Melchora (The Modern Filipina Series)

ʚ 03 ɞ

"Kung ang chismis
ay nakamamatay,
malamang tatahimik
ang aming barangay."

──ʚ♡ɞ──

"I'M sexy and I know it~~"

Nagising si Mela sa lakas ng tugtugin mula sa katabing kuwarto. Tumitirik na rin ang sikat ng araw at dahil manipis lang ang puti nitong kurtina, na ngayon ay halos nagkukulay abo na dahil sa kalumaan, ay tumatagos ang sinag rito. Naka-loose shirt siya at maong shorts.

Humihikab itong tumayo at nag-iinat pa habang naglalakad palabas ng kaniyang silid. Sumandal ito sa nakaawang na pintuan na kuwarto ni Sef na ngayon ay gumagawa ng make-up tutorial gamit ang mga binili nitong beauty products mula sa paborito niyang online shop, ang CMA Beauties.

Pinanood niya si Sef na sumasayaw sa tugtugin habang ginagawa ang transition videos niya na talagang feel na feel niya ang bawat pag-indak. "I'm sexy and I know it!!!" Halos pahiyaw nitong pagkanta kasabay ang musika at nagpa-flying kiss pa sa harap ng camera.

Nakahiligan na ng kaniyang kapatid ang paggawa ng make-up tutorial. Nakasuot ito ngayon ng tube dress at ang buhok niya'y naka-elegant bun. Sa kanilang magkakapatid, si Sef talaga ang fashionista. Bukod sa pagkain ay handa niyang ubusin ang pera niya sa mga beauty products.

Napakamot ito sa kanang pisngi ng puwet niya at iiling-iling na iniwan ang kuwarto ng kapatid. Bumaba ito kung saan nagkalat ang ilang mga laruang pambata. Aayusin na sana niya iyon nang pumasok naman si Gabbie na hindi maipinta ang mukha.

"Oh, bakit mukhang Biyernes Santo 'yang mukha mo?" Wala sa ulirat nitong tanong sa bunsong kapatid, dala ang bayong na puno ng mga pinamalengke.

Pumasok ito at lalong lumukot ang mukha. "Eh, kasi... ano, ate..." napakamot pa ito ng batok at napatingin sa labas ng apartment nila.

"Ano?" Nawawalan na ito ng pasensya kaya tinungo niya ang pinto at para siyang binuhusan ng isang timbang yelo sa nakita. Binalingan niya ng tingin ang kapatid na ngayon ay nayayamot na saka ito tuluyang lumabas ng kanilang apartment.

"Ano ba naman, Melchora? Bakit naman napakalayo mula sa labasan ang apartment ninyo? Nahirapan tuloy kaming hanapin 'to!" Bungad ng tiyahin niyang binaon na nila sa limot.

Tita Estelita invited herself in their humble abode. Nakasuot ito ng pulang dress na gawa sa wool cloth, pink wedge sandals, at may kasama pang pamaypay na may floral prints.

Kasunod nito ay ang anak niyang si Bryan na naka-skinny jeans, black adidas shoes na putik-putik, at leather jacket na pinarisan pa ng itim na bandana sa ulo. Feeling action star ito na kumakaway sa mga kapitbahay nina Mela.

"Ni walang aircon!" Puna pa ng tiyahin habang mapanuri nitong pinagmasdan ang bawat sulok ng tahanan nina Mela.

Sementado ang apartment na tinutuluyan nila at may sarili silang bakuran. May kalumaan ang bahay at nasa looban sila ng isang maliit ng subdivision sa bandang Buendía sa Makati. Iyon na ang pinakamurang apartment na nahanap nila dalawang taon na rin ang nakalilipas.

"Oh, ikaw, Gabriella! Hindi ka man lang ba maglalabas ng coke para sa amin?" Utos pa nito bago umupo sa three seater sofa na binalot sa puting tela at halos mapasigaw ito nang lumubog siya sa kinauupuan niya. "Qué horror!!!"