لا أعرف المستحيل

البارت السابع

هذا البارت إهداء لــitsmefdfd

#لا أعرِفُ المُسْتَحِيل # زَهْراء مُهَنَّد
     
إلين ..

مر تقريبًا عشرين يوم ع سالفة تأجيل الخطبة وسفر أيليان إللي هو ليهسة مراجع من سفره وكل شي منعرف عليه ، عمو ليهسة مخبي ع أهلي الموضوع

اني بسفره حسيت هم وانزاح من عندي ، بقيت هاي الأيام ملتهية بدراستي امتحنت شهريات ودرجات زينة وهسة د اراجع حتى اضبط المادة لنصف السنة مبقى غير كم يوم ونمتحن وان شاء الله تمر بسلام وامتحن واخلص قبل لتصير هل الخطبة والتهي وية هذاك

طلعت من افكاري وگمت حضرتلي ملابس وطبيت سبحت ونص ساعة وخلصت نشفت شعري وبدلت

وشعري شسورته وخليتله زيت شعر وعفته مفتوح
شعري ستريت واني اربعة وعشرين ساعة رابطته فاليوم عجبني اخليه مفتوح ومأربطه بقراصة

طلعت من الغرفة بعد مكملت روتيني بعد الدوش ، رحت للمطبخ لگيت ماما تحضر للغدة اليوم عطلة وحـتجينا أختي الچبير هي واطفالها واني طايرة مشتاقتلها كووومة صارلها شگد مجايتنا

_ صباح الخير

_ هلا بنيتي صباح النور

_ اهلاً صباح النور

اجتي مرت اخوية صبحت علينا واحنا ردينا عليها
وبعدها اني ومرت اخوية سوينا النا ريوگ وگعدنا تريگنا تقريباً الساعة 9:25

_ وين اسلام شو مشفته ؟

_ طلع من وقت وراح للمحل

_ بس مو اليوم عطلة عبالي

_ اي صح بس گال جايبين بضاعة ولازم يرتبوها

_ هاا الله يوفقه ويرزقه ان شاء الله

_ تسلمين يعمري الله يخليچ

ردت عَليَّ وبقينا نتبادل الأحاديث احنا وماما  وشوي وسمعت الباب اندگ

_ هاي اكيد مريم حـ اروح افتح الباب

_ لا يمة خلي رقية تفتحه

_ رقية بعدها نايمة اني حـ فتحه

حچيتها ورحت فتحت الباب وچنت متحمسة ففتحته حتى بدون مأگول منو وطلع اسلام مو اختي

_ اني كم مرة گايلچ لا تفتحين الباب دخلي جووة  يلاااا

صاح بية فعفته وبسرعة دخلت مالي خلگ اتعارك وياه واعكر مزاجي

_ اني شمصخم اني شگايلل مو اگلچن صخيمة
ما تفتح الباب ليش فتحتي البااااب ؟؟

دخل للمطبخ وگام يصيح عَليَّ

_ وهسة شصار فتحت الباب وشصار يلا گليي
طار نصي خوما طار نصي

_ بنت الاوادم تسدين حلگچ لا العب فلك فوگاتها تصيح طالعتي بهذا لبسها الشعر مفتوح وفاتحة الباب ع حيله عود تعالوا شوفوني