مابعد هذا الظلام؟

الحلقة 1

الحلقة 1
وتين
عام2018كان عمري 18 كيف سكرتهم
طبعا وتين  كانت متحملة مسؤلية اكبر من عمرها بهلبااا وشافت حاجات زادت كبرتها على عمرها
كنت مقعمزة في الجنان نشبح لمحمد كيف يلعب
حالتنا كانت فوق الريح وحوشنا قصر لكن مش كل شيء فلوس
طلعت سما من الداخل كانت لابسة بلوزة مش طويلة وسروال لاصق وهي جسمها مليان شوي يعني  وتانياته نص رجليها برا وسبيدرو وهداكا الوشاح المحطوط حطان والمكياج والنضارات والمستكة في فمها وتتكلم بدلع: هي ماما اني طالعة بالسيارة قولي لبابا مرات نعطل
سمية : بري سلم بنيتي بوك ميقول شيء
كلكم تو تقولو من محمد هذا وله
محمد كان عمره 7سنين
وتين  لانه هي كانت الي مربياته والشيء الي مخليها لتوا متحملة كل شيء على خاطره كان امانة عندها قعد امانة في رقبتها هي رباته على ايديها وبعمر صغير في وقت انها هي محتاجة ام تربيها توريها تساندها كانت هي الام لولد صغير يعني تعرفو كيف بنت صغيرة تربي ولد صغير وهي في عمر صغير سن مراهقة كان بس هي عاشاته كانها وحدة كبيرة وواعية بدون محد لا يعلمها ولا يوريها خلينا تو نعرفو من هو الولد هذا هذا يكون ولد خالتها كيف وامتى وعلاش هكي صار باش وتين  من بينهم كلهم هي الي رباته نرجعو توا لسنة2013
كان عمري 13 سنة جدي وحناي من امي متوفيين معندهم خوت هي واختها بس  يعني  عيلة امي معنديش حتى واحد الا خالتي بعد متوفت امي يعني بوي كان عادي معاي لعند وين تلاقى معا مرت بوي وانتم تعرفو عاد بوي بعدها عشت في جحيم وامي كانت تبي تطلق بس على خاطري معندهاش وين تقعد بيا بالنسبة ليها هي عادي عندها تقعد وين ميجي لكن اني معاها متبيش خايفة عليا ولاني صغيرة تحملت كل شيء عشاني وقتها راجل خالتي ميبيناش امي معندهاش الا اختها تلجئلها رغم امي هي لكبيرة لكن كانت تبي تمشيلها لكن راجل خالتي ميبيش ايه الناس  هكي مولية قاسية وامي مبتش ادير مشاكل بينها وبين راجلها قعدت وتحملت فم ساكت من عيلة امي عندنا خالة امي بس ومعاش واصلناها  عزوزة كبيرة في العمر اكيدة باحفادها
المهم وقت كان عمري 13 سنة خالتي كان عندها راس وليد الي جاها بعد وين وهي من بلد لبلد ويعاينو باش رب يرزقها بيه كان عندها ولد عمره سنتين راجل خالتي ماكنش عنده جد لا خوت لاخوات وامه وبوه متوفيين ولا عمام ولاخوال مقطوع من شجرة يعني
ايه خلي نبدو نحكو شن صار في 2013 وسبب انه محمد قعد مع وتين
طبعا راجل خالتي كان رافض ابدا اني نجيهم حتى بعد وفاة امي وبعد سمع بالمعاناة الي عايشتها الي ميندري حد بيها الا خالتي وسبب المعاناة الي خلوني نعيشها بس الي خلاها يوافق ان نجيهم وكان يبو يرفعوني للشرطة رغم انهم بلغو اكتر من مرة بس لانه بوي واحد معروف كان يحسباوهم متخلفين وهكي يدوو الزوز  وعندهم مرض نفسي او يبو يديرو هكي على خاطر فلوس كان تفكيرهم هكي مش عارف كيف يحسابو الناس كلها تبي لفلوس زيهم وحتى مشو وعالساس بيشوفو كان في اثار ضرب عليا او حاجة بس ملقو شيء كانت مرت بوي في الحوش ولما خشو بيديرولي كشف طبيعي جدا عطتهم مبلغ وهما سكتو  واني مقدرتش نتكلم كنت صغيرة كنت خايفة المهم يبو يهربوني ويرفعوني للشرطة باش يقبضو على بوي ومرت بوي لانه كان يعنفو فيا بس مقدرتش نهرب في يوم كنت مخططة نهرب رغم صغر سني كنت نفكر وندير واني نكلم في خالتي بالدرقة
وتين وهي تبكي وحاسة بانها فرحانة لانه واخيرا بتطلع من الحوش الحوش هذا كان معيشها الرعب عاشت فيه كل شيء : خالتي هيا وينك نطلعلك
خالتي: هيا نستنو فيك في السيارة ورد بالك من وفجاءة سكتت
وتين : خالتي ردي خالتي
سمية: صار تبي تهربي يابنت الكلبة
وتين ضمت ايديها ورجليها في صدرها وقعمزت في تركينة الدار وتبكي دورة تسمع خالتي تصيح لوطا
خالتي : لااااا بالله خلوه وليدي مدنبه شيء بالله
