تدمير أجيال

CH.11

بسم الله الرحمن الرحيم
تدمير أجيال
Ch.11

مازن قعد جنب ملاك ومسك ايدها..بدأت تفتح عينيها بالراحة..
مازن ابتسم :حمدلله على السلامه
ملاك ابتسمت :الله يسلمك هو ايه الي حصل بقى علشان انا مش فاكره غير الدكتور الغبي
مازن ضحك:ولا حاجة شيلتك جبتك على هنا دخلوكي العمليات وبعدين جابوكي هنا وماما
ملاك: اهه مستشفى ايه دي الي كنت فيها والله حرام الي بيعملوه في الناس
مازن:لولا اني بس كنت قلقان عليكي كنت وريتهم مقامهم بس هقدم بلاغ عنهم دول كانوا هيموتوكي
ملاك: بلاش مشاكل يا مازن
مازن:هو ايه اللي بلاش مشاكل دول اغبية!
سهيلة:هو ايه اللي حصل؟
مازن :دول كانوا جزارين مش دكاتره
سهيلة ضحكت:انت بتقول ايه
مازن:يا ماما مش بهزر واحد مش عارف ينشف الدم والتاني مش عارف يديها حقنه البنج والثالث خيط لها بدل ٣ غرز ١٣ غرزة
سهيلة:يا نهار اسود! ستر ربنا انها بخير
مازن اتنهد:الحمد لله
ملاك:بابا فين
سهيلة اتوترت:ف..في البيت
ملاك: هخرج امتى انا عايزه اطلع
مازن طبطب عليها:يا حبيبتي محتاجة ترتاحي يومين كده ولا حاجة
ملاك: يومين!!!! مستقبللييي
مازن:ما تتهدي بقى بأم الدح اللي نزل عليكي فجأة ده..انا هكلم مدرسينك يعيدولك اللي هيفوتك
ملاك: حبيبي ياخويا
مازن طلع موبايله واتصل على مصطفى:... الو جبتوا اكل؟.. تمام انتبه لاخواتك الصغيرين
ملاك:وحشوني اوي سلملي عليهم
مازن هز راسه بحاضر :متنامش يلا.... اتصرف متنامش وخلاص
سهيلة:جعانة يا حبيبتي؟
ملاك:اوي اوي
سهيلة:مازن معلش ممكن تروح تجيبلها اكل
مازن:حاضر اجيبلك ايه
سهيلة:لا يا حبيبي مش عايزك جيب لنفسك حاجة
مازن: ايه اصله ده هتاكلي  يا ماما اجيب ايه
سهيلة:انا كلت في البيت ما انت عارفني مليش في اكل بره
مازن: اممم طيب وانت يا ست هانم؟
ملاك:ساندوتش شاورما بالبطاطس
مازن: شاورما! حاضر يختي حاضر
ملاك:حبيبي يا ميزو قارفاك انا عارفة
مازن: وتقرفي مين غيري يعني باس اديها انا رايح
ملاك ضحكت له:ماشي
مصطفى نازل من العربية لقى الموبايل بيرن
مازن رد:ايوه يا نور
نور:مازن طمني ايه اللي حصل
مازن:مفيش بخير كل حاجه تمام
نور:طب مجيتش النهاردة ليه
مازن:مشاكل عائلية كده خدتوا حاجات كتير؟
نور:لا مش اوي هبقى اصور لك كل الحاجات
مازن:كتر خيرك والله يا نور تعبتك
نور: لا تعب ولا حاجه احنا صحاب
مازن ابتسم:طيب يا ستي استأذنك بقى عشان بشتري حاجات
نور:ماشي يا عم..سلام "قفلت"
مازن بص حواليه شوية بعدين ابتسم بانشكاح..
-
عدى يومين ملاك خرجت من المستشفى ورجعت تروح المدرسة..سمير مستمر في العلاج لكن مش حاسس بتغيير
-
في الجامعة عند مازن تحديداً وقت محاضرة ال organic chemistry..
مازن قاعد في المحاضرة بيبص حواليه بملل..نور همستله:الدكتور ده مفيش ارزل منه شرحه ممل يالهوي
مازن:مين سمعك انا هنام من الملل
- البيه اللي بيرغي ورا
مازن:انا؟
- لا امي اللي بترغي الورا..قوم أقف "مازن وقف" انا كنت بقول ايه؟
مازن:حضرتك كنت بتتكلم عن ال polymer "بدأ يقول اللي قاله"
الدكتور ضحك بجنب واحد:هتفلح انت كده؟
مازن:مفلحش ليه؟
الدكتور: انت بترد عليا!! اطلع برا
مازن: انا عملت ايه علشان تقولي اطلع برا؟ سالتني كنت بقول ايه وجاوبتك اطلع برا ليه؟؟؟
الدكتور:قولت اطلع برا
مازن كور ايده وضغط عليها محاولة يكتم عصبيته واللي نور لاحظتها..ابتسم للدكتور ببرود وقال:حاضر هخرج بره "طلع من المدرج واتجه ناحية الباب"
- ابقى قابلني لو نجحت معايا!
مازن طلع وقفل الباب وراه ونفخ  راح قعد في مكان فاضي وغمض عينه في محاولة انه يهدي اعصابه اللي تعبت بسبب الأحداث الأخيرة في حياته ومكنش ناقص غير أن دكتور يستقصده
بعد حوالي ربع ساعة نور خرجت وهي بتدور عليه..قعدت جنبه وقالت:ولا يهمك ده دكتور فاشل اصلا وانت بمجهودك هتنجح فيا..وبتشجيعي ليك
حاول يبتسم:شكرا يا نور
نور: العفو متقولش كده مبيناش شكر مش كده ولا ايه وابتسمت ومسكت ايده
مازن اتوتر شويه: اكيد
قربت منه:مازن انت لازم ترتاح معايا شوية وتفك في الكلام كده..احنا المفروض صحاب والصحاب دايما بيكونوا مرتاحين مع بعض ولا ايه؟
مازن ضحك:والله مفيش غيرك اللي بدأت ارتاحله
نور ابتسمت له بهدوء
-
عند ماسة
دخلت الأستاذة وحطت الأوراق على المكتب وبصت لهم بنظرات حاده
-النهاردة اختبار الرياضيات اللي اتفقنا عليه من اسبوع وهو اللي هيحدد اذا هتنجحوا معايا ولا هسقطكم كلكم!!! حركه كده حركة كده متعجبنيش هطردك واقطع ورقتك اتفقنا؟
كلهم:تمام يا ميس
بعد مرور ساعة الا ربع..
ماسة قفلت الورقة بتاعتها وبصت قصادها..تسنيم همستلها:ماسة الحقيني
ماسة بصتلها
تسنيم:انا مش عارفة احل حاجة ساعديني
ماسة اتوترت وفضلت تبص حواليها وقربت لها الورقه وفتحتها على اساس انها بتراجع
تسنيم ابتمست وقعدت تكتب من ماسة
ريتال همست لماسة:متقفليش دلوقتي انا كمان بنقل
ماسة بصت فوق بتوتر ورجعت بصت في الورق تاني..فتحت القلم وعملت نفسها بتكتب اول ما المراقبة بصت عليها
ماسة كانت قاعده طول الوقت متوتره وخايفه وحاسه بتأنيب الضمير بسببهم دول تقريبا اخدوا الاختبار كله !
اول ما خلص الاختبار وسلموا الورق ماسة ما صدقت وكأنهم زاحوا صخره من على صدرها اتنفست براحه وبصت لهم
بصوا لبعض وضحكوا وخرجوا بره الفصل..ماسة لمت حاجاتها وقعدت دقايق وطلعت بره الفصل..لقت معظم اللي واقفين بيبصوا عليها وبيضحكوا..بصت ناحية تسنيم وريتال اللي كانوا بيوشوشوا اتنين كمان..بصوا للباقي وغمزوا لهم..قالوا كلهم في نفس الوقت:ماسة غشاااشة ماسة غشاااشة
احنا عرفنا انك كنتي بتغششي في الامتحان من ورا المراقبة
وانك بتمثلي علينا دور البريئة يا كداااابة *بصوت البت بتاعت زيزي*
ماسة فضلت باصه عليهم ومش عارفه تعمل حاجه ولا حتى حد منهم بيسمعها خدت حاجات وجريت بسرعه لأبعد مكان عنهم قعدت وحطت اديها على ودنها وفضلت تعيط
تسنيم راحت عندها وهي بتضحك..شدت ايدها جامد وقالت:ايه يا غشاشة خايفة يا حبيبتي؟
ماسة زعقت فيها:ابعدي عني بقى! انتِ عملتي فيا كده ليه..انتِ كنتي أقرب حد ليا!
تسنيم ضحكت بسخرية:هه بتقولي ايه أقرب حد؟ انت غبيه؟؟مش ملاحظه اننا بنستغلك؟؟!
ماسة بصت عليها وعينها دمعت وافتكرت كلام ملاك ليها
ماسة عيطت اكتر وقالت:ليه! اشمعنا انا! انا كنت كويسة جدا معايا تستغليني "زقتها" تستغلي طيبتي! بس الحق مش عليكي..الحق عليا انا عشان انا اللي صدقت واحدة معندهاش ذوق ولا اخلاق زيك!
خدت حاجاتها وطلعت قعدت عند سلالم باب الخروج..حطت راسها على ركبتها وعيطت اكتر
عند ملاك حضرت يومها الدراسي عادي جدا واكيد مع بعض الوجع من رجليها واكيد واجبات بتمطر عليها واختبارات طول الاسبوع
مصطفى يومه مشي مع رنيم صاحبته الجديدة واللي بتساعده يتأقلم في المدرسة بعد اللي حصل..
--
عند سمير
سهيلة سندته عشان يقوم من على الكرسي بعد جلسة الكيماوي..بصت للدكتور وقالت:في امل يا دكتور مش كده؟
الدكتور: اكيد لازم يكون عندكم امل احنا بنعمل اللي علينا والباقي على ربنا ....
سهيلة بصت له وهزت راسها وحطتها على كتف سمير وكانها بتستمد قوتها منه
--
مازن عدى على ملاك ومصطفى واخدهم..وصل عند مدرسة ماسة اللي لقاها قاعدة على الرصيف اللي أدام بوابة المدرسة وبتعيط..عقد حواجبه باستغراب وكلكس..مسحت دموعها وقامت ركبت العربية وهي ساكتة بتعيط من غير صوت
مازن:مالك يا ماسة؟
ماسة بصوت عياط مكتوم:مش عايزة اتكلم معلش
مازن:نعم يختي؟ مش عايزه ايه انت هتعملي لي فيها مالك؟؟حد عملك حاجه في ام الزفته دي؟لا مهو متجننونيش!!!
ملاك: مازن امسك أعصابك هفضل اقولك كده كل مره!!
مصطفى بص لماسة اللي حاطه راسها في حضنه وبتعيط : مازن!!بعدين مش وقته
مازن مسح على شعره وخبط بايده على الدركسيون بعصبية خد نفس وطلعه:ماشي لينا كلام في البيت
رجعوا البيت اول ما دخلوا كل واحد راح اوضته بصمت ملاك كانت بتغير وبصت لماسة اللي رمت نفسها في السرير من غير ما تغير حتى هدوم المدرسة ملاك راحت قعدت جنبها وحطت اديها على راسها :ماسة..
ماسة: سيبيني في حالي مش عايزه اتكلم!!
ملاك بصت لها واتنهدت وقامت
شويه وسمعت خبط على الباب
ملاك:ادخل
مصطفى دخل : ماسة
ماسة مرفعتش راسها
مصطفى بص لملاك وشاور لها بمعنى تطلع برا
ملاك اتنهدت بحزن وطلعت
مصطفى قعد جنبها:ايه يا ست البنات مالك
ماسة:مش قادرة اتكلم يا مصطفى لو سمحت سيبني لوحدي
مصطفى:طب تيجي ناكل حاجة؟
ماسة:مليش نفس انا عايزة انام
مصطفى: طب والله ما هاكل الا وانت واكله معايا وانا اساسا مش باكل كتير ف متخلينيش اكل علشان اموت يرضيكي اموت جعان؟ بعدين هو في احلى من الاكل يا ماسة يا بت يا بت قومي ندور كده ولا كده يمكن نلاقي إحدى الكنوز اللي ماما بتخبيها مننا وممكن نخلي مازن يجيب لنا ايس كريم أو حتى اكل من برا ايه رايك

