مفاتيح القدر (اسرار دفنت خلف الأبواب)

part 9

رواية مفاتيح القدر (أسرار دفنت خلف الأبواب)
للكاتبه M. A. M

"ويرهقني أنني مليئ بما لا أستطيع قوله"

﴿ يسار ﴾

كلتها بصعوبه ـ بت حازم..... زهراء حازم راضي

ليث ـ يسار صدك تحجين من وين عرفتي

ـ تدرس ويايه بنفس كليه

ـ باعي بنيتي بس اخلص شغلي اجي يمج و نتفاهم

رديت بسرعه ـ لا لتجي لانو عندي محاضره هسه من ارجع لاقسام اراسلك

ـ تمام اني هم لكيت شغله اريد اسوالفها وياج

ـ تمام ليث

ـ يلا رجعي لقاعتج و لا تبيني الها انتي تعرفيها تصرفي بشكل عادي تمام و حاولي تتقربين منها بلكت من خلالها نوصل لابوها

ـ تمام

نهيت الاتصال و بقيت افكر احس القدر بدأ يفتح الأبواب بوجهي بدت الحقيقه تطلع...... شلون ما اكدر راح احاول ارجع حق بابا

رجعت لقاعه جان الاستاذ داخل و كاعد يشرح

يسار ـ شلون يوم هذا...... هسه هذا هم يرزلني لانو تأخرت

بقيت واكفه كدام الباب و الباب جان مفتوح واحد من طلاب اشرلي ادخل اخذت نفس و دكيت الباب و دخلت

ـ اسفه استاذ بس

قبل لا اكمل كالي ـ لا تعتذرين بنيتي ادخلي

دخلت بسرعه و كعدت يم البنات

تاج بهمس ـ رجلج شلون صارت بس لا احتركت

ـ لا زينه

فتحت الكتاب و كعدت اسمع حجي الاستاذ جان يحجي عن كتاب دستوري بشكل عام جان الاستاذ مبين علي جبير يطلع عمره بنص ٤٠ هيج و كلش حباب

ـ اني ان شاءلله من باجر على برنامج meet ابدي وياكم بس اريد تحضير زين

جاوبنا ـ ان شاءلله

واحد من طلاب كال ـ استاذ معرفتنا على نفسك

ـ اني دكتور طه و اكيد عرفتوا راح ادرسكم الدستوري

بعدها طلع الدكتور و حجت تاج

ـ كون كل يالي يدرسونه مثله حبابين هيج

زهراء ـ امين

بعدم اهتمام كلت ـ شكلج نسيتي طردت الصبح

ـ اووي أزل لا ذكريني

أزل ـ هسه شنو خلصنه

زهراء ـ اي بس بقى نروح ناخذ الجدول و ايميلات الجامعيه مالتنا و نطلع

تاج ـ تمام ديلا خل نروح

رحنه و جان اكو طلاب هوايه وكفنه نتظر يجي دورنه
زهراء بسرعه دخلت و استملت مالتها وطلعت بقت واكفه ويانه اشويه و دك تلفونها