✨🤍احببت ابن خالتي 🤍 ✨

🌟الحلقة 40...🌟

💫🌻💫

تعداو للاوتال خذات ميرال و منى بيت مع بعضهم و مهدي خذا بيت و حدو و احمد كيف كيف ..
اول موصلو رتاحو و في ليل بدى الجو و الشيخاااات خرجو بدعووو ليلتها و خلوها .. من غدوة خرجو عملو لبنات شوبينغ الدنيا الكل شروها و مهدي في جرتهم يخلص مسيكن..
عداو ايامات متتنساش اللي ميتعملش عملوه و لبلايص الكل مشاولها .. ع قد ما هوما مع بعضهم ع قد ما احمد يتقرب من ميرال و منى تتقرب من مهدي كانت اول مرة تعرفو بالرسمي اول مرة تراه يفدلك و قالبها الدنيا كان ديما مبدع بيهم و كل مرة يعمللهم مقلب.. اول مرة ترى جوو و تعرف قداشو انسان بحبوح و فدلاك و رجولي وفيسع تنجم تدخل معاه في الجو .. مهوش انسان صعيب و ديما كابس روحو و ميعجبوش لعجب و نرفوزي كيما كانت تسخايلووو..

فما ليلة خرجو مهدي و ميرال وحدهم و مقالولهمش حبو يتمشاو و يحكيو شوية لكن لا مشاو و لا حكاو ليلة كاملة عداوها يعملو في الفضح في الشارع مرة يقعدو في الكياس مرة يهزها فوق ظهرو و يبداو يصيحو ويغنيو  و يجريو و يتعاركو  وبطبيعة هذا الكل هبالها و هو سيب روحو معاها و عاش معاها حاجات اول مرة يعملهم ..
بعد مشاو بش يشريو حاجات
اقترحت عليه انو ياخو كادوات للسارة
-سارة تفرح بسلسة ديامون ولا كرهبة اما موش شكلاطة و وردة و كتاب كيفك ..
-اوووه يا ناري ..  وردة و معاها بوسة و حب صادق و كلام حلو خير من الف كرهبة تبعني و تو تشوف قداه تفرح ايجا نعملو حاجة رمزية مثال تصاوركم الكل من اول متعرفتو للتوا نعملوهم في البوم كتاب ذكريات تخلدو فيه حبكم
-هههههه يا بنتي سيب عليك نعرفها سارة و نعرف شنوا يعجبها و شنوا يفرحها لحكايات هذي موش جوها تو قبل منروحو ناخذلها حاجة تنجم تعجبها
-اومورك
-ايجا نشيخك شكلاطة بش نقعد من هنا لعام لقدام مرتاح منك
-ههههه اي حضر روحك معايا انا فماش راحة
بقاو يدورو في الماجازان و يقضيو خذات شبعة شكلاطة و شرات كتبة و مجلات جذبوها كانو يدورو و هي راكبة فوق كروسة القضية مرة يجري بيها و يسيبها مرة يعمل بيها فران تتقلب تجي ع وجها يبقى يرضي حاصيلو بدعو ليلتها كل بلاصة يمشولها لازم يخلو فيها اثر ..

بعد بايامات بدلو لبلاصة سافرووو و مشاااو يبحرووووو عداو ايامات في اوتال عالبحر كل يوم تبحير و شيخات .. ميرال كانت متعرش تعوم كل مرة يبقى يعلم فيها ...
نهار كانت هي و منى قاعدين ع الشط يحكيو و مهدي و احمد يعومو مقابلينهم ..
-ميرال هيا ندخلو نعومو معاهم
-لا اخطاني مدام مهدي يعوم انا مستحيل كان مزلت ندخل للماء .. تعرفو كيفاش يبدى يتموصت
-هههه ياسر نحسو عامل عليك جو
بقاو يحكيو لين خرجو لولاد
مهدي: شبيني نعيطلك متجاوبش
-مسمعتكش
-تتبهنس مطفية و عالفازة بش نعاقبك
جبدها من ساقها دخلها للبحر بالسيف
و احمد قعد يچحر بعد مشى قعد بحذا منى
-شبيه مهدي ميتصرفش معاك كيما يتصرف مع ميرال
-ممكن خاطر هي قريبتلو اكثر مني و عايشة معاه
-اما معندهاش برشا تعيش معاهم متحسش اللي فما حاجة بيناتهم
-منتصورش كان فما حاجة راي ميرال قتلي زيد مهدي عندو شكون
-وي سارة صحبتو نعرفوها ديما تخرج معانا
-يحبها مهدي !!
-ههه مهدي صاحبي عنا اكثر من 10 سنين و والله لتوا لا نفهمو
-ههههههه اي شنوا تحسو
-اي سافا معاها صحيح فما مشاكل اما اكثر طفلة حسيتو قعد معاها و حسيتو مالي بيها راسو
سكتت منى و هبطت راسها بقات تلعب بالرمل
-منى ياخي تحبووو مهدي يعجبك يعني!!
-ههه بطبيعة ولد خالتي راو
-عارفك فهمت سؤالي اما تتهرب مالاجابة هه ع راحتك
بقات ساكتة بعد تلفتتلو
-وانا نحسك لي انت مضروب في ميرال
-هههه منين جبتها هذي
-ههه ممكن انت متفيقش بروحك اما ياسر تخزرلها و مركز معاها و تحب تتقرب منها بأي طريقة و كيف تبدى مع مهدي تبوسو ولا يبداو يتفارعو و يلعبو نحس وجهك يتقلب و تدخل بعضك و تمشي
قعد يخزرلها بعد ضحك
-ههه للدرجة مشلق طلعت
-هههههههههه .. كان تحب نعاونك في حاجة هاني موجودة ميرال قريبتلي عاللخر ..
-لا مزال بكري

✴✴✴✴