حمامتي السمراء

البارت الثامن

حمامتي السمراء ل شفاء آل سالم

زينب
""""""""
الوقت : ٩:٩ ليلاً
التاريخ والزمان : ٢٠١٥
المكان : حديقة سمر
""""""""""""""""""""""""
"إنها إحدى الليالي
التي يحاولُ فيها المرءُ
أن يواري جسده الهزيل المرهق
بين ثنايا الليل؛
هاربًا من نزيفِ قلبه،
محاولًا تلاشيه
قبلما يغرقه."
-منار خليل
""""""""""""""""""""""""

جنت نايمه وملتفه بطانيتين الجو بارد ثلج
  گعدت ع صوت اختي الي جانت عبالك تحچي بسماعة جامع 
- سمر دزت عليج تگول خلي تجي ضروري وبسرعه
- صوتج ناصي عليه  بعد جيرانه مسمعوج

جانت الساعه ب٩ بالحصار  لا تلفزيون ولا تلفونات وننام بالوقت الي تقل الهاونات علينا وماكو هجوم نسوي سباق دنلحگ لو منلحگ  الكل جان مدد بفراشه حتى الي مبي نوم يدفي نفسه لان نفط ماكو ولا كهرباء  حتى نشغل صوبات ونتدفى اغلب الوكت نخلي حطب بالمنقل ونلتم عليه كلنا حتى نتدفى 
بيتنا جان مليان ناس لان عماتي وعمامي يجون يمنا بالليل ووكت القصف اني كلش ارتاح واحس بالامان من نلتم  سوا ومو بس اني جنت احس هيج كلنا جنا هيج نحس اذا احنه سوا ميصير شي مو زين او ع الاقل نموت كلنا سوا
بالگوه گمت من فراشي واني اعرفها لو ماكو شي متدز عليه لفيت الشماغ على چتفي وطلعت جانت الدنيا ليل ف محد يشوفني رحت اتمشى بعدني توي وصلت الحديقه انسحبت من ايدي وانسد حلگي عضيته وعاط
-حسام : اول مره ادري بيج عنيفه
-زينب : واني اول مره ادري بيك قطاع طرق
- اني گلت لسمر تدز عليج
- گعدتني من النوم
- يابعد روحي اسف
- لا  تتأسف شبيك  مو بينا بس احچيلي شكو خوفتني
- لتخافين بس صار ظرف طارئ ولازم اروح التحق  باجر صاير عليهم هجوم  وفاقدين هواي وماعرف شوكت نرجع جيت اودعچ واوص.....
- اششش لتحجيها الله يخليك
- مو قصدي يروحي بس الدنيا وحالها والوضع مشتد كلش وكل يوم دنخسر  مئات الشهداء ما عدا الجرحى
بچيت ولمني بحضنه وهاي چانت اول مره يحضني وزاد البچي مالتي بحضنه چنت خايفه يروح وميرجع  واخسره وهو اول دگة گلب واول حب الي وهو الي ساندني ومصبرني وجوده ع الوضع الي احنه بي  چان يضحك بصوت عالي واني ابچي حد ما وگعت دمعته على خدي عرفت انه چان يبچي ميضحك بس چان يتظاهر

- لو ادري بيها حضن جات من زمان جيت اودعج

كل مايحچي يزيد ونيني وعياطي وهو دموعه تنزل
اني بحضنه يدندن بأذني   
- اندعيلي بالسلامه
كون ارجعلك واجيك
جفني بطل من منامه
روحي ضلت بين ايديك
رايح اني وهاك روحي
خلها يمك يم جروحك
دير بالك مو عليها
دير بالك على روحك

حضني قوي حسيت ضلوعي راح تطلع من صدري بس محچيت لان چنت خايفه تكون اول مره النا هي اخر مره بقيت هيج بحضنه  بالنص ساعه بس ساكتين ونبجي

- حسام : يلا كافي مسحي دموعچ اريدچ قويه لان قوتج تقويني وبضعفج اضعف ومكاني الي حروحله يحتاج قوة
- لتعوفني
- معايفج وحق الله بس على مودنا بلكت نخلص منهم الله ياخذهم
- وانو شنو ذنبي
- مو ذنبي ولا ذنبج بس احنه عراقيين ذنبنا ما يمنا لا حكومه ولا سياده  الرايح والجاي متدخل بينا  شعب خلص عمرنه خساير وفدوات
ختلت بصدره واني ابچي رفع راسي
-اطلب منچ طلب
هزيت راسي
- عيوني
- سالمات كون وميشوفن غيري
-  محد ماليهن غيرك لتخاف
- يروحي اريد اخذلج صوره بموبايلي
- وبهذا شكلي
- احلى بنت تشوفها عيوني بدون مبالغه ابتسمي 
- بس خلي اتعدل
اخذلي صوره واني عيوني مورمه ونص مغمضه ونص مفتحه وشكلي مال وحده جانت مدده دتنام

