✨🤍احببت ابن خالتي 🤍 ✨

🌟الحلقة 49...🌟

💫🌻💫

مشاو للرستو هبطو فطور و بقاو يفطرو .. مهدي و سارة رجعو يحكيو عادي و ميرال بقات تفطر و حاطة ايدها ع خدها هزت عينها ع غفلة ورات شخص مقابلها قاعد يفطر و يحكي مع صاحبو .. حست برعشة في بدنها الكل قلبها بدى يدق و وجها حمار و دخلت بعضها .. اكيد الشخص عمر موش حد غيرو .. قرابة تسعة شهر مشافتوش بعد اللي صار حست روحها نساتو و تجاوزتو و تجاوزت لوجيعة لي خلاهالها لكن اول مراتو تعادالها سيناريو كامل في مخها حست بوجيعة في قلبها بقات مهبطة راسها متحبش تخزرلو تحب تحسبو موش موجود ..
عمر لحظتها شافها هو زادة بقى حال فمو موش مصدق و اخيرا لقاها و شافها من جديد من غير ميشعر رمى الفرشيطة من ايدو و قام مشى للبلاصة لي هوما قاعدين
-ميييرااال!
كلهم هزو روسهم و خزرولو..
بلعت اللقمة و وقفت بقات تخزرلو
مهدي قام من بلاصتو و دارلو
-شتعمل انت هوني !!
-حاشتي بميرال و لازمني نحكي معاها
-مزال عندك عين وجاي تحل في فمك باين فيها التراحة متع المرة لي فاتت مرباتكش
بقات ميرال تخزر موش فاهمة شي على انا تراحة يحكيو ..
عمر فوت في مهدي و خزر للميرال
-ميرال اسمعني عندي برشا كلام نحب نقول هولك من بعد ليصار وانا نفركس عليك ملقيتكش لازمك تسمعني
شدو مهدي من شوميزو و دزو
-اقلب منظرك من هوني متخلينيش نغلط معاك
مشاتلهم ميرال و شدت مهدي
-مهدي سيبو يحكي خلينا نشوفو شيحب
-سكر فمك و طرس غادي معندكش كلام معاه
-ميرال تو تلقاني في **** نهارت لي تحب تسمعني بش تلقاني نستنى فيك غادي نخدم صباح كامل ..
يهز مهدي ايدو ويعطيه بونية في وجهو
-تو تعيا و هي جايتك يا $#* مزلت تحاول تقرب منها نمحيك واحد كيفك متستاهلهاش جاي توا تسخايل بش تلقاها تستنى فيك والله كي تخرى ڨلبك لنخليك دور بيها
ميرال و سارة بقاو يجبدو فيه بش ميزيدش يضربو صاح عليهم بش يخرجو من غادي.. هو بعد عليه و عمر جبد كرسي و جاء بش يقوم و يدمغو بيه و صاحبو جاء  بعدو و بقى شادو و هو يتحلف ويصيح حس روحو جن ..
هز مهدي مفاتحو و تلفونو خلص و تلفتلو بعد مسمع تهديداتو وكلامو
-تو تخرالي فيه
هذاكا شخسر عليه .. خرج و خلا الدنيا مقلوبة و العباد تخزر..(كيما كل مرة يقلبها الدنيا ويخرج صنعة ولا نجم ينحيها)

🌟الحلقة 50...🌟

حل الكرهبة و قلهم اطلعو طلعت ميرال و سارة بقات واقفة
-مهدي برى ع روحك انا بطبيعتي عندي قضية هوني تو بعد نكلمك
منغير ميناقشها خدم الكرهبة و طار ميرال كانت راكبة منتالي و هو كان يخزرلها في المراية كان يرى فيها كيفاش ترعش و داخلة بعضها و تاكل في ظوافرها
-شبيييييك! متقليش حاسة عليه سي الطحان
-مهدي موش وقتك
وصلها للدار طلعت تجري للبيتها و ترمات عالفرش حست روحها مخنوقة و موش فاهمة شنوا لي صار و مهيش فاهة روحها
يخلط عليها مهدي ويحل الباب بقوة يدخل ويسكرو .. اللي في الدار الكل بقاو باهتين .. كل مرة طالع واحد يجري
-قووووم بش نحكي معاك
-مهدي اخرج و خليني وحدي معيني في حديث توا
جبدها من ايدها و قومها
-ياخي مزلت تحبوو ولا شحكايتك
-مهدي اما حب متاعك بربي اخطاني
-مالا شبيك ماللي ريتو وانت داخلة بعضك شنوا حبيت تعرف شكان حاب يقلك للا قلبك معطاكش تمشي و متسمعوش
تكلمممم
-مهدي سيبني
-حابب ياكلك بكلمتين ويقلك راني نحبك منسيتكش راني نادم و سامحني و انت بش تمشي كالدغفة تصدقوووو .. عرفت علاش انا مخليتكش تحكي معاه خاطرو *** و موش راجل كان جاء راجل راو مخلاكش نهارتها
-مهدي يزي اسكت .. اسكت راك زدت كملت عليا خنقتني اخرج اخرررج
-هاني خارج اما والله وراس امك نسمع بيك مشيتلو ولا قابلتو في البلاصة لي قلك عليها متلوم كان روحك سمعتني... هاني ماني عامل شي ومنيش ماشيلو بش نعطي فيك الثيقة وبش نحسب شي مصار .. جرب تقابلو من ورايا..

