✨🤍احببت ابن خالتي 🤍 ✨

🌟الحلقة 60...🌟

💫🌻💫

تعداو 3ايام ميرال كانت في دار خالتها و مهدي عايش عادي غاطس في الخدمة و في اخر لعشية يخرج هو و سارة ولا يمشيلها.. (كان حابب يملى وقتو ويرجع يدخلها لحياتو ويقنع روحو انو هي الانسانة لي حبها وتحبو و مفما حد غيرها )
ليلتها كان متكي حاط ايدو ورا راسو و هي كانت راقدة ع صدرو قعد سارح شوية و قرر انو يتكلم
-سارة مع شكون كنت قبلي انا
هزت راسها خزرتلو مستغربة اول مرة يسألها عالماضي
-مكنتش قبلك انت
-جاوب عاد
-انت اول حد في حياتي مهدي
-ههه تسخايلني سيدي تاتة قدامك
-شقصدك
-قصدي اني منيش انا اول حد في حياتك و نحب نعرفو شكون السيد لي كنت معاه .. من حقي نعرف المرة لي فاتت محبيتش نسألك
-...
-هاو قتلك حد
-تستبله فيا معناها..
-مهدي عيشك يزي
جات بش تقوم و هو جبدها
- كي انت مجربة علاش  قبل كيف كنت حابب نقرب منك كنت تدخل بعضك و تتهرب و تولي ترعش نقول خايفة و موش مستانسة و ماكش كيما لبنات لي عرفتهم محبيتش نضغط عليك خليتك ع راحتك رغملي مكنتش مرتاح برشا نحس فيك ياسر بعيدة و جامدة معايا اما تعجبني فيك الحاجة هذيكة واحترمتك.. و عطيت لروحي وعد اني منقربلكش كونش كيف تبدى انت راغبة...شوية هه...
-اخرررررج عليااااا اخرررج قامت تصيح و تعيط..
-راني منيش نحاسب فيك انا سألتك مجرد سؤال.. خاطر حسيتك كذبت عليا... قصت عليه كلامو طاحت في القاعة و تفلقت بالبكاء
-مكذبتش عليك اما مكنتش نجم نخليك تقربلي لا انت ولا غيرك..
-باهي قوم توا و يزي بلا بكاء ..
- كيما اي طفلة حبيت شكون .. و بعد مقضى بيا حاجتو وشبع بيا.. رماني بأتم معنى الكلمة.. من وقتها معادش نجم ناثق في حد و معاش نحب نحب ولا نتعرف ع حد.. انت بيدك قتلي عجبتني خاطرك صعيبة و موش بالساهل وصلتلك... كيف عرفتك حبيت نعطي لروحي فرصة حبيتك لكن في كل مرة انت تحاول تقربلي انا منجمش نخاف و منغير منشعر نبعد ... كانت تبكي و تخرج في الكلام بالسيف
قعد ساكت بعد قام لبس دبشو و مشى حذاها..
-مهدي برى و خليني وحدي عيشككك
-حابب نحكي معاك
-مهدي اخرج اللي تحب تسمعو هاك سمعتو واللي تحب تاخذو هاك خذيتو سافا
-فاش قاعدة تخرف ياخي!! بلكشي تسخايلني قاعد نستغل فحبك ليا سارة راك انت بالذات مستحيل نخمم نلعب بيك وانت تعرف الشي هذا
بقات ساكتة مجاوبتوش بعد دخلت للسال دوبان وخلاتو ضرب ايدو عالحيط وخرج...

