✨🤍احببت ابن خالتي 🤍 ✨

🌟الحلقة 67...🌟

💫🌻💫

قعد ساكت بدنو تكبس بش يهبل بعد خزر للاحمد
-اكا $*# وينو ماللي سمعت باللي عملو  و انا قالب عليه الدنيا ملقيتوش
-بعثتو من هوني تهنى عليه قمت معاه بالواجب و سارة مشات ع روحها بربي سيبناااا مالحكايات الفارغة والله تكسر في راسك لثنين ميستاهلوش بش تبقى تخمم فيهم
بقاو ساكتين جابتلهم الخدامة زوز قهاوي بقاو يتكيفو.. و كل واحد سارح في همو...
-مهدي
-...
-آا نكلم فيك وين سارح
-شتحب
-هه مدامك قصيتها مع سارة علاش متعطيش لروحك فرصة اخرى مع وحدة تحبك ، وحدة منك وفيك بنت اصل رباية و زين... متأكد انك تنجم تحبها كان تعطيها فرصة
-حسستني قاعد مع بابا
-ههه بالرسمي نحب نكون فاعل خير
-فوتني موش وقت تفدليكك الماصط تواااا
-تي اسمعني عالاقل والله نحكي بجدي هه
ڨحرلو مهدي و قعد يتكيف موش هوني.. يعرفو صاحبو كيف يبدى يجيب و يجلب
-شوف بش نحكي.. انت دورها لحكاية في مخك و ركز اومورك..
علاش متخممش في بنت خالتك مدامها تحبك زح مشلقة عاللخر.. اعطيها فرصة تقرّب منها متأكد بش تعجبك ماكش بش تلقى ما خير منها زيد وقيّت بش تعرس و نرتاحو منك
احمد كان يحكي و مهدي حابس يخزرلو مزال موش مستوعب الجملة لولة لي قالها..
-شبيك باهت مقلتش حاجة عيب
-م .مفهمتكش!.. شكون قتلي
-بنت خالتك شلقت بيها تحبك زدت سألتها و تأكدت
مهدي لحظتها حس قلبو بش يخرج من بلاصتو موش مصدق لي يسمع فيه حس السخانة طلعتلو لراسو طفى الدخان بلع ريقو و خزر لاحمد ضحكة ترسمت ع وجهو من غير ميشعر.. كان يحكي بالسيف و داخل بعضو:
-ك.كيفاه وقتاه يعني قتلك! شقتلك؟
-ههههه كان مجيتش نعرفك راني شكيت فيك عاشقها وانا مفيباليش!!
باهي يا سيدي عمناول كيف صيفنا مع بعضنا شلقت بيها وقتها حسيتك انت قريب من ميرال عاللخر وهي لا كيف بديت نسأل فيها عليك حسيتها من حديثها تحبك و كيف سألتها قلتلها تحبو تربثت و دخلت بعضها ...
قرن حاجبو وخزرلو مستغرب
-تحكي ع منى ياخي انت
-تي اي منى بنت خالتك! يا. ياخي عشكون نحكي من قبيلة!
وقف مهدي وجهو حمار و لخلخ بدنو تكبس حس احساس موش عادي فرحة كبيرة في قلبو مكانش يتخيلها ميرال تتطلع تحبو حاجة عمرو متوقعها  في لحظة تكسر كل شي فاق من حلمتو مشات فرحتو حس بوخزة خايبة في قلبو هز مفاتحو وخرج طول طلع في كرهبتو ومشى.. حل الشباك بش يدخلو لهوا حس روحو تخنق لحظتها وين تأكد من حبو ليها لحظتها وين حس و فهم قداش ولى يعشقها ضحك ع روحو وعالحالة لي ولى فيها عمرو مكان يتصور انو يوصل يحب طفلة بالدرجة هذي و شكون ميرال.. ميرال لي كان حاسبها  صغرونتو هار عليها.. ميرال لي مقبلش وجودها معاهم اول مجات.. ميراااال .. قداش ولى يعنيلو الاسم هذا.. قداش ولى يعشقو.. قداش تعبوووو ..

🌟الحلقة 68...🌟

ميرال روحت اخر لعشية مالفاك تاعبة دخلت البيت بدلت دبشها غسلت وجها وخرجت.. دخلت لبيت مهدي كيما عادتها ماللي مشى وهي غايضتها منو قداش تحس في روحوها وحدها قداش متوحشة وجودو بحذاها متوحشة تخرنينو عالصباح متوحشة حسو حس تلفونو لي ميسكتش متوحشة مهدي يدخللها لبيتها يطل عليها يجيبلها شكلاطة ويشوفها شناقصها... بقات دور في بيتو تشم في ريحتو لي توحشتها.. و تشوف في ادق تفاصيلو بعد هبطت قعدت مع العايلة اللي ولات تحسها عايلتها وتحس في روحها وحدة منهم.. جدها كان غادي ليلتها هو زادة ستانست بيه و حست روحها بدات تحبو لكنها منساتش موضوع امها وناوية بش نهار تجبد معاه الموضوع ومتسيبو الا متفهم كل شي.. تعشاو و طلعت لبيتها قرات شوية بحكم الدفوارات متع اخر العام قربو.. بعد طلعت لفرشها جبدت كتاب لبست ليناتها و غطست فيه هي هكاكة دق الباب و دخل ريان
-ميرال مهدي لوطة يعيطلك
-مهدي!
-اي كلمني توا قلي هاني قدام الدار قول لميرال تهبطلي
-شبيه مدخلش
-ممكن متعارك مع بابا هيا قوم البس واهبطلو ليبدا يتهز ويتنفض عليك
سكرت لكتاب كانت لابسة روبة مع الركبة متع دار سامبل رمات فوقها جيليةوهبطت.. لقاتو في الكرهبة يستنى فيها متكي راسو عالكرسي فيقو حس الباب كيف تحل طلعت بجمبو و بقات تخزرلو .. هو زادة قعد لحظات يخزرلها مهبطش عينو
- شفما؟
خدم الكرهبة و مجاوبهاش
- وين هازني

