أشرقت شمس يوم جديد لينهض الجميع إلى عمله وتحديدًا عواد الذي طلب منه عبدالقادر بالرجوع وقطع أجازته
وها هو الآن ينزل من أحد المواصلات العامة ليدخل الجامعة متنهدًا يقول في ذكر زوجته الراحلة: حتى العربية اللي من ريحتك يا رباب راحت.. عوضنا على الله
ثم دلف للداخل
بينما داخل قاعة المحاضرات
دخل أكرم يلهث بقوة فقال زاهر متعجبًا: اي يابني أنت جاي جري ولا اي؟
هز رأسه مجيبًا يجلس ملتقطًا أنفاسه يقول بتعب: كنت عند طنط أم عامر بشوف إن كانت عايزة حاجة.. ما تبدل معايا يا عم أنت بيتك أقرب.. بدل مانا طول النهار في سبق الخيل دة!
ضحك زاهر يقول ساخرًا: عمر قال خليني في بيت عابد أحسن عشان عارف إني لو روحت هعلق المزة
وكزه أكرم بضيق يقول محتدًا: احترم نفسك واتكلم عن أم صاحبك عدل
مسد زاهر مكان وكزة أكرم له يقول بضيق: مش قصدي يا عم دي قد أمي.. هو عمر وزعنا كدة عشان هي عارفاك أنت وحاج مجدي عارفني أنا.. وكل واحد ليه عند التاني عشم.. فاهبط بقى واسكت.
جلس أكرم إلى جانبه يقول براحة: صحيح.. سمعتهم بيقولوا دكتور عواد قطع أجازته وراجع.. يا أخي الواحد فرحان عشان سعاد دي مش هتمسكنا
أخرج زاهر هاتفه يضحك ساخرًا: خسارة.. دة أنا كنت ظبطها
رمقه أكرم بانزعاج يقول: أنت محتاج تتربى يالا.. أقسم بالله أبوك لازم ينفضك ع اللي بتهببه دة.. أنت بتعمل اي في تليفونك وسايبني أهاتي يا زفت
سأل أكرم الأخيرة بضيق فقال زاهر بتهكم: بكلم عمر أشوفه اتأخر ليه.. اشهد إني برن عليه أهو عشان آخر مرة دفعني حق الرصيد
رمقه أكرم بازدراء يقول: أنتو عالم معفنة أصلا
توقفا عن الحديث حين دخل عمر من باب القاعة ليتوجه إلى حيث تجلس سيدرا يقول باستياء: أنا عايز أفهم حصل اي عشان اللي بتعمليه معايا دة؟!
رفعت رأسها قبالته تقول بآلية: محصلش حاجة يا عمر
فقال هو منزعجًا: اومال بتتهربي مني ليه يا سيدرا.. امبارح طول اليوم برن عليكي عشان نكمل تدوير وأنت ولا أنت هنا.. دة أنا كان ناقص أروحلكم البيت وأترن علقة محترمة من أبوكي
وضعت خصلة من شعرها خلف أذنها تقول بهدوء وهي تكتب في الورقة أمامها: كنت تعبانة ومقدرتش أرد
نظر لها حانقًا ثم قال: لو كلمة بحبك بتتعبك أوي كدة اعتبريني مقولتش حاجة.. بس بلاش الطناش دة
رفعت عينيها تجاهه تقول وقد ظهر انزعاج صوتها: عمر أنا..
قطعها مهمومًا: أنا عارف.. عارف إنك بتحبي عامر..وعارف أنك عمرك ما قولتي لحد بس كان بيبان عليكي.. عنيكي فاضحاكي يا سيدرا.. مانت مبتوفيش لمعة عنيكي لما بتتجاب سيرته بتبقى عاملة ازاي.. لعلمك عامر مش بس صاحبي عامر أكتر من أخويا واتمناله الخير وبدعي ربنا كل يوم إني ألاقيه وأثبت برائته وأشوفه بخير.. بس يعز عليا إنك تعرفي أنه مش بيبادلك مشاعرك ولا بيبصلك بنفس اللمعة اللي بتبصيله بيها
أنت تقرأ
الصفر والواحد والتسعة ♡• (مكتملة)
Mystery / Thrillerعندما يقودنا عقلنا الباطن لمستنقع الواقع.. بل ويقحمنا في أحداث قد لا نملك بها صلة.. ينتهي بنا الأمر مشتتين نبحث عن الطريق الصحيح.. طريق تعلو به كلمة الحق وتدنو فيه لفظة الباطل.. وفي ذلك الطريق نقابل الكثير من التحديات والصعاب وأحيانًا المخاطر.. لذلك...
