#صفيه
مر اسبوع كامل من فقت من الغيبوبة، ال ما كان في حد عارف سبب ليها، دخلت فيها فجأة وفقت منها فجأة.
اغرب حاجه إن أول ما فقت كنت حاسه إن بس مشتاقه ليه، محتاجه ليه، وعايزة اشوفه، بس هو شكلو صراحتي الزايدة ما عجبتو لما قلت لي أمي تقول لي عايزة اشوفه.
اتصل بي امي اليوم الثاني و اعتذر عن الجيه وطلب منها تسلم على وتتعذر لي عنه، حتي ما كلف نفسو يتكلم معاي، وصل سلامه و اعتذارة لي عن طريق أمي، خت بيني وبين حواجز، و أشخاص، ود ال هو من الأول كان بيقول ما عايزه يحصل.
ياربي يكون ده عشان هو خجلان مني، بعد تصرفه الأخير!..
ولا يكون بينتقم مني!..
مستحيل يكون انتقام هو ما كدا؟!
عارفه إن زول كويس، بس ما مفهوم، متناقض ب شكل يجنن، مره يقرب و مره يبعد، وانا ضايع في نص تزبزبه ده.
لما قمر تحكي لي عن إن كان بيقضي كل اليوم معاي، و بيفضل يقراء لي ويسرح لي شعري ،و يتكلم معاي.
بحس قلبي بيرفرف وبيطير فوق فوق شديد، بس لما افكر في إن حاليا هناك مع مرتو، و عارف إن فقت و عامل رايح، بضايق وبزهج شديد وبكره.
بس أمي بتقول لي الغايب حجتو معاه، وبتقول لي ما تحكمي عليه واصبري لما تلاقي عديل.
امي بقت حاسه بأن بقيت بكن لي محمود مشاعر، وبقيت مقتنعه ب الزواج ده.
المشكلة أن ما قلت ليها اي حاجه تخليها تعتقد ده، بس شكلو بقيت مكشوفه شديد.
مش بيقولو المشاعر ما بتندس؟..
ده بس الحصل معاي.
المحيرني في نفسي، كيف قدرت أحبو ب السرعه دي!..
وانا يدوب بتعرف عليه!..
ثم كيف قدرت احبو وانا حابه عباس!..
بس اكتشفت إن عمري ما حبيت عباس.
صدمتني الحقيقه دي في الأول، بس لما تمشي لي الموت و تجي راجع بترجع شخص تاني،شخص شاف كل مسيرة حياته، شخص قابل نفسو، وعرف كل أخطأوا ،شخص عرف الحقيقه.
فل أنا العرفتو إن علاقتي مع عباس ما كانت إلا حوجه لي الحب و العاطفة الكنت فاقدها، كنت محتاج احب حد، بس ما يكون بيشبه أبوي، وهو كان مختلف، حد يصبر على وهو صراحه كان صبور، شخص نظيف و جميل وطيب، بس القدر كتب لي اتزوج غيرو و احب غيرو و كمان اكتشف إن ما كان مشاعري ليه نابعه من إحساس حقيقي بل حوجه.
هل كنت محتاجة اعيش كل التجربة دي عشان اكتشف نفسي و افهم مشاعري؟..
ماعارفه، بس العارفه إن ح اسيطر على نفسي و ما ح اقول لي محمود ب التطور العاطفي الجد في حياتي ب النسبه ليه، امكن لو كان جاء في نفس اليوم الصحيت فيه كنت ح اكون شفافه و حساسه وكان ح يلاحظ براهو، بس فترة السبع يوم دي خلتني ارجع أفكر واصل لي إن مشاعري انا ما مهمه اذا هو ما كان عندو لي مشاعر، ح اخلي كل حاجه تمشي زي ما المفروض تمشي، بدون مقاومة بدون عناد، ونشوف ح نصل لي وين؟..
