حمامتي السمراء

البارت الرابع عشر

زينب

بوجود الناس الي نحبهم ويانا
نكدر نتخطى هواي شغلات
نكدر نطير ويكونون هم اجنحتنا
نكدر نطلب نجمه ويرجعون جايبين وياهم المجره كلها بوجود الناس الصح والسند الصح
لتخاف من شي ابد
تكدر تغمض وتلزم اديهم  وهم يوصلوك للمكان المطلوب.......

عدت الايام مجانت سريعه ولا لطيفه بس بوجود حسام جانت اخف واهون بالاخص چنا شبه متحررين ف جانت بين فتره وفتره تصير هجمات متفرقه وبعيده كلش ....

الاكثر من هيج ماما مجانت موجوده جانت تتعالج ومحجينا وياها ولا مره لان جانت صحتها دتتحسن  وبحجة شبكة ماكو ميخلوها تحجي ويانا حتى تبتعد عن عن كلشي يربطها بالي صار بس بابا جان يطمنا عليها وانه صحتها متحسنه كلش ومبقه شي ويرجعون خلال هاليومين .....بهاي الفتره عرفت شعور الناس الي معدها ام
الناس الي اول متطب للبيت ومتشوف امها
الناس الي تتعب وتبقى بلا اكل وماكو احد يسأل عنها لان ميمها ام
الناس الي تنام ومتكعد على صوت امها الصبح
الناس الي متمدد بحضن امها وتلعب بشعرها
الناس الي من يصير اي شي وياها متلگه حضن تركضله الناس الي متكون موجوده بحياتها كلمة امي

فقد الام وغيابها من اصعب المشاعر وابشعها شكد اتمنى لو كل الامهات يعيشون عمر طويل ١٠٠ سنه واكثر ونموت احنا قبلهم ومنعيش ولا يوم بدونهم الام ستر وغطا الام حنيه وعافيه الام دنيا وجنه الام كلشي حلو بالكون مختصر بحرفين ا م لمن تكون بدون ام تكون مثل الي عايش بالصحراء بلا خيمه وستر بلا حمايه وبلا ملجأ....

جان اليوم المفروض موعد رجوع ماما وبابا كعدنا من الصبح فرحانين ومتحمسين نظفنا وغسلنا ورتبنا وجهزنا كلشي بقه بس يوصلون بالسلامه .....
اجه الغدا وما اجوا والعصر هم ماكو بقينا كاعدين الليل وهم مااجوي ومحصلناهم ولا كدرنا نحجي وياهم القلق والخوف كدروا يسيطرون عليه والف فكرة ببالي رجعتلي الحاله الي تلزمني لمن اكون خايفه وما اكدر اسيطر على افكاري رجعت احجي وي نفسي
- صارلهم شي
- لا راح يجون وميعوفونا
- لو يجون جان جوي من الصبح
- مو الطريق طويل وهم الوضع صعب
- يجوز صار وياهم حادث
- لا لا ممعقوله
- او يجوز على طريق الرجعه طكت عليهم عبوه
- بعيد الشر جان وصلنا الخبر
- يجوز صار هجوم وراحو بي
- اشش اسكتي لا ممعقوله يعوفونا واحنا بعدنا صغار ووبداية الطريق بعدنا مشفنا من الدنيا شي  لا لا بعيد الشر هم زينين بس يجوز مطلعوا اليوم وماكو شبكة ديخابرونا

جنت تعبانه كلش جسدياً وفكرياً لان جنا كاعدين من الصبح ع اساس ننتظرهم يجون ولان رجعت اهلوس واسولف وي نفسي  نمت واني ع القنفه انتظرهم يجون ........

كعدت الصبح على صوت الباب يندك قوي عبالنا هجوم بحيث كل الي بالبيت كعدوا ع الصوت كعد عمي يركض للباب عبالنا صاير شي او احد بي شي الدگه جانت قويه فتح الباب عمي وجانوا بابا وماما ووياهم  بنت عمي جايه من بغداد يعني مو حلم يمعودين اجت ماما ونور بيتنا جنا نضحك ونبجي بنفس الوقت مااعرف شنو اسوي مصدكه ممصدكه ماما مبين على وجها جانت زينه ومتحسنه حالتها جانت تضحك وبابا هم جان على ضحكتها يضحك بس اكو شي جنت احسه غريب ومينوصف جنا فرحانين بس نبجي جربت شعور ياربي خليني ابجي من الفرحه وفعلاً بجيت من الفرح جان شعور مينوصف الله يرزقكم اياه
البيت قبل ليجون جان باهت واضلم مبي حياة ولا الوان احس رجع نور بيتنا وتلونت الحيطان وحتى احنا تلونا بوجودهم
جنا مشتاقيلهم بس هم لان جانوا تعبانين فاتو ناموا واني بقيت احوص مبيه نوم مع العلم نمت متأخره بس جنت فرحانه وطارت نومة عيوني.......