أسطورة نوميديا🗡️مكتملة🗡️

🗡️الجزء 16🗡️

|أسطورة نوميديا|
الفصل الثاني : كن حذرا!
[ الجزء 16 ]

كانو قدامو تصاور الجثة ، وحتا المعلومات تاع التشريح، ومعلومات على الأداة باش تقت_لات ومقاساتها، هنا جبد المعلومات لي على الخنجر.
والمفاجأة كانت أن المقاسات متطابقة، وتأكد بلي أداة الجريمة هي فعلا "الخنجر".

ولي تأكد منو كتر أن نوميديا حقيقية،  وماشي حمقة بحال لي كان تيقول.
وهنا قال بلي مبقاش باغي يجيب الخنجر على قبلها ، ولا باغي الخنجر على قبلو.

تكا لور تيفكر وتيتخايل راسو  لقا الحل لهاد القضية لي حيراتهوم  سنين، وزادت شهرتو توسعات ، وترقى وتزاد فالصالير تاعو ، ابتاسم بفرح وهو تيتخايل هادشي طرا.

رجع شاف فالوراق وبدا تيقلب فالقضية تاع 2018 وتفكر الشاهد لي كان حلها: نتا نتا لي غادي تحل ليا هاد القضية.
قلب على العنوان تاع الشيفور وسط المعلومات لي كان عطاهوم ديك الساعة.

فرك يديه مع بعضهوم بعدما شاف بلي الطريق للحقيقة ولات قريبة عندو ، بدا تيحسب فراسو شحال غيتزاد فخلصتو، وكيفاش حياتو غادي تبدل.
حتا قاطعو صوتها من وراه ، دار عندها بزربة مخلوع.

ماسين شاد فقلبو: ياك لاباس!

نوميديا قربات وشافت فالوراق لي قدامو وصورة تاع الخنجر فالبيسي: فين وