✨🤍احببت ابن خالتي 🤍 ✨

🌟الحلقة 38...🌟

💫🌻💫

تعدات ليامات جات الهام و يوسف تفجعت كيف شافت ايدها في البونداج وحلتها في مهدي قالتها لي هي تعاركت معاه شوية طاحت عليها..
بعد بأيامات تحسنت ميرال و كيف رجع سي يوسف شد الخدمة قرر مهدي انو يعمل فاكونس هو زادة يبدل فيها الجو و حب يهز معاه ميرال بش تتفرهد لكنو مينجمش يهزها و يمشيو وحدهم ..  دونك اقترح عليها بش تمشي معاه وقلها بش تقول لمنى تجي معاهم .. و كيف سمع احمد لسق و قلو ماشي معاك اصلا بطبيعتو مينجمش يعمل جو من غيروو ..
فرحت ميرال بالفكرة و طول كلمت منى
-يا سخطة حظر روحك بش نمشيو نعملو فاكووونس
-هههههه فاش تحكي اما فاكونس
-مهدي قلي حضر روحك بش تمشي معايا و قول للمنى تمشي معانا
-هههه تحكي بجدك؟؟؟!
-تي اي مالا نفدلك
-ههههه و وين !!!
-قلي بش نمشيو للفرانسا و بعد بلاصة اخرى نسيت اسمها.. هاو لاهي يريچلي في اوراقي و البسبور ... اما زعمة خالتي تخليك
-اي باااز وانت خالتي الهام تخليك نعرفها تخاف عليك
-ههه اصلا مزلنا مقلنالهمش تي بربي مدام مهدي قرر شكون بش يقول لا ...
-ههههه باه بش نسألك
-اسأل
-توا مهدي قلك قول للمنى تمشي معانا ولا انت تقرر وحدك منحبش نبان رامية روحي
-لا والله هو وحدو وحدو قلي و زيد صاحبو ماشي معانا اما متقولش خاطر هو مقليش ...صاحبو قلي نحكي انا وياه عالفايسبوك😂

قبل المشية  بنهار قعد مهدي يحضر في ڨاليزو و حال الكام و يحكي مع سارة
-بالرسمي حبيتك تمشي معايا و الله نعملو برشا جوو
-تعرفني نخدم حبي منجمش هوكا احمد معاك متهنية عليك و نحبك كل يوم تكلمني و تحكي معايا كام
-اي بااز
-مهدي
-نعم
-رد بالك ع روحك و ديما حط في مخك لي انا نحبك بررشا .. مطولش
-تهنى عزيزتي
هوما هكاكة و دخلت ميرال طول تخرنن كيما عادتها
-مهدي معرفتش شنهز معايا دبش صيف ولا شتاء ياخي
-متهز شي تو تشري من غادي
-اي هكا نفهمك
-ايجا هوني كلمت منى قلتلها بش تجي تبات هوني طيارتنا صباح بكري راو
-اي هاي جاية هي و خالتي نوال
مشات و رجع يحكي مع سارة
-مهدي ياخي ميرال ماشية معاك
-اي ربي صبرني هه
-و شبيك مقتلييييش مالا
-موش عارف فيبالي قتلك
-لا مقتليش عرفت بالصدفة معناها
- و شنوا المشكل توا شنوا لي مقلقك  مفهمتكش! بنت خالتي ماشية معايا و انا نسيت مقتلكش حسستني درا اش صار
-باه مهدي ربي وصلكم بالسالم رد بالك عليها عاد و حطها في عينك .. اعملو جو تنساوش
بقى ساكت مجاوبهاش لين علقت .. دخل كلامها منا و خرجو من غادي مكانش حاب يخلي شي يغششو ويبدلو المود حتى لو كان سارة..

🌟الحلقة 39...🌟

8 متع الصباح كانو في المطار .. مشات معاهم الهام و ريان وصلوهم و لونها معينهاش فيها هالمشية و قلبها مشغوب و في نفس الوقت حابتها تبدل الجو و تنسى استراس الباك و الاستراس لي كانت عايشة فيه قبل. ..لقاو احمد يستنى فيهم سلم اعليهم و قعدت ميرال تعرف فيه ع منى ..

