✨🤍احببت ابن خالتي 🤍 ✨

🌟الحلقة 62...🌟

💫🌻💫

من وقتها هي زادة ولات متجنبتو ولا قول عاملة روحها متجنبتو وهو عامل مولا المول موش هوني معاش يسأل ولا يبتبت في شي علاقتو بيها ولات صباح الخير ولا ليلتك زينة..
حط في مخو انو يبعد ويثبت لروحو انو ميحبهاش والي الشكوك متاعو مجرد وهم و حتى كان صحيحة لازم يتغلب ع روحو و ميخليهاش تكبر.. حتى مرواحو للدار نقص ورجع مهدي متع قبل يشوفوه مالليل لليل..

ميرال كانت كل يوم تكبر و تحلى قدامو كانت في كل مرة تحاول تستفزو تعمل اي حاجة تعرفو ميحبهاش رجعت تحكي مع احمد بونتو فيه عملت برشا صحاب اولاد ولات تخرج مع صحابها يسهرو كانت تعمل اي حاجة بش تخليه يتنرفز ويقوم يصيح كيما كان قبل ويقلها مزلت نراك تعمل الحاجة هذيكة تلوم كان روحك كانت حابة تشوف مهدي متع قبل.. لكنها نساتو كيف يحط حاجة في مخو ..

كان متحكم في روحو وحاسب روحو موش موجود وموش يفدلك كيف قلها راني معاش بش ندخل فيك.. لكنو كان يسأل عليها من بعيد..يطلب امو يتأكد انها روحت ولا، ويشوفها تستحقش حاجة ..و يحاول انو ميقابلهاش يروح اخر الليل و يخرج بكري..

نهار تعدى للدار 8 متع الليل بش يبدل دبشو ويخرج عرضتو هابطة في الدروج حاطة الحطة.. مكيجة لابسة طالون وعاملة مشطة هابطة تتبختر و تحكي في التلفون كانت كل مرة يزيد يحسها كبرت وحلات انوثتها كانت طاغية كل حاجة فيها تعشق ..
قعد يخزرلها لين هبطت تعدات بحذاه تبسمتلو و كملت مشات كأنو موش موجود قعد واقف..لين خلطت امو مدتلها فلوس وباستها
-عزيزتي تحب نوصلك انا ولا كيفاه
-لا هاي صحبتي بش تتعدالي تقلقش روحك
-باهي رد بالك ع روحك تو كل مرة نكلمك خلي تلفونك محلول
-هههه يا خالتي متخافش راني موش صغيرة
من غير ميشعر قرب بحذاهم خزر للوقت قرن حاجبو و سألها
-فين ماشية
-anniversaire sahebty
قالتها و تتسومم واثقة من روحها وعارفتو موش بش ينجم يقلها شي..هو لي خطار انو معاش يدخل..
-وين تسكن صحبتك؟
-نسيت اسمها لبلاصة مكانش راني قتلك
هيا باي باي
باست خالتها و خرجت لقات صحبتها كانت تستنى فيها البرة
-مهدي ولدي تعشيت ولا نحطلك؟
-فاش قام منها هالسهريات علاش مخلينها تمشي!!!
-عاد شبيه خليها تبدل الجو زيد نعرفها الطفلة
خرج و خلاها مزالت تحكي منجمش يشد روحو بقات الهام تناديلو مفهمتش شبيه و سي يوسف كان قاعد في الصالة ضحك و كمل يقرى في كتابو موش هوني..

طلع في الكرهبة وخلط عليها قعد يتبع فيها لين وصلت ڨارا الكرهبة بعيد وقعد يشوف فيها وين دخلت ومع شكون.. كانو برشا كراهب و كل مرة يهبطو ولاد باينة سهرية كبيرة ومخلطة.. محملش يبقى في الكرهبة هبط ومشى حب يشوف الجو من داخل يشوفها مع شكون قاعدة و اش تعمل وصل قدام باب الڨيلا وقف شوية و رجع طلع في كرهبتو و مشى
"فيييق يا مهدي فيق وسيب الطفلة وتلهى في روحك.. اش ايهمني انا توا وين قاعدة ومع شكون و فاش قام نتبع فيها وخالط في جرتها وعامل هذا الكل مهيش صغيرة ومعندو ميصيرلها ولات مسؤولة ع روحها انا معندي ممدخلني فيها ... فيق زح فييق...."
كان يحكي مع روحو و داخل بعضو معاش يحب يتصرف بالطريقة هذيكة لكنو مينجمش يتحكم في روحو .. بقى يدور بالكرهبة يحس في روحو مخنوق مرجوه صحابو بالتلفونات سكر التلفون و مشى قعد عالبحر سارح وضايع يخمم في خوفو و غيرتو ع ميرال لي ولات مقلقتو يخمم في سارة لي حاس روحو قاعد يكذب عليها و معاش يحس تيجاها بحتى مشاعر اصلا قاعد يكذب على روحو قبل كل شي ويقنع فروحو بيها ...
تعدى الوقت يجري محسش بروحو .. بعد طلع في الكرهبة وملقى روحو كان رجع للفيلا.. قعد يشوف في الوقت ويستنى فيها بش تخرج..
حتى لين تهنى عليها روحت و وصلتها صحبتها قدام الباب

✴✴✴✴