سارة لحظتها مكان عندها قضية غادي لا شي.. رجعت و بقات تحكي مع عمر عرفت كيفاش تهدية و فهمت منو كل شي و خذات رقمو و وعدتو بش تعاونو الله اعلم شنوا ناوية تعمل..

ميرال بقات قاعدة عالفرش مستغربة من تصرفات مهدي و في نفس الوقت مستغربة من روحها شبيها متوترة و داخلة بعضها لكن الحاجة لي متأكدة منها انها معاش تحب عمر ..لوجيعة لي وجعهالها مستحيل تنجم تنساها ممكن هذاكة علاش تقلقت كيف شافتو و تفكرت حاجات متحبش تخمم فيهم.. كانت متأكدة انو عمر معاش يعنيلها شي مجرد ماضي و تجربة فاشلة و هو لي خطار انو يكون ماضي.. تمنت لو كيف مشاتلو وقتها قابلها بنفس اللهفة لي قابلها بيها ليومة نفس الخزرة لكن يا خسارة كل شي تكسر معاش تنجم تقبل فكرة انها ممكن تسامحو هو لي تخلى عليها و هي توا بش تزيد تتخلى عليه....
بقات تخزر للروحها في المراية و خذات عهد للروحها انها موش بش تخلي حاجة ترجعها للتالي.. دخلت غسلت وجها بدلت دبشها و بعد اقترحت عليها الهام بش تمشي معاها للخدمة تونسها بحكم متقراش..

مهدي وقتها مشى يخدم و عداه نهار كامل متوتر و ع عصابو واللي كلمو يشعل فيه..
روح للدار مع حكاية العشرة متع الليل قاتلو نجلة لي ميرال مع امو و مزالو لتوا ماجاو.. مكانش عينو بش يخرج مشى دوش و لبس دبشو و قعد في البلكون يتفرج في المطر كان الطقس بارد وقتها ذكرو في نفس النهار لي جات فيه ميرال للدارهم .. في ضرف عام ولات قريبتلو برشا تقولش عليه يعرفها من سنين ملاتلهم حياتهم و استانسو بيها برشا فيسع ما ولات جزء منهم و من عايلتهم .. اول مدخلت لحياتهم مكانش يتصور انها بش تولي قريبتلو للدرجة مكانتش يخمم حتى بش يحكي معاها شوية ولات صديقتو و رفيقتو و بير اسرارو .. ولات اكثر حد يرتاح كيف يبدى معاه اكثر حد يشيخ عليه ويسيب معاه هبالو.. يتفورخ و يتموصت و يعمل حاجات عمرو معملهم قبل ولا جاو ع بالو ..

قعد يراجع في روحو عاللي عملو ليوم مفهمش علاش ولا كيفاش خرجت منو كمية الغش هذيكة الكل .. ميرال موش صغيرة و تنجم تعمل الحاجة لي تختارها ويقلها عليها مخها زيد هذي حياتها و من حقها تعيشها كيما تحب هي .. هي الوحيدة لي عندها الحق انها تختار تسامحو ولا لا .. انها تختار ترجعلو و تنسى ولا لا.. مهدي كان عارف الشي هذا مفهمش كيفاش عطى لروحو الحق انو يدخل في حاجة كيما هذي .. ممكن كان خايف عليها وخايف لا ترجع تتوجع منو مرة اخرى ممكن يرى في روحو اكثر حد قريبلها يرى في روحو مسؤول عليها و في مقام خوها.. لكنو موش خوها ...
بقات برشا افكار دور في راااسو قعد يخمم مخو بش يترشق لكن الفكرة الوحيدة لي بقات مسيطرة عليه انو مستحيل يخليها ترجعلو و مستحيل يخليه يدور بيها ...

✴✴✴✴

لي تقرى تخلي جام بش نعرف قداه من وحدة تبع :*