مراد : صار تبو تهربو مني بنتي ياكلاب ولا بتبلغو علياا  وضحك بصوت عالي ههههه
راجل  خالتي دفل عليه : تفووو على بو زيك مفيشي حتى درة طيبة
مراد ضحك باستهزاء : ضحكتني من امتى تعرفها الطيبة انت من لما جاك ولد
راجل خالتي عرف انه يتكلم لما مباش يخلينا عندهم ونزل راسه لوطا
خالتي : مدامك متحبهاش علاش متخليهاش بدل متفرحه وتعطيهالنا علاش تبيها
طبعا اني كنت نتفرج من الدروج فوق نشبح فيهم ونسمع في هذا كله وكنت شادة حمودي وهو بشبح ويبي ينزل
مراد رد عليها : مش على خاطرها بس لاني شخص معروف فمنبيش نشوه سمعتي باني عاطي بنتي بنتي اني نربيها
خالتي ضحكت: انت شخص مختل مش معروف ومدامك متبيش تشوه سمعتك علاش هكي اديري لبنتك
مراد: لانها وسكت وفكر انه لو مقتلهمش حيحاولو ويحاولو باش يهربو بنته وينكشف وهكي وقاطع تفكيره صوت راجل خالتي
احمد راجل خالتي: انت مش راجل ولا عمرك حتكون راجل طالما انك محافظتش على بنتك بعد وفاة امها منه تتجوز على امها ومن تعيشها هي وامها في حياة متنعاشش مفهمتش كيف قاعد معندكش ضمير للهدرجة هذي بنتك من لحمك ودمك والي توفت مرتك عشرة عمر انت وياها
مراد تعصب من كلامه وهجم عليه ضرب ضرب ضرب
خالتي كانو شادينها وتعيط ولد خالتي محمد عمره سنيتن اني نزلت لوطا وهما مش لاهيين فيا خديته وقعد يعيط قعدت مقعمزة فوق نشبح ف كل شيء من الدروج ومضبطة ولد خالتي ونبكي بعبرتي كنت ضعيفة مش قادرة ندير شيء نشبح فيكل شيء بعيوني بس مش قادرة ندير شيء كنت خايفة على حمودي لو نزلت حنموت اني وياه كنت صغيرة تفكيري مش عارف كيف كان
راجل خالتي مستمر يتكلم وهو يضرب فيه: طالما انت مجرم علاش مقتلتش بنتك وافتكيت منها علاش ادير هكي اعطينى سبب
( حتعرفو السبب في رواية علاش هو هكي يدير وهو يحبها اصلا بس الشيء الي يخليه في نفس الوقت يكرها  ويضربها ومن غير هذا في سبب انه مرت بوها تزيد تعبي في راس بوها لكن في سبب تاني حتعرفوه مزال)
راجل خالتي  وبوي الي حرام فيه حتى كلمة بوي كان متعفلق هلبااا وعصبي للدرجة او نقولو حالته النفسية ناضت عليه وبدي يخنق في راجل خالت وبدون وعيي اني هني خلاص حطيت محمد ونزلت نجري
لارين: بابا لا بابا بالله انت صح  عصبي وتضرب لكن مش لدرجة تولي مجرم خليه يابابا خليه بالله عليك مراد يستاقض لروحه وطلق احمد لكن شني بعد فوات الاوان لانه كان ضاغط باقوه جهده وقعد فترة وطاح راجل خالتي توفى مراد استوعب كبر العملة الي دارها وقدام مرته وبنته او بالاكتر مدورش بنته لانه متقدرش ادير شيء بس الي فكر فيه مرته الي هي خالتي وبدون تفكير وهي تعيط باعلى صوتها يطلع المسدس ويفرغه فيها بدون ميرفله جفن واني الي اول مسمعت صوت الرصاص قعد في ودني الصوت يتردد ونشبح في المنظر والدم الي كان في كل مكان مشيت نجري لخالتي وهما يشدو فيا ونمشي نجري لبوي ونقعد نخبط في رجليه انت مجرم انت علاش درت هكي علاش انت مكانك مش هني انت مش انسان معندكش لقلب ولا شفقة ولا رحمة كنت نقول في الكلام هذا ونبكي نبكي بعبرتي ونتكلم باعلى صوتي وهو دفني برجليه لين جيت طايحة وكلم الحرس متاعه انه يقيمو الجتت ويردموهم ولانهم معندهمش حد مفيش حد بيسال عليهم فمدورش انه حيقولو كيف ماتو وامتى لانه معندهم حد فكلم الحراس بكل برود وكانه شيء عادي  جدا صار وقبل ميطلع
شبحلي وتكلم بتهديد: يطلع منك حرف حي عليك 
اني كنت نبكي  ونتكلم: حرام عليك هكي وربي حرام
مراد بتهديد : جربي افتحي فمك الي صار توا ينتسى في مكانه والا تشوفي شن يصيرلك او مش يصريلك انتي بس وولد خالتك هذا فهمتي
اني: باه خلاص والله منتكلم بالله عليك مديرله شيء خلاص اندير شن تبي ومنيش فاتحاته فمي
اني قمت محمد وركبت لداري نبكي ومرت بوي عادي ولا كانه صارت حاجة
نرجعو للحاضر 2018
... يتبع

وهادي الحلقة 1 من الرواية نشاءالله تنال اعجابكم واعطوني رايكم وتفاعلو