حمامتي السمراء

البارت الرابع والعشرين

حمامتي السمراء ل شفاء ال سالم 💚🕊️

زينب

السنه الي فاتت صارت بيها تغييرات هواي من كل النواحي وتأذيت نفسياً جان مكان ابويه خالي كلش وجان بابا كلش متأذي بغيابه العالم كلها جانت يمها عيد الا احنه جان العزا بيوم العيد ومرت علينا الاعياد كلها فاقده بهجة ومبيها طعم من هذاك اليوم ولليوم اعيادنا صارت ناقصه وكل عيد جان ينقص بيت من بيوت عماتي واعمامي من اللمه من راح ابويه تفرقنا وتفرقت لماتنا .......

مرت الايام وبلشت السنه الدراسيه الجديده جان قسمي رياضيات بس مجان وياي ولا صديقه من ايام الاعدادي كلنا بنفس الجامعه بس الاقسام مختلفه تعرفت على صديقات جدد جانوا يشبهوني بكلشي والاهم جانوا لطيفات صارت النا گروب بالجامعه جنا ٤ بنات و ٦ ولد طلعاتنا سفراتنا اكلنا ونساتنا قرايتنا امتحاناتنا بكلشي جنه سوا واهم شي مثل ايام المدرسه حسام جان ينتظرني اطلع للخط جان يجي ياخذنا من الشارع ف جنت اطلع واحجي وي الي بالخط بس حتى اشوفه ويشوفني اخاف متصير صدفه ونلتقي او ميصير النا مجال ........

عدت المرحله الاولى الي جانت نصها الكتروني اداوم يومين بالاسبوع حضوري وباقي الايام الكتروني نجحت بتقدير جيد جداً جانت سنه سريعه ومحسيت بيها ابد جان حسام ووياي ومتغير بالعكس زاد اهتمامه جنا نخطط حتى نبني حياتنا سوا جنا متفقين ومتفاهمين على كلشي بقت بس تجمعنا الايام ......

بلشت المرحله الثانيه ورجعت شلتنا ورجعت لماتنا وقررنا نبدي السنه الدراسيه بسفره حتى نتحمس ويكون النا واهس بالدراسه ف طلعنا سفره ع الماي اني من نوع كلش احب اجواء الماي ودائماً احب اكعد وحدي حتى لو لدقايق قليله اكعد اتنفس وارتب افكاري واشوف نفسي وين وصلت ف جنت كاعده واجه منتظر وكف فوك راسي

- منتظر : ها شسوين هنا وحدج
- زينب : ماكو والله بس احب اكعد ع الماي وحدي
- ها اسف ازعجتج اخذي راحتج
- لا يمعود اني اصلاً جنت راح اكوم
- تدرين الي يشوفج يحتار بيج
- شون يعني
- يعني ساعه طفله تضحكين وتشاقين وتلعبين وساعه ناضجة تقرين كتب وتسمعين اغاني قديمه وتنصحين وساعه لا هاي ولا هاي تگعدين وتسكتين وبس تسمعينا شنحجي
- هههههه مزاجية للاسف مزاجي يتحكم بيه
- يلوكلج ليش لا عمي كامله والكامل الله
- ههههه تسلم من ذوقك
- عادي احجي وياج بموضوع
- يي عادي شكو
- اني بصراحه معجب بيج كلش واريد اتقدملج ومن المرحله الاولى بس جنت اريد اتاكد من مشاعري ومن اجت العطله صرت اشتاقلج اكثر وجنت اصبر نفسي بصورنا وفيديواتنا الجماعيه وهسه يلا صارت يمي الجرأه حتى اصارحج واحجيلج كلشي بس توافقين اجيب اهلي ونجي نتقدم

- اممممم منتظر اني بصراحه ما اشوفك اكثر من اخ انتوا وكل الي بالكروب وياي اعتبركم اخوتي اكعد واضحك واتشاقه وعندي ميانه وياكم على مود هيج مرتاحتلكم ولا فكرت بيكم بهاي الطريقة
- لا تستعجلين فكري ورديلي جواب
- اممممم ما اعرف شكلك بس ان شاءالله

راح واجت ديما كعدنا حجينا شوي وصاحونا ديجهزون الغدا ف حتى اصور وحده من مواهبي المتعدده جان التصوير المحترف جانت السفره بسيطه كلش وعلى بساطتها جانت تجنن وكلش تونسنا بالسفره وبالاخص المكان جان مفتوح ع الماي بس انتبهت لنظرات منتظر اول مره اشوفه هيج يباوعلي او الاصح مجنت منتبهه عليه قبل لا يعترفلي........

