حمامتي السمراء

البارت الثاني والعشرين

حمامتي السمراء ل شفاء ال سالم 🕊️💚

زينب

اجلت السنه هاي وبديت اضوج من شغلة النظاره الي جانت ملازمتني طول ما اني كاعده ف رحت للدكتور وگلي لازم عملية ليزك حتى اذبها النظاره ويتعدل نظري لازم اروحله نهاية هالاسبوع يعني بعد ٣ ايام بالضبط جنت خايفه ومتوتره لان العين حساسه كلش بس مبينت لاحد لان هم خوفهم علي جان واضح بعيونهم وبتصرفاتهم بس جانوا يحاولون يسندوني .......

قبل العمليه بليل دزلي حسام رساله

- اني برا طلعيلي

طلعت ولكيته واكف بالظلمه لان جانت بعدها مو كلها نايمه مثل كل مره

- ها حياتي شبيك
- جبتلج هاي علبة النوتيلا حتى تاكلين منها باجر بالطريق خاف يهبط سكرج
- امممم كول اريد اشوفج النوتيلا بعدها يمي مخلصتها
- هههه كاشفتني يي والله تحججت بالنوتيلا حتى اشوفج
- ميحتاج تتحجج باي وقت تريد تشوفني گول
- لو بيدي كل اليوم وياج بس ما اريد تصيرلج مشاكل بسببي
- كلشي لعيونك يهون
- يا بعد عيوني ، يلا فوتي ما اريد احد يشوفج بس ردت اكحل عيني بشوفتج
- اممم ما نسيت شي
- شنو ؟!
حضنته وانصدم ورا شوي استوعب ورجع حضني

- هاي بدون متطلب خاف ما اكدر اشوف بعد
- اشششش سكتي دخيل ربج ترى بالكوة لازم نفسي
- هههه لتخاف ما اصير عميه وتتورط بيه
- سكتي بعيد الشر بعدين اني اريدج بكل حالاتج ابد لتحجين هيج

رجعت للبيت وفتحنا اتصال مثل كل مره بقينا نحجي بس مطولنا مثل كل يوم لان جانت يمي كعدة من الفجر حتى نطلع للدكتور بمحافظه ثانيه

- باعي لتنسين علبة النوتيلا كومي خليها هسه بالجنطه الي تاخذيها وياج للدكتور
- تمام
- ولتخافين ولا تفكرين بشي
- تمام
- ومن تروحين قبل العمليه صلي
- تمام
- وتذكري اني وياج وادعيلج وما انساج
- تمام
- وطمنيني عنج و......
- حسام ترا اني مراح اموت راح اسوي عمليه
- زينب ديري بالج تعيدين هالكلمه اموتج والله
- ههههه مو انت متوتر اكثر مني يمعود عمليه بسيطه والله بس اهدأ
-  مو بيدي والله من يوم كلتيلي واني خايف وبس ادعيلج بكل فرض وبكل سجدة منزلت عن لساني الدعاء يارب شافيها ورجعها بالسلامه
- اممممم زين فرضاً انعميت راح تبقى وياي

ف گالي حجاية مستحيل اكدر انساها

- لتحجين هيج مية مره كتلج وثاني شي يولي لو يكلولي هذا اخر يوم بعمرك وراح اتموت وانتي حشاج عميه ومكسرة وبالفراش اختار اكون وياج بهاليوم وبعدها شيصير خل يصير

حجه هيج واني دموعي نزلت بوحدها بس سديت النت علساس فصل رحت غسلت ورجعنا نحجي جيت اسد الاتصال بس مقبل جانت اول مرة يطلب مني يخلي الأتصال مفتوح حد ما اكعد الفجر حتى اصلي واتحضر
نمت اني وبقه الاتصال مفتوح يمنا اجت ماما تكعدني على صلاة الفجر حتى نتريك ونطلع
اجيت اسد الاتصال عبالي نايم