الواحد دايما شايف عجب العجاب في الدنيا دي
حاجات مش ممكن تتصدق ولا يخطر في البال انها حصلت.. او انها موجودة اصلا
كل فتفوتة في كل مجال في الحياة فيه شئ من العجب
انا مثلا كدكتور في كلية الهندسة
بشوف حاجات يا جدع!
دة كفاية ورق الطلبة والهبد اللي بيهبدوه
العقل البشري دة بيوصل البني ادم لأعلى قمة جبل
او لحيطة سد
بس اللي أنا شايفه قصادي في النيلة الورق دة
بيدل على ان الرؤية هباب وإن ربنا يسترها عليها
ساعات مستمرة من التصحيح
كنت بصحح بضمير لدرجة إن إجابة الولد اللي قدامي في الورقة دي كانت هتجلطني الصراحة
كان فاضلي تصحيح 3 ورقات وابقى أتميت مهمتي بنجاح
وطبعا لأن المستقبل الباهر اللي أنا شايفه لمصر على ايد خيرة شبابها من مكاني هنا.. قدرت احكم عليهم بأنهم اكيد ميفرقوش عن سابقيهم
قلعت نظارتي الطبية ورجعت بضهري لورا اريح رقبتي من وضعها الغير مريح
قررت اعمل قهوة واكملهم عشان ابقى خلصت من شللي
وانا قايم من ع المكتب وبطرقع فقرات ضهري المسكين المغلوب على امره في قعدة غير مريحة بالمرة زي قعدة المكتب لمحت إن اول ورقة في الوش من الثلاثة مش عليها اسم!
أو بمعني اصح مكتوب عليها رقم وبس
رجعت للورقة تاني عشان اشوف ايه الهبل دة
اكيد استهتار الطلبة موصلش بيهم لمىرحلة انهم يكتبوا ارقام بدل اساميهم
الورقة مكتوب عليها رقم صفر
وكأنه بيستفزني عشان اديهوله فعلا واشيله المادة
مسكت الورق وانا حاسس إن الدفعة دي لازم تتأدب ولكني اتصدمت لما لاقيت الورقتين اللي وراها عليهم ارقام بردو مكان خانة الاسم!
مش فاهم الصراحة هما دول كانوا تلاتة اصحاب مثلا
فتحت الورق وانا حاسس اني هتشل فعلا.. دول اكيد مش شباب المستقبل.. احنا كدة بنروح في داهية
واحد يكتبلي صفر على ورقته والتاني يكتبلي واحد والثالث ناقص يكتبلي ثلاثة والله عال ماحنا في الملاهي!
ايه دة..دة طلع رقم تسعة مش ثلاثة
انا لازم اتابع مع دكتور هادي من تاني مكنش ينفع ابدا اسيب دكتوري النفسي وانا عايش وسط البهايم دول
فتحت أول ورقة في وشي اللي كان مكتوب عليها صفر
كان مكتوب جملة واحدة في كل الصفح
وهي
"الصفر اقوى الارقام"
استغربت الجملة.. ملهاش معنى يعني.. من ناحية ايه بنحكم ع الرقم اذا كان قوي ولا ضعيف؟!
قلبت الورق لقيت كله مكتوب فيه نفس الجملة لحد ما وصلت لآخر صفحة
فركت عيني أتأكد إن اللي أنا شايفه دة بجد مش هزار
ولكنه كان فعلًا أمر واقع!!
فتحت الورقتين التانيين وكانت بالنسبة ليا صدمة!
ورقة واحد مكتوب فيها
"الواحد ألمع الارقام"
وزيها في باقي الصفح.. من ناحية ايه بقينا نحكم ع الارقام.. من امتى واحنا بنحط بينهم مقارنات.. على ايامي كنا بنستخدمها لفك معضلات المسائل
وورقة التسعة مدون عليها..
كان نفسي أعرف ايه اللي فيه بصراحة لكني ملحتقش
لأني حسيت بالأرض بتلف من تحتي وتوازني بيختل ورجليا مقدرتش تشيلني أكثر من كدة
وقعت ع الأرض مش قادر أتحرك جسمي كله مشلول وكأني في حالة جاثوم!
كل اللي أنا شايفه ورقة الطالب صفر وورقة الواحد والتسعة وهما طايرين قصادي على سقف الغرفة!!
أنت تقرأ
الصفر والواحد والتسعة ♡• (مكتملة)
Misteri / Thrillerعندما يقودنا عقلنا الباطن لمستنقع الواقع.. بل ويقحمنا في أحداث قد لا نملك بها صلة.. ينتهي بنا الأمر مشتتين نبحث عن الطريق الصحيح.. طريق تعلو به كلمة الحق وتدنو فيه لفظة الباطل.. وفي ذلك الطريق نقابل الكثير من التحديات والصعاب وأحيانًا المخاطر.. لذلك...
