✨🤍احببت ابن خالتي 🤍 ✨

🌟الحلقة 71...🌟

💫🌻💫

مدام الهام و سي يوسف قاعدين في الصالة كانو يتعاركو ماللي سمعت لي مهدي رجع لامريكا وهي بش تهبل.. وحطت اللوم الكل ع يوسف خاطرو خبى عليها.. هوما هكاكة و يدخل عليهم مهدي .. بقاو لثنين حالين فمهم يخزرولو موش مصدقين
-يزيو بلا عرك
مشاتلو الهام تجري عنقتو و تفلقت بالبكاء.. هكا يا مهدي تخمم تمشي منغير متقلي حتى.. والله بش تهبلني منين طلعت بيها هالطلعة توا ..
-باسها من جبينها محبش يتناقش فيه الموضوع هذاكا خاطر عندو موضوع ما اهم ..
تنهد و بعد تردد نطق خرج لكلام بالسيف ..
-قررت بش نعرس .. وبعد بش نسافر
يوسف: شنواااا
-لي سمعتو بابا و منحبهاش تطوال لحكاية نهارين اخرين و بش تمشيو معايا نخطب...
قصت عليه الهام
-شبيك يا مهدي اكاكة ياخي هو ساهل العرس.. لا طاح لا دزوه بش تهزنا نخطبو عالاقل قلنا شكوني الطفلة وعرفنا عليها
-سارة لي حكيتلك عليها قبل وموش لازم تتعرفو عليها انا لي بش نعرس بيها ..
سمع حس حاجة طاحت وراه تلفت شاف ميرال طالعة في الدروج تجري.. حس الدنيا دارت بيه محبهاش تسمع بالطريقة هذيكة.. تخلطت عليه معاد فاهم شي يهزها من شيرة تتكى من شيرة..
خزر للامو بغش -ياخي موش نورمالمون تقرى شبيكم مقلتوليش لي هي هوني
-توا وقت ميرال مهدي بش تهبلني .. قلي شنية هالطلعة لي طلعت بيها

مجاوبهاش هز روحو وطلع حب يخلط ع ميرال وصل قدام باب بيتها و حبس منجمش يدخل اش بش يحكي اش بش يبرر.. بش يقلها نفدلك عليك نهارتها تمشيش صدقت ولا بش يفضح سارة ام صغيرو الجاي ويقلها راني نحبك انت اما هي حبلت مني ولازمني ناخذها..
هبط يدز في روحو دزان و خرج ..

"اول مشفتو داخل بالكرهبة عيني حوالو طرت بالفرحة رميت لكتاب من ايدي منيش مصدقة.. لبست دبشي و هبط نجري .. وانا هابطة في الدروج نسمع في خالتي تبكي بعد سمعتو هو كيف قال بش نعرس !
بقيت واقفة و سمعت كل شي و يا ليتني مسمعت..
.. طلعت لبيتي محبيتش نراه ولا حبيتو يراني.. طلعت و ماني فاهمة شي كيفاه بش يعرس وانا من نهارين كان يقلي نحبك خلاني نحلم و نتخيل وحدي خلاني نصدقو بكلمتين خلاني نبدل احساسي ليه بكلمتنين خلاني نخمم فيه بعد ماكنت مسكرة قلبي و مخي ومنسمحلهمش يخممو فيه و يتجاوزو الحدود.. علاه عمل هكا علاه يلعب و يكذب ..
الحاجة الوحيدة لي مصبرتني اني ملقيتوش في الدار نهارتها انو مريتوش وقتلو متمشيش خليك معايا راني مستعدة نعطيك و نعطي لروحي فرصة ونكون معاك ... راو ضحك عليا وقلي شبيك دغفة فيسع متصدق .. كيما عادتوووو..
قلبي وجعني برشاااااا اما موش انا لي نضعف و نخليه يلعب بيا يزي متعذبت .. اصلا مصار شي.. ممكن كان شارب وموش واعي بش نحسب روحي مسمعت شي ..  بلعت ريقي قعدت نخزر لروحي في المراية و مخليتش دمعة تهبط مني.. اما والله موجوعة برررشا..

