجعو لتالي قرر بش يكون اناني و يعمل كان الحاجة لي تزيد تعليه الحاجة لي تمناها وحلم بيها.. ليل ع نهار وهو يخدم كان يبني ويعلي كل نهار يزيد ينجح اكثر واكثر مخو ديما يخدم حط تفكيرو الكل في الخدمة .. معاد يتواصل مع حد كان امو و بوه وبيدها قليل حتى  كل ميحاولو يجوه يطلعلهم بسبة ..
مكانش عندو الوقت حتى بش يقعد بينو وبين روحو و يسرح شوية .. كثرو مشاريعو كثرو علاقاتو كثرت سفراتو و خرجاتو ...

🌟الحلقة 78...🌟

تعدا عااااام و 3 شهر ...
ميرال دخلت فعامها الثالث في الفاك.. بعد ما بعِد و خرج مهدي من حياتهم تعدات عليها فترة صعيبة ماللول لكن بالوقت نجمت تتجاوز .. ستانست بغيابو و كانت تحاول تملا وقتها بأي حاجة و متخليش لروحها الفرصة انها تتوحشو و تبقى تخمم فيه ..
ريان غاضتو برشا وعرفها قداش فقدت مهدي كان يرى فيها تذبل قدامو (البريود لولة) .. ليلتها دخللها للبيت حط ايدو ع كتفها وقلها" موش تقول مشى مهدي يعني قعدت وحدك حط فيبالك انو مزال عندك خو بش يكون ديما معاك.. نعرف روحي منجمش نكون في بلاصت مهدي لكن نوعدك اني منيش بش نخليك لحظة.. "
قداش عز عليها وقداش وقف معاها ... شخصيتها لقوية و العذاب لي تعرضتلو حياتها الكل خلاها تنجم تتحمل و تكون قوية وفيسع تتجاوز .. و تتغلب ع ضعفها و وجيعتها..
كانت عايشة و كل يوم تقدم و تتبدل عالنهار لي قبلو .. واللي في القلب في القلب ميعلم بيه كان ربي ..
تتعذب من داخل.. ومتخلي شي يأثرلها على حياتها مالبرة ....

ليلة من الليالي كانت راقدة في بيتها قامت ع صوت صياح و بكاء هبطت تلقى الدنيا مقلوبة لوطة و الامبيلونس دخلت لوصت الدار .. تشوف فيهم هازين سي يوسف .. الهام تبكي و تعيط و ريان يجبد فيها .. ساقها معاش حاملينها مشات تجري بدنها الكل يرعش و جها صفار مالخوف كانت تسأل شصار و مرعوووبة لتسمع خبر خاااايب .. ..
سي يوسف ليلتها جاتو جلطة طاح داخ بالوقت..

بقاااو عايلة كاملة في الكلينيك ليلة كاملة يستناو فيه وهو تحت العملية قلوبهم واقفة وجوهم صفرة و دموعهم هابطة كالمطر ..
مصعبها ليلة ومخيبها .. ميراال كانت معنقة خالتها و تبكي بالشهقة منجمتش تسكت ..وصل ريان يسكت فيها ويهدي فيها تقولش عليها هي بنتو موش هو .. كانت تكنلو معزة و حب كبير عمرها محستو راجل خالتها و برا..
تعداو سوايع و سوايع .. لين خرج مالعملية و تعدى مرحلة لخطر و دخلوه للبلووك.. قعد ايامات بعد خرج و حطوه في شومبر نورمال.. كان مزال تاعب برشا يتكلم بالسيف ويتحرك بالسيف اما طمنهم الطبيب ..
مخلاوهش لحظة كانو كل يوم معاه يمشي حد يجي حد .. ميرال كانت كل يوم تتعدالو مالقراية تفطرو و تضحكو و تبدلو الجو .. تبقى تقرالو كتاب .. و تروح و تزيد ترجع هي وخالتها في الليل ..

نهار كانو دايرين بيه الكل ميرال ع يمينو و الهام ع يسارو ..نوال و ريان .. نجلة و خوه و مرت خوه ..

لين تحل الباب و دخل ...
.....مهدي...

✴✴✴✴