🌟الحلقة 61...🌟

تعدات اكثر من جمعة لومور كانت مكركبة بينو و بين سارة محبش يضغط عليها..
ميرال مزالت في دار خالتها كان كل ميحل instagram تعرضو تصاورها اول وحدة كل مرة في بلاصة هي و دار خالتها كانت باينة متفرهدة و عاملة جو و نسات حاجة اسمها مهدي و غشو و عركهم..
يحس حاجة فقلبو توجع فيه يتمنى يجبدها مالتصويرة ويحطها بحذاه يعاركها يقلها كيفاه تمشي و متشاورش يقلها كيفاه تبطى و تقعد ليامات هذي الكل وهي تبوسو و ترضيه كيما عادتها توحش يراها دور في الدار و تعمل في الحس توحش يخرج للجردة يلقاها غاطسة في التراب تزرع غي نبتة جديدة توحش وين يتلفت يلقاها غاطسة تقرى في كتاب و تاكل في الشكلاطة لكن هذا الكل احساس في قلبو مينجمش يخرجو احساس مقلقو يحب يتخلص منو يحاول كل متجي ع بالو يتفكر كان الحاجة الخايبة يحاول ميخممش فيها و يقنع روحو انها معاش تعنيلو شي..
نهارت لي روح و لقاها في الدار حس روحو تفرهد و تهنى.. لكنو كان متجنبها لاقصى درجةو كل متجي العين في العين يڨحرلها تولي تقلب وجها.. ولات كل متبدى شايخة و تضحك و تحكي هو يدخل و هي تتقلب و تسكت و تشد بيتها تعدات أيامات عالحالة هذيكة رجعت تقرى كانت كل يوم تمشي تقرى و تروح مهدي نبه على الشوفور بش يهزها ويجيبها و ميخليهاش تستنى دقيقة..

لكنها هي توحشتو هو توحشت تخرج تلقاه يستنى توحشت تحكيلو شعملت و اش معملتش توحشت دلالو و بلادتو توحشت لهوتو بيها و حتى غشو توحشتو.
تعدى شهر كامل متبدل شي لين نهار هبطت بش تشرب شافتو قاعد يتكلم في الجردة مشات منغير متتردد قعدت مقابلتو بقات تستنى فيه حتى يكمل تلفونو و هو كيف شافها و عرفها تستنى فيه بش تحكي معاه حس روحو تربث شوية منجمش يكمل يحكي علق و خزرلها
جبدت كرسي وقعدت مقابلتو
-مهدي حابة نحكيو
-تفضل نسمع فيك
-تي يزي بلا غش و انسى بركا والله من نهارتها لحكيت معاه احمد خلينا نرجعو كيما قبل تعرف انت شنوا بالنسبة ليا مفما حد ينجم يكون في بلاصتك.. نعرف روحي غلط اما والله اخر مرة اصلا شكون عندي غيرك بربي..
كانت تحكي و داخلة بعضها معرفتش كيفاش تفسرلو و تبينلو قداشها متوحشتو و قداشها نادمة.. مهدي قعد يخزرلها تمنى يعنقها لحظتها ويقلها راني متوحشك  انا زادة متوحشك ... راني منجمش نتغشش منك انا جيست غاضتني و محملتش نحس روحي شخص ثانوي في حياتك..

-ميرال شوف انا نحبك برشا واكتشفت اني انا شخص كيف نحب حد نوجعو برشا نحسو متاعي نولي نتحكم فيه لين نخنقو كيما تقول انت.. نولي نخاف عليه بزايد و نحصرو ...وانت راك تقعد بنت خالتي لليوم وغدوة وكيف تستحق حاجة بش تلقاني بحذاك اما متنتظرش بش نرجعو كيما قبل مالمستحسن نبقاو بعاد هكا خير احسن ليك و ليا و بأقل مشاكل..
-مهدي انت قاعد تتهرب مني موش متحبش تعمل مشاكل

قعد ساكت هو كان عارف انو قاعد يتهرب يحب يبعد عليها ويخليها تبعد عليه حس قربهم ياسر لبعضهم بش يضرهم نهار ..حس روحو تعلق اكثر مالازم و لازمو يحط حد لازمو يفيق ويعرف انها صغرونتو و في مقام اختو موش حاجة ملكو و تابعتو يغير عليها حتى مالنسمة...

قام هز اوراقو و البيسي و ميرال قامت تصيح
-برى عروحك اما والله لعدت ندور بيك برا زمر محسوب تو نموت كيف تبعد سيادتك.. شكرهتكككككك
تلفت خزرلها و مشى معمل حتى رياكسيون هز راسو يلقى بوه واقف في البلكون عطاه خزرة وراها برشا معاني كأنو حب يبينلو راني منحبهاش و هاني بش نبعد عليها مرة وحدة..
دخل و ميرال رجعت قعدت عالكرسي حست روحها مخنوقة ضربت الطاولة ورجعت تسب فيه

✴✴✴✴