-مهدي موش وقت هبالك مقلتش لخالتي اني خارجة زيد غدوة نصبح نقرى وعندي نوم
اصلا ماو لباس جاي انت ماك مشيت شمزلت تحب عنا معاش تعنيلي شي انا وحدة مالناس
ع فكرة متتصورش قداش رتحت كيف مشيت
رتحت منننننك ومن همك و من مشاكلك
نشاء الله تكون عجبتك حياتك الجديدة وعامل جو من غيري.. من غيرنا قصدي..
نشاء الله تاكلك لحيوط
بقات ثنية كاملة توذري مسكتتش تحس في قلبها معبي عليه مهدي كان فاهمها..
وقف الكرهبة قدام دارو و هبط دار حللها الباب
- اهبط
-منيش هابطة روح بيا منحبش لا نحكي معاك ولا نرى دارك ولا شي روح بيا
-ميرال يزي بلا عناد واهبط..
-شتحب مني
جبدها من يدها هبطها حل الباب و دخل و دخلها معاه بقوة و سكر الباب
-تفهم كان بالقوة ياخي
چحرتلو تكات عالباب و بقات ساكتة
-متغشة مني؟
-هاو قتلك راك معاش تعنيلي شي دونك لعدت نتغشش منك ولا نتوحشك ولا نحبك ولا يهمني فيك كيما انت معاش مهتم بيا سي مهدي بن عبد الله
جبدها ليه وبقى شادها بقوة
-عارفك تكذب..
-مهدي ابعد ااي سيبني وجعتني
سيبها و هي قامت تصيح
-جايبني علاش توا شتحب ماك جبدت روحك كهو ابعدني انا زادة معاش نحب نراك ولا نحكي معاك نحب نستانس نعيش منغيرك معاش نحب نستانس بدلالك وبعد من اول غلطة تبعد عليا تخليني وحدي وانت تغرم في زمانك تخليني موجوعة.. كل حد نحبو يخليني ويمشي معاش نحب نتعلق بحد..
بقى ساكت يخزرلها عينها رغرغو وجها حمار حسها قداش متقلقة و فادة قداش تعاني من داخل وحاسة روحها وحدها..
حط ايدو ع فمها سكتها
-منين طلعتلي ياخي!! علاه دخلت لحياتي .. والله كنت عايش مرتاح...
نحاتلو يدو قرنت حاجبها و بقات تخزرلو .. زاد قرب منها
-ميرااال تقبل انك تكون مع واحد كيفي

-شقصدك مفهمتكش!
-تقبل انك تكمل حياتك مع واحد كيفي
-مهدي روح بيا غدوة نصبح نقرى منيش ناقصة هبالك واسئلتك الفارغة معاش تكلمني و روح بيا
قام يصيح في وجها رعبها
-جاااوبني
-اوووف مهدي.. لا لاااا اكيد لااااا اخر حاجة ممكن نعملها في حياتي اني نكون مع واحد كيفك.
-علاش!
-هكا منجمش نكمل حياتي مع واحد كيفك بالسيف
-عطيني سبب واحد
-مهدي شبيك ياخي فاش تخررف علاش هالاسألة هذي
-خاطرني فاسد!؟ نشرب، و عندي برشا علاقات مع بنات! ااه ولا خاطرك تخاااف مني ..!؟ ولا على خاطرني ضاربو فروحي كيما تقول انت .. ولا خاطرني منقراش كتب كيفك .. خاطر مناش فرد مخ ولا خاطر مناش قراب في العمر.. شنوا السبب شنوا الحاجة لي تخليك مترضاش انك تكون معايااا
بقات حابسة تخزرلو موش فاهمة شبيه حستو عبد اخر زاد شدها وقعد يخضخض فيها
- خاطرني tout simplement عمري ما خممت فيك بالطريقة هذيكة مهدي انت بالنسبة ليا خويا لي مجابتوش امي كيفاش تحبني نجاوك ع سؤال كيما هذا.. فيق زح وين تحب توصل
-نعن د******** منيش خوووك افهمها منيش خوووك
سيبها عدا ايدو ع شعرو بعد خزرلها وحاول انو يحكي بالشوية
-باهي وكي تولي تخمم فيا بالطريقة هذيكة.. كيما انا نخمم فيك....
قصت عليه كلامو كانت داخلة بعضها ومصدومة هو يقرب وهي تبعد
-مهدي فيق امان.. ياخي شارب ولا شحكايتك هالليلة..
- .. نعرفك ذكية و نتصورك راك فاهمتني ..انا..
-مهدي عيشك خليني نروح و متكملش تتكلم خير متزيدس تفسد لي بيناتنا اكثر ماهو فاسد زح يزي كل مرة تزيد.... قرب منها عاللخر لسقها في الحيط نفسهم تخلط ببعضو كان يخرج في الكلام بالسيف بصوت مبحاح فيه رعشة
-لا بش نتكلم .. بش نحكي و نقول لي في قلبي و نرتاح.. مفماش علاش بش نبقى حابس لداخل!!! مقترفتش ذنب انا

✴✴✴✴