_خلاص يا حبيبي خلصت.. خلاص معدش قدامنا كتير على حلمنا.. مقدامهومش فرصة ولا مكان يقدروا يستخبوا فيه مننا.. لما تلاقيهم خلي رجالتك ينفذوا وساعتها كل حاجة هتبقى ملكنا.
كان ذلك صوت أفعى ناعمة عبر الهاتف تتوعد بإثارة الفساد في الأرض والقضاء على ثلاثة شباب كالورد يتمنى أهلهم العودة فقط لينيروا منازلهم من جديد ليبتسم الطرف الآخر مؤيدًا كلامها ويضحك كلاهما على دنوهما من تحقيق أهدافهم
وفي مكان آخر.. كمم عواد فم تلك التي تصرخ يقول بهلع:
أرجوكي اهدي وأنا هفهمك كل حاجة
وعبارته المتوترة تلك هي ما جعل فريال تنظر له برعب أكثر فهمس معتذرًا: أنا مش عارف اقولك اي أنا آسف فعلًا.. أنا هشيل ايدي وهفهمك كل حاجة ارجوكي متصوتيش
هزت رأسها بالإيجاب عيناها ترتجفان بقوة ليبتعد هو عنها تدريجيًا فصرخت هي بعلو صوتها: يا لهوي الحقوني حرامي!
كمم فمها مجددًا يقول بحنق: يا ستي والله ما حرامي أنا دكتور محترم.. أنا كنت جاي بخصوص طالبة عندي اسمها عنود الطحان
اهتزت حدقتاها بشغف تنفض يديه عنها تقول بلهفة: أنت تعرف عنها حاجة
تنهد يعدل من وضع نظارته على عينيه يقول باستياء: لو حضرتك ساعدتيني هعرف وهقدر أوصلها بإذن الله
بللت فريال شفتيها تقول مستنكرة: بس أنت مين ياخويا ودخلت هنا ازاي
ارتبك عواد ثم تحمحم قائلًا بكذب وهو يضع عينيه أرضًا: أنا دكتور عواد الهياتمي دكتور في كلية الهندسة وبالنسبة لدخلت هنا ازاي ف احم.. حضرتك كنت سايبة الباب مفتوح.. أكيد الظروف اللي انتو فيها مخلياكي مش مركزة.. بعتذر عشان دخلت بس قلقت يكون جرى حاجة للي جوة
_يعني أنت متأكد إنك مش حرامي؟
سألت فريال فأجاب عواد مستهجنًا: طب أنا راضي ذمتك يا ست.. هو لو أنا حرامي هقف أتساير معاكي.. دة أصلًا منظر حرامي.. حرامي ببدلة! ليه داخل أسرق الملك فاروق؟!
رمقت استياءه تقول بضيق: طب ياخويا متتظرظرش عليا.. بس أنت عارف الوقت متأخر وأنا ست وحدانية وأظن حضرتك فاهم
تحمحم يعدل من وضع نظارته على عينيه يقول بارتباك: فاهم طبعًا.. بس احنا لازم نلاقي الولاد في أسرع وقت عشان كدة محتاج منك معلومات يمكن ألاقي طريقهم
_طب اتفضل في الصالون.. هعملك قهوة وأحكيلك اللي أعرفه يمكن ربنا يرد الغايب
قالت الأخيرة بقلب داعٍ فتحرك عواد أمامها إلى حيث الصالون لا يعلم لما يبحث بضراوة هكذا!
________
في أحد المنازل في المدينة.. حيث حل الليل والجميع قانط في بيته
نهض عمر عن الأريكة المقابلة للتلفاز بعد أن رأى صور زملاء دفعته في نشرة الأخبار تعلن عن هروبهم من العدالة بتهمة الإشتراك في قتل مصممة الأزياء سلوى فهمي وتشيد الشرطة بمكافأة لمن يدلي على مكانهم.. أغلق التلفاز بضيق ليقول والده ساخرًا: مش دول العيال الصيع اللي كنت متلم عليهم أهم قتلوا قتيلة وضيعوا مستقبلهم
أنت تقرأ
الصفر والواحد والتسعة ♡• (مكتملة)
Mysterie / Thrillerعندما يقودنا عقلنا الباطن لمستنقع الواقع.. بل ويقحمنا في أحداث قد لا نملك بها صلة.. ينتهي بنا الأمر مشتتين نبحث عن الطريق الصحيح.. طريق تعلو به كلمة الحق وتدنو فيه لفظة الباطل.. وفي ذلك الطريق نقابل الكثير من التحديات والصعاب وأحيانًا المخاطر.. لذلك...