- اشوفها
- تجنن والله
- يي قصدك تخوف باوع الوجه والكفشه يربي
- هييي لتحجين على حبيبتي
- صدگتك صدگتك
- حمامتي ممكن طلب الاخ
- امممم كثرت الطلبات
- اخر طلب والله
- عيونها
- اموت بعيونها انا
- احمممم واني
- شبيچ
- اموت عليككك
- يايابه ع هالدلال يوميه اروح اداوم 
- لتتشاقه هيج گلبي يوجعني
- سلامة كلبچ يا بعد گلبي  مو قصدي بس اريدج توعديني تنتبهين لنفسج واريدج قويه مثل مااعرفج
- منو گلك اني قويه انت قوتي وبعدك يكسرني حسام
-  اششش لتعيديهااا حمامتي دومها قويه اني اعرفها اكثر منج
- راح  احاول والله
- واني اعرفج كدها
- طلب اخير اقصد امر
- كول دنشوف وين توصل
- انطيني شماغچ البنفسجي واخذي شماغي الوردي
- بي عطرك
- يي بي عطري واني كلي بي
- فدوه لكلك اروح 
-يلا كافي لازم تروحين تأخرتي واني  رايح للولد اليوم دوري بالحراسه وبلكت يصير مجال اروح لاهلي لان الله يشهد  ما سلمت عليهم جيتج ركض

ها صدك وقبل لا انسى هاي رساله الج من اروح اقريها كتبت الج اشياء بيها

ضاگت بيه الدنيا ورجعت ابچي

-اوعدني تنتبه لنفسك وترجعلي وكلشي مابيك
- مو بيدي بس راح اوعدج احاول ارجع  وانتي همات لطلعين من البيت اخاف يصير قصف او هاونات
- تمام ترا احبك اني
- فديت اليسمعون كلامي  واني احبچ 

راح وهو يمشي بالعكس يمشي ليورا ويباوعلي  يمشي على كيفه واني سويت مثله ومطلع من الباب الا اني وصلت البيت
ركضت على الفانوس الي بالغرفه اخذته للحمام وسديت الباب

                      الى ابنتي قبل ان تكون حبيبتي

- هاي مو اول مره راح اروح لمناطق خطره وكل مره اروح اگول ياربي اني الشهيد القادم ويزفوني بتابوت وعلم ويگولون استشهد وهو يدافع عن وطنه وحقه بس اول مره اخاف اروح هناك ومو خايف على نفسي الله شاهد خايف اروح وما ارجعلج اخاف اعوفچ اخاف اموت وتنسيني اخاف احد يأذيج بغيابي اخاف لا تبچين واني ماموجود امسح دموعج اخاف من كلشي  عليچ حتى  اخاف من الهوا لا يلعب بشعرج وهو حصتي ....... واذا صار ومرجعت تدفنيني وشماغج ينحط على گبري ولتنسيني ضلي زوريني ترا اشتاقلج ولو صار وزوجتي وهاي الكلمه گوه كتبتها بعد مامسحتها ١٠٠ مره سمي ابنچ حسام اضمن متنسيني  او يذكرج بيه كل ما تصيحيه احبچ هواي حمامتي انتبهي لنفسج وابقي لابسه شماغي شال براسچ حتى  اكون وياج بكل خطوه  احبج يا بعد روحي وهلي

                      الى لقاءً اخر اذا مو بالدنيا بالجنه

فتحت الماي فتت جواه بملابسي بدون وعي حضنت نفسي وبديت ابچي  مااعرف شگد بقيت حد مااندگ الباب
-زينب وينج نريد الفانوس يلا
بصوت مبحوح ومخنوگ
-جيت

بهذاك اليوم اجذب اذا اكول حسيت بالماي بارد او حسيته طفى النار الي بصدري چنت فاقده الاحساس بكلشي وفاصله عن الدنيا كلها وبين عيوني حسام وبس
طلعت على كنتوري اغير ملابسي اجتي هديته  بوجهي جانت ساعته الي يحبها وميذبها من ايده ابد شلتها وخليتها بيدي غيرت ملابسي وعلى فراشي بسرعه غطيت راسي وحضنت شماغة واني مختنگه ابچي واشهگ بدون صوت جان بودي ابجي واصرخ بعلو صوت عسى ولعل ارتاح بس مكدرت كتمت كلشي وبجيتي جانت خانگتني لان مااريد احد يسمعني ماعرف شوكت نمت بس نمت واني ادعي لرب العالمين  يحفظه الي ويرجع سالم معافى وميوجع گلبي بي يارب لتختبرني بي او تختبرني بفقده بعد ما دگ گلبي اله وتعلقت بي  يارب لتكسرني بحسام ......

"‏وددت أن أعود طفلة
لأن الرُكب المخدوشة
تلتئم أسرع من القلوب
المنكسرة."

-كلاريس ليسبكتور