رجعت للبيت جنت تعبانه ونمت بس كعدت العصر جابت الي سرى الجاي وكعدنا نحجي وحجيتلها على منتظر وانه معجب بيه ويريد يتقدملي الباب جان مفتوح واجت ماما

- ماما : منو يريد يتقدملج
- سرى : هههه منو يريد يتقدملها شنو حلمانه ماما
- ماما : سمعت كلش ترى اني مو طرشه
- زينب : يي مدام سمعتي ليش تسأليني
- ماما : اني امكم لتنسون هالشي تعاي احجيلي كلشي

حجيت لماما كلشي بالتفصيل مجنت اريد احجيلها بس لان سمعت كلشي انجبرت احجيلها بدون ما اجذب ولا انقص شي

- ماما : اذا الولد خوش ولد شكو بيها خل يجي
- زينب : ماما ما اريد ازوج هسه
- ماما : ليش متزوجين هسه اذا يخليج تكملين دراسه
- سرى : ماما تدرين بيها تحب حسام ويحبها شنو هالحجي
- ماما : حسام وينه ميجي بيهم خير بس يحجزون وما عدنا وما عدنا
- زينب : يعني العالم هاذ الي منطيهم اياه رب العالمين شيسوون بعدين هم مشاحدين من احد
- ماما : محجينا شي بس اني موافقه على منتظر خلي يجي
- زينب : ماما الشغله مو غصب ترا
- ماما : اخر كلام عندي اما يجي حسام يتقدملج ويخليج تكملين يا اما ينتهي كلشي ويتقدم منتظر
- زينب: ماما بس...
- ماما : ماكو بس انتهى النقاش سمعتيني شحجيت

طلعت ماما وخلتني بموقف ما انحسد عليه هسه شكول لحسام وشون احاجيه وهم شون راح يحاجي امه الي ملت من نفس الموضوع ...... اجه الليل واتصلت بحسام بعد مخلصت المقدمات

- حسام باوع
- روح حسام شنو
- اكو واحد اعترفلي بالجامعه انة يريد يتقدملي واني اصلاً كتله مثل اخويه بس كلي فكري ف جنت احجيلها لسرى انو شون ارد عليه بدون ما اجرحه بالرفض ف ماما سمعت وكالت لو يتقدم حسام لو يتقدم الي اعترفلج
- يبوووو حمدلله هي رادتها اتقدم ليش لا يمعوده باجر الصبح يمكم
- لا شدعوه عاد مو من الصبح بس القصد شون هالمره خاف مثل كل مره
- باعي اني دخلت سلفه وشوكت ما اريد يطلعوها راح اسحبها هالشهر ونلبس حلقات وانطيج المهر مالتج منها وننتظر ع العطله مالتج هم بلكت اجمع بعد وننزوج وان شاءالله امج يحن كلبها علينا وتزوجنا
- ههههه بعد روحي الله يسهلك ويسر امورك ويفتحها بوجك يارب

ارتاحيت كلش لحجي حسام حجينا كومة اتفقنا على كلشي وصلنا ليوم العرس هالمره ختمت المكالمه واني عندي امل انه تمشي الامور بكل سهوله والله ييسر امورنا هالمره وتفض على خير ونفرح ........داومت رديت لمنتظر خبر وكتله خلينا اصدقاء واخوه ما اريد اخسرك بس اني ما اشوفك اكثر من اخ هو ضاج بس متأكدة راح يتقبل الموضوع مع الوقت وراح يلگى بنت الحلال الي تسعده ....

لتنسون تصوتون وتعلقون على كد حبكم للقصة 💚🥺

حساب الانستا والتيكتوك shafa_a96