تعداو نهارين و خالتي لاهية من حاجة لحاجة تحضر لعرس ولدها البدري مخلات مشرات ومخلات محضرت كل يوم وهي من حاجة لحاجة سي يوسف موش هنا جملة كان منرفز منو و موش يحكي معاه.. وانا متسبلة بالقراية نعديه نهار كامل في الفاك نمشي الصباح نجي لعشية بش منراش اكا التحضيرات و منضطرش نخرج مع خالتي ونعاونها في القضيان

🌟الحلقة 72...🌟

ليلة الخطبة محبش يجيني النوم قمت في اخر الليل حسيت روحي مخنوقة والله كنت لاباس.. عايشة و متفرهدة في لحظة فرعسني يا راه مفرعس اكثر ماهو مفرعس .. دخلني بعضي منحبش نخمم فيه منحبش نحس لي نحس فيه يعرس ولا يقعد ياخي انا كنت ناوية عليه من اصلو.. (احساس خايب كيف تحس احساس ملازمكش تحسو)... هبطت نطلفح  دخلت للكوجينة و قعدت نطيب في قهوة و سارحة ..
لين سمعت صوت يناديلي
هزيت راسي قمت من سرحتي مفجوعة تلفت نلقاه واقف في الباب يخزرلي.. ااه يا ربي شمجيبو راني منيش ناقصة
دورت وجهي حسيت روحي تربثت طفيت عالقهوة .. حاولت نكبس روحي ع قد منجم صبيت قهوتي في كاسو ماللي مشى وليت نشرب فيه جبدت كرسي وقعدت ..خزرتلو بكل برودة دم بكل قوة وكل احتقار اما قلبي يغلي من داخل
-أهلا بالعرييس
رمى لمفاتح و جا بحذايا(قداش باين تاعب ومهموم اما بڨلا ليه )
-لازم نحكيو ميرال ..
-ههه شنوا شبيك زارب لف لف مخليتناش حتى نحضرو رواحنا بالباهي فيبالك انا للتوا مخطرت روبتي زح والله عيب عليك

تنهد جبد كرسي و قعد مقابلني
-ميرال يزي منيش ناقص يعلم بحالي كان لي خلقني وانت تجبد عليا بالدم البارد....سكت شوية وكمل:... عارف لي انت تصدمت نهارتها كيف سمعت بيا بش نعرس بعد لكلام لي قلت هولك اما والله مضطر ساعات الدنيا تحطنا في مواقف اقوى منا وم....
-يزي اسكت خليني نقعد نحترمك حتى شوية.. مزلت ماكش حاشم عروحك مزلت تحل في فمك و تجبد فاللي صار.. حط فمخك لي انت بالنسبة ليا جيست ولد خالتي لا اكثر لا اقل حتى كلمة خويا معاش تسمعها مني..  انا  مستحيل نخمم فيك وكلامك لي حكيتو دخلتو منا خرجتو منا نحلف عليك راك شارب ليلتها مخذيتش عليك ارتاح .. و ميهمنيش فيك تعرس طلق تسافر هذي حياتك ..

مهدي يحكي: خرجت و خلاتني قاعد في بلاصتي وجهي مشى الوان و جاء الوان تمنيت الارض تبلعني و منراش خزرتها ، طريقة كلامها تبدلت معايا قداش طحت من عينها قداش حسيت روحي تافه و ساقط .. كانت تحب تبينلي قداشها قوية ومعلبالها بيا لكني ريت فعينها غش اول مرة نراه كانت تحكي و ترڨل.. كنت حاس بيها موجوعة مني كنت عارف قداش مقلقها لي صار حتى لو متحبنيش الفازة مجاتش جملة...
  هلكت كل شي بيدي وقعدت.. غلط لعبت ياسر وعمري متوقعت روحي بش نتحط فموقف كيما هكا .. توا جاء الوقت بش نخلص ...

✴✴✴✴