طلعو في الطيارة ميرال كانت قاعدة بحذا مهدي و منى و احمد كانو بعاد عليهم شوية..
قعد مهدي و تلفت للميرال يلقاها مغمضة عينها و تمتم 
-شبيك !!
حلت عينها خزرتلو
-مهدي خايفة
-هههههه هرة عليك مالا
-اقعد رايض لتهر عليا لا نهر عليك احسب روحك متعرفنيش خيرلك
-فيبالك!!!
-فيبالي شنوا
-اخيب اكسيدون ينجم يصير هو اكسيدون الطيارة .. تخيل كان طيح بينا في البحر و البحر يبداو فيه قروش
-مهدي اسكت
-تنجم طيح بينا في البر زادة.. وقتها نتغفصووو و نتهرسووو تزيد تتحرق الطيارة نتبشمطو
وقفت حبت تبعد من بحذاه و ترتاح منو و من مصاطتو و بدات الاوتاس تحذر فيهم اللي الطيارة بش تطلع و بش يلبسو السانتير
جبدها قعدها و ركبلها سانتير متاعها
-توا اصعب لحظة الطيارة بش تطلع فيبالك تنجم تتقلب للتالي
بدات الطيارة تطلع و هي بدات تهلوس و تتخيل في كل سيناريو حكاهولها غمضت عينها و مالخوف ولات تصيح   ع طول صوتها من غير متشعر
-لاااا يا ربي منحبش نمووووت
يحط ايدو ع فمها يسكركولها و يبقى شادها بالقوي بش متنطقش
- فضحتنا.. يا بنتي نفدلك
كيف سيبها ضربتو ع صدرو و قامت تصيح
- ممصتككككك ابعدني متقعدش بحذايااااا امان ايجاو بعدوه قعدت تصيح و تعيط الناس الكل بقات تخزر و مهدي طبس راسو و حط ايدو ع جبينو الدنيا خلاتها و كيف تتسيب يعرف روحو معاش ينجم يسكتها.. لين جاتها l hôtesse
بش سكتت و هدات
-ستنى نوصلو منوريك
-اسكت تحكيش معايا كي نوصلو الساعة هذا كان ممتناش
- تموتش متخافش بسبعة رواح راك

بقاو مرة يتعاركو مرة يتفارعو هي تجي بش تغفى و هو يقومها يشيخ عليها يزيدو يتعاركو مرة يجبدها من شعرها مرة يلويلها ايدها كيف طول لسانها... كيف حست روحها سافا معاش خايفة .. دوروها ضحك كل مرة يتفلقو بالضحك ع طول صوتهم من غير ميشعرو .. اللي بحذاهم الكل تقلقو لوتاس بقات ماشية جاية عليهم ثلاثة مرات بش تنبه عليهم بش ينقصو مالحس.. اما الله غالب ميشدوش رواحهم.. الدنيا قلبوها .. مراضو كان كيف جبدت ميرال كتاب حطت راسها ع كتف مهدي و بقات تقرى و هو تكى راسو و رقد ..
اول مرة يتصرف هكا كان ديما يحترم غيرو و عامل بريستيج للروحو و ميحبش يقلق حد و لا يقلقو حد حياتو كاملة عداها في الطيارة ماشي جاي لكن اول مرة تتعدالو مشية هكا محسش بيها.. عداها كلها ضحك و فراع حديث سلفيات و فيديوات ...

اول مهبطو تلفتلهم احمد
احمد:-يهلككم خليتوها الطيارةماللي طلعنا وانا نسمع في حسكم خلي عاد ضحكتك يا ميرال للتوا ترن في وذني .. عملتو الفضح
منى:-هههه صحة ليكم عملتو جو تمنيت لو جيت بحذاكم والله
-ميرال: ابنتي اما جو ولد خالتك مدود ميركحش و زيد كلاني بالضررب شو ايدي بقات زرقة اللطف شيموت عالفراع السخطة
-ٱاا تحكي عليا ضهرلي!!
-سملا موش خليتك مشيت انت .. هه اصلا نفدلك راو --'
جبدها ليه و قعد يمشي معنقها
-ماكش بش تريض ياخي
-طالعتلك شتحبني نعمل

✴✴✴✴