حمامتي السمراء

البارت الثالث عشر

زينب

كعدت من الصبح فرحانه البوم لان البارحه جان يوم عوض عن كل ايام التعب لمن اجه حسام وتطمنت عليه  ولمسته بأديني وجان موجود يمي من بعد غياب شعور ما توصفه كلمات شي حلو كلش اكو شي بصدرك يدغدغك ويخليك طاير ومعلگ لا انت بالسما ولا انت بالگاع هيج حالياً احساسي  سويت ريوگ الي ولأهلي واني ادندن لفيروز
بعلو صوتي انا لحبيبي وحبيبي الي ياعصفوره بيضا لا بقا تسئلي 
- سرى : الله يخلي حبيبج الج اليوم المزاج وردي
- زينب: ههه بس داغني احس نفسي متونسه 
- الله يديمه خيه ويزورنا الفرح
- امين امييين

خلصنا ريوك وكعدنا ننتظر مكالمة بابا بس ما اتصل اجه العصر وبابا بعده ممتصل بينا ولا مطمنا وعمي يكول يجوز بعد مراح للطبيب اجه الليل واتصل بابا وراح عمي للسطح  واسمع عمو يحجي وياااه لا وليش وشون  خلصت المكالمه واجه كال انو امي وابوي راح يبقون  ببغداد  ع الاقل شهر ع بين متخلص ماما علاجها لان يمها التهاب الكبد الفيروسي اثر صدمه صاير بيها وهم يحتاج تبعد عن مكان الحادث  ف راح يبقون هناك لان هنا كل ميصير هجوم او تسمع صوت هاون ترجع تتجدد الحادثه بعقلها ف حتى تنسى شوي الي صار لازم تغير جو وتبعد عن اي شي يذكرها بالحادث فتره مجنت اعرف بالضبط شنو هو التهاب الكبد بس مبين شي مؤذي وخطير  لان راح يبقون كل هالمده هناك وماما اني شفت حالتها بعيوني متطمن ابد يا ربي ترجع النا بالسلامه معدنا غيرها ياربي شافيها وعافيها واحفظها النا يا رب عجيبه هالدنيا اليوم شون جانت بدايته وهسه شون انگلب لازم ميكمل اليوم وانام واني فرحانه استغفر الله

رحت صليت العشا وكعدت ع السجاده كالعاده ملجئي وكت الضيق بديت ادعي ونزلت دموعي بمجرد كعدتي عليها  يارب يمكن اني مصلحجيه  ومااصلي صلاتي بوقتها وماادعي بكل وكت ومرات انسى الفروض بس يارب اني احبك وارتاح يمك واعرف انت اقرب الي من وريدي  وروحي بأيدك يارب اني استودعك امي فأن معك لا تضيع الودائع يارب لتكسرني بيها وانطيها الصحه والعافيه وطول بعمرها ورجعها النا بالسلامه احنا بدونها ما نسوى شي سجدت ومااعرف شكد طولت بالسجده بس احس وگعت همومي كلها بهالسجده توي خلصت صلاة  ورحت امدد بفراشي ودزت سمر عليه عرفته حسام يريد يشوفني لان سمر تجي تبات يمي بس مرحت لان جنت مالي خلك شي وتعبانه مو ذنبه من اجه البارحه تعبان واني مكضيتها نكد وبواجي هو جاي يرتاح واني داازيدها عليه مددت بفراشي انتظر سمر مااعرف شون نمت ومكعدت الا على صوت الهاون ب ٦ الفجر  اخذنا اجراءاتنا المعتاده كعدنا جوا الدرج ننتظر الفرج رموا هالمره ١٠ قذائف هاون وين وكعن مانعرف بس اكيد اكو جرحى وشهداء ياربي مثل كل مره ومثل كل يوم شنشوف احنه العراقيين بعد اكثر من الي شفناه بكل فاجعه وبكل وجع حصة الاسد النا بالحرب والقتل وبالفساد وحتى الفقد بكلشي احنا حصة الاسد النا
عفيه وطن نص مساحته مگبره وطن انخلق للموت مو مال عيشة ع الغدا والعشا شباب والريوگ لازم دم عفيه وطن خلصت شبابك فدوات لهذا ولذاك ......