مازن وملاك كانوا واقفين بيسمعوا الكلام من برا الاوضه

مازن بصوت واطي:لبسني ماشي

ملاك:ششش مش عارفة اسمع

ماسة عدلت قعدتها:مصطفى الله يخليك لو انت فعلا عايز تساعدني سيبني لوحدي انا تعبانة ومش طايقة اتكلم عشان لو اتكلمت هتعاتبوني وتضايقوني اكتر وانا والله ما ناقصة

مصطفى بص لها طب قولي لي ومش هعاتبك وعد مني ومش هخلي مازن يزعق معاكي كمان ولا ملاك ويعني بدام قلتي كده تبقي عارفه انك غلطانه في حاجه... فقولي لي عملتي ايه ومش هعاتبك

ماسة مسحت دموعها وبصتله بتردد:فاكر صحابي اللي قولتلك بيطلبوا مساعدتي كتير؟

مصطفى:الزنانين اه فاكرهم

بصت في الأرض دقايق بعدين بصتله..بدأت تحكيله اللي حصل ودموعها بتزيد
مازن كان سامع بره مسك اكرة الباب بعصبية لكن ملاك لحقته ومسكت ايده بعدته عن الباب
مصطفى خدها في حضنه وقعد يطبطب عليها : انا مش هعاتبك لأنك عارفه غلطك يا ماسة صح؟
ماسة هزت راسها في حضنه وزادت في عياطها
مصطفى....
يتبع...ادعوا لنا نخلص اختبارات على خير🥺❤️❤️