|أسطورة نوميديا|
الفصل السادس: هل هذه النهاية؟
[ الجزء 46 ]
جالس فالزنزانة مع كتر من 10 تاع الناس، تيطل من الشرجم ، دازت على آخر محاكمة ليه كتر من 4 أشهر.
باقي تيتفكر كل صباح علاش هو هنا، والكلاخ تاعو فين سيفطو.
جلس حداه راجل كبير.
الراجل: مرحبا بيك أولدي معانا ، نهار كبير هادا يجيو عندنا سجناء جداد، من شحال هادا ماجابولينا الجديد.
ماسين دار عند ببطئ: عمي عمر، واش تخلطوليك القنوات عاوتاني؟
عمر شاف فيه بعلامة استفهام: مالك حشمان، قوليا غير أش سميتك؟
ماسين شد ليه يدو وبدا تيضرب فوقها وتيهضر مفقوصة: 3 تاع العشية هادي وسولتيني غير اليوم كتر من 10 تاع المرات، سميتي ماسين أعمي، ماسين كحل اليام لي يطيح فزنزانة من غير الزنزانات فيها مريض بالزهايمر.
عمر: متشرفين، شكون مريض، نتا؟ نعيطليك الطبيب؟
ماسين رجع شاف من الشرجم: أنا لي مريض، أناا.
عمر: فيناهيا فتيحة تجيبليك الطبيب؟
ماسين: أشمن فتيحة أعمي، راك فالحبس .
عمر: أااه، راني عاقل عاقل، أجي بعدا علاش دخلتي (شد فوجه ماسين) وجهك ماشي تالحبس.
ماسين: كون عرفتك أنكون فالحبس گاعما ندير لي درت والله، الفقصة لي خلات ليا نوميديا بالخنجر تاعها كملها ليا نتا مع الزهايمر تاعك.
عمر متسوقش ليه ودار تيشوف فالمحابيس كل واحد وفين مليوح، وهو يغوت: أهياوينا، إمتا غيجيبولينا البنات، (ماسين دار شاف فيه لقاه تيحل فسروالو باغي ينزلو ، وهو يجمع ليه يديه) راني باغي ،طلق مني ، راه أنا لول ، من الصباح وانا تنتسنى.
ماسين طلق ليه يديه وبعد منو قبل مايشوف شي حاجة ماشي هي هاديك.
ماسين: والايني مصيبة كحلة غرقت فيها راسي.
هضر معاه شاب فنفس سنو من السرير لي فوقو: فخبارك تنكون ناعس تنتفكر علاش دخلتي للحبس وتنوض نضحك حتا نشبع ونرجع نعس. عام تالحبس ، وخسرتي خدمتك وخسرتي سمعتك بسباب زبلة تگيدتي فيها، والله مزوينة لتعاويدة.
ماسين: دبا واش عاودتليك باش تواسيني ولا ضحك عليا.
الشاب تيضحك: دبا واش هادشي فيه ميتواسى، أنا سيمو ولد الحاجة مليكة، عشت فالحبس كتر من دارنا، وعمري دخلت للحبس و حسيت بالشمتة هاكا ، خايبة .
ماسين: إوا منلومهاش، نلوم راسي لي تبعتها كي الحمار.
سيمو: ياك كنتي بوليسي زعما، معاودتيش ليهوم عليها يقلبو عليها، راه الانتحال تاهوا عليه الحبس.
ماسين: تنقوليك السيدة معندهاش حتا البصمات، لا سمية لا وراق، باش بغيت نعرفها أنا، وزايدون نتا لي يلاه عرفتك وشبعتي فيا ضحك هوما لي تنعرفهوم من زمان ومحاملينيش راه غادي يكتبو قصتي فالحيط ولي داز يقراها ويضحك عليا.
سيمو يلاه بغا يهضر وهوما ينوضو طلو تيباليهوم عمر تيخبط فالباب : وااا حلو عليا نمشي لداري راه فتيحة تتسناني، قالتليا منتعطلش.
ماسين: واش هوما متأكدين هادا خاص يبقى معانا، واقيلة خاصو سبيطار الحماق.
سيمو: واخا يبان ليك هاكا، راه فاش تيرجعو ليه السلوكة بلاصتهوم، راه تيولي قاطعها فكولشي.
ماسين خسر وجهو : هاد ساعة قاطعها غير فيا، وليت نخاف نشوفيه نلقاه داير شي فضيحة نولي نبغي نغسل عقلي باش نساها.
أنت تقرأ
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
