مفاتيح القدر (اسرار دفنت خلف الأبواب)

part 6

رواية مفاتيح القدر (اسرار دفنت خلف الأبواب)
للكاتبه M. A. M

چان ممكن
‏اغنية تدزها الية
‏تگلي اسمعها تعجبك
‏وارد ماحب الآغاني اني احبك
‏و چان ممكن تنتبه عينك علية
‏لو شفت تغيير بية
‏ولو زعلت وياك يوم
‏وگلبي شاغ وضاع ودة
‏چان ممكن گلبي يتقشمر بوردة
‏كلشي بيدك چان ممكن
‏وانت ما قدمت لليهواك كلمة
‏وين تلگاني بعد مابية انطرك
‏اني شامة ودنيتك يفلان
‏ظلمة ..
باختصار كلشي مُمكن

﴿أريج﴾

مرت ٣ ايام بسرعه رجعت سويت التحاليل و الحمدلله هم جانت سلبيه انطوني اجازه اسبوع اجه ليث و رجعني للبيت اول ما وصلنا فتحت يسار الباب نزلت من سيارة و حضنتها كلش مشتاقه الها شفت ماما طالعه من البيت هيه و ريتاج ركضت و حضنتهم اول مره ابقى بعيده عنهم هلكد اشكد جنت مشتاقتلهم سلمت على خالي و عمتي و محمد حتى ضياء و عائلة جانوا موجودين كعدنه كلنا بالاستقبال و محمد و يسار كعدوا يلعبون طوبه مثل عادتهم و صياحهم يوصل لسابع جار الكل جان موجود بس مكان عابس خالي قبل لا نطلع من مستشفى ليث سال الدكتور عن حالته كال احسن من اول بس بعد لازم يبقى ١٢ يوم هم

ام ضياء ـ هسه لو عابس هم موجود ويانه جان كملت لمتنه

بجت و كالت ـ مشتاقتله كلش
ليث ـ يمه لا تبجين بس يطيب اني بيدي اجيبه الج و نذبحله خروف هم
ام ضياء ـ ان شاءلله
خالي ابتسم لعمتي و كال ـ و نروح نخطب البنيه يالي يحبها و نسويلهم احلى عرس بعد شتردين
ـ الله و اشوف ابني واكف  بملابس عريس يوم منى هذا
ضياء ـ السالفة صارت بيها عرس لعد خل اخابره هسه يرجعلكم مثل الحصان

بقوا يضحكون و اني اباوع عليهم واحد واحد و گلبي يأذيني من لحظتها عرفت مشاعري اتجاه عابس مو مشاعر صدقاء و اخوه لا هاي مشاعر حب اول مره احسها اتجاه شخص و هذا شخص هو عابس حب من طرف واحد [ دائماً جنت اسمع انو الحب من طرف واحد مثل مرض خبيث يقتل الواحد بهدوء دائماً جنت اكول مستحيل اوگع بـ مثل هيج غلط تاليتي وگعت بدون مادري] هو يحب غيري و حاجي لاهله عليها و اني گلبي هنا يحترك من وراى عفتهم و صعدت لغرفتي قفلت الباب و بقيت ابجي بكل قوتي

ـ بحياتي ما توقعت سبب سعادتي نفسه يصير سبب بحزني

بقيت ابجي لحد ما نمت و ما كعدت غير ثاني يوم
باوعت لساعه جانت ٧ طلعت من غرفتي و رحت للحمامات غسلت وجهي و باوعت على نفسي و كلت

ـ انتي قويه مستحيل يهزج شيء الحب شغله تافهه لا تخلين نفسج اسيره الها أبداً انتي كامله لوحدج و ما محتاجه لأحد حتى يكملج

شجعت نفسي بنفسي صرت اني سند لنفسي نزلت لطابق اول الكل جان نايم كعدت احضر الريوك الهم و اني احرك بالبيض حسيت احد حضني من خصري عفت طاوه و نداريت بسرعه