مفاتيح القدر (اسرار دفنت خلف الأبواب)

part 10

رواية مفاتيح القدر (أسرار دفنت خلف الأبواب)
للكاتبه M. A. M

اريد ارجَع لأيام الطفولة
الصَعب مالتها ينحَل بسهولة
اريد ارجع والمَّن كل طفل كُون
وأنصحهم واگلهم لاتكبرون.

باوعت على اسمه مكتوب (أ. أدم ال.....)

باوعت على البنات و كلت بخوف ـ اترحمُ عليه

ياسمين ـ لا شدعوه هلكد خايفه منه

مينا ـ هو انتي تعرفين منو أدم..... احنه ما اذكر جان يدرسنه واحد اسمه أدم

ياسمين ـ لج خبله أدم هذا استاذ جديد صارله سنتين من اتعين و يدرس مرحله اولى احنه ملحك علينه

مينا بصدمه ـ عزااا بس لا قصدج هذا الطويل و بي شوية سمار و دائماً يلبس قاط و ٢٤ ساعه عصبي

تاج ـ لا الحمدلله مبقيتي بي شيء هاي عود مجنتي تعرفي لو تعرفي شنو تسوين

مينا ـ لج انجبي بس غير دائماً اشوفه بالكليه
بس ازول اني اكلج لا تخافين منه أبداً اني ماخذه قاعده بحياتي كل شخص عصبي داخله طيب و حباب

حاولت ابين نفسي قويه كدامهم و كلت ـ منو كال اني اخاف منه.... يعني شنو راح يسوي على سبيل مثال

ياسمين بضحك ـ ميسوي شيء بس ينطيج المقسوم من رزاله و يكلج الله وياج

أزل ـ ترا مضحك

تاج ـ لا تخافين اني اجي وياج و خل يرزلنا عادي اصلا تعودنه علي احنه

أزل ـ لج منو كال خايفه و لا راح اخاف اني اكو ورايه ٤ زلم اشحده يالي يحجي ويايه

ياسمين ـ و الله عفيه عليج

خابرلي محمد عفتهم و رديت

ـ الو ها محمد

ـ يلا انزلي اني منتظرج يم المديره

ـ تمام

سديت من عنده و ودعت البنات اخذت جنطي و نزلت محمد اول مشافني اجه حضني و باسني من راسي

ـ لك هلا بـ يسار البطل

ضربته على ايده و كلت بصوت ناصي ـ لك أزل... عود من نطلع من هنا صيحلي يسار

ضحك و كال ـ والله مشتاق لسوالفج

ـ اني اكثر

طلعنه من الاقسام و صعدنه بالسيارة جان جاي بـ سيارة صديقه اول مشتغلت التدفئه بسرعه نمت عبالك صارلي قرن منايمه و نسيت سالفة تبليغ

كعدت على صوت محمد يكول ـ لج كعدي شوفي دخلنه لذي قار

عيوني مغمضه كلت بصوت شبه مسموع

ـ ذي قار ولدج عياله

ـ لج بعدج تتذكريها

فتحت عيوني و كلت ـ شلون انسى هذيج الايام بالنسبه الي جانت احلى ايام و تعلمت منها هوايه