عيال خالد

البارت 20

طلع الصبح

وجلنار مثل كل يوم حطت الفطور للكل وراحت اخذت فطور مسفر له
شافته قاعد بمكانه راحت حطت له الفطور فوق السرير
مسفر ابتسم اول ما شافها وقال؛ صباح الورد
جلنار ابتسمت :صباح النور والسرور
مسفر؛ كيفك عن امس
جلنار ؛ الحمدلله بخير بس احس خايفه عليه
مسفر؛ حقتس تخافي
جلنار جلست فوق السرير :صحيح ما اعرفه كثير وما كبرت عنده بس حسيت بالوجع يوم سمعت بالخبر وكنه لي عشرة معه
مسفر :مهما كانت الظروف الي جمعتكم مع بعض هو ابوك انتي من لحمه ودمه متفهم وجعتس
جلنار :بحط كل الي صار على جنب واليوم بروح ازوره بشوف لو نيار بيجي معي
مسفر؛ تسوين زين
جلنار قامت :انا بمشي تبي شيء
مسفر قام هو بعد : ابيتس ما تزعلين الزعل مو حلو على وجهتس
ابتسمت جلنار؛ ابشر
مسفر :بشروتس بجنته يا رب
جلنار؛ وياك يا رب
مشيت جلنار وعيون مسفر عليها لين اختفت من الانظاروهو يقول بداخله
"لو جمعت ايام عمري من فرح
ما تساوي لحظة من وقتي معك"

لاول مرة بيت ابو فرح هادئ
بدون صراخ وهواش صباح رايق صحيح انه جو الهواش محد كان يحبه بس برضو ذا الهدوء يقتلل
فرح نايمة وسط امها وابوها
صحيت وهي تتاملهم وتتخيل للحظة انها تفقد ابوها الاعمار بيد الله
بس ابو فرح تاكد انه عنده ورم خبيث بحياته
ماله علاج اخر المراحل محد يدري لمتى هو عايش
مثل الي الرجوع لورا يوجع والتقدم يوجع اكثر والوقوف يوجع اكثر واكثر
ايام العذاب انفتحت بوجهه
صحي ابو فرح وهو يشوف فرح متسطحة جنبه وتتامل فيه
ابو فرح بهمس؛ صحيتي ماشاءالله
فرح ابتسمت؛ ايه
ابو فرح يقوم :تعالي نطلع برا لا تصحى امك وتنكد علينا
فرح كتمت ضحكتها وطلعو برا
وقعدو في صالة
ابو فرح فرحان مرة انه فرح رجعت مو بباله ابد الورم الي براسه
اهمشي عنده فرح رجعت
ابو فرح؛ ما تدرين قد ايش فرحان لانك رجعتي
فرح ابتسمت وقربت منه وهي تضمه وتحس بالندم :اشتقتلك يا بابا انا اسفة لاني رحت وزعلتك مني
ابو فرح ابتسم وضمها لصدره:انا ما ازعل منك ازعل من الدنيا ولا ازعل منك
بعدت فرح :تعال اقعد هنا لا تتعب
ابو فرح راح قعد فوق الكنبة
وفرح ناظرت فيه؛ تحس بآلم؟
ابو فرح؛ لا وانتي جنبي مستحيل اتوجع
فرح راحت قعدت جنبه :بابا بقولك شيء
ابو فرح :تفضلي يقلبي
فرح؛ ابغاك تتصالح انت وابوي خالد لمتى بتقعدون كذا ابغى نروح ونجي فبيوت بعض ولا كنه صار شيء
سكت ابو فرح
فرح لف له؛ هاه وشقلت
ابو فرح يبوسها؛ يصير خير يا قلبي
فرح ابتسمت وهي تتمنى ينتهي الخلاف الي بينهم لانها هي كذا بين نارين ما تدرين توقف مع مين وتراضي مين

جلنار تجهز نفسها دخلت عليها جيلان
جيلان رفعت حاجبها وهي تشوفها تتجهز؛ وين رايحة من صباح الله خير
جلنار:عند ابوي
جيلان سكتت للحظات :اهاه
جلنار لفت لها؛ بتجين معي؟
جيلان فكرت شوي وبعدها قالت؛ طيب تمام بجي
جلنار:اجل روحي تجهزي ما ودي نتاخر عشان لين الظهر نرجع
جيلان؛ يالله ثواني بس
نزلت جلنار وشافت امها لابسة العباية
جلنار؛ وين؟
منيرة؛ بجي معكم ولا ما تبيني اجي؟
جلنار ضحكت :لا طبعآ بس استغربت
منيرة؛ يالله نمشي عشان لين الظهر نرجع ونسوي الغدا
جلنار :لحظة بس تنزل جيلان
منيرة؛ طيب
ما مرت دقايق والا نزلت جيلان
وتوجهو لبيت ابو فرح
وبطريقهم راحو لمحل حلويات
جيلان ومنيرة كانو على جنب يختارون وش يشترون
جلنار شافت علبة صغيرة بداخلها حلويات ابتسمت واخذتها راحت حاسبت ولفت لامها وهي تقول :يمه انا بنتظركم برا طيب
منيرة مشغولة مع جيلان يختارون :طيب طيب يمه
طلعت برا المحل وهي تطالع اخر نظرة لو امها ملاحظة عليها او لا
وتوجهت عند دكان مسفر اول ما دخلت شافته معطي ظهره لها وهو يكتب حاجة ومشغول
جلنار انتظرت دقيقة تبغاه يحس عليها انها جت بس هو مشغول لدرجة ما سمعها يوم دخلت
جلنار بقلة صبر :احم احم
مسفر قام على طول وهو يحسب في زبونة جت بس ابتسم ورفع حاجبه يوم شافها؛ جلنارر؟ وش تسوين هنا؟
جلنار مدت له العلبة :كنا في دكان ابو صالح وشفت هاذي وحبيت اجيب لك منه
مسفر ابتسم واخذه من يدها؛ وخمني وشكنت اكتب توي
جلنار ابتسمت : وشهو
مسفر طبق الورقة الي بيده وحطه بالظرف ومده لها :شوفيه لو رجعتي البيت
جلنار اخذته وهي مبتسمة :طيب
وطلعت من المحل مستعجلة لانها عارفة امها خلصت والحين تنتظرها
واول ما وصلت قدام الدكان استلمتها امها
منيرة؛ وين كنتيي خفت علييتس اشلون تطلعي كذا
جلنار تخبي الظرف بعبايتها ولاحظت عليها جيلان :لا رحت اشوف حاجة
منيرة؛ يالله نمشي اجل تأخرنا
جلنار:يالله
توجهو لعمارة ابو فرح الي مو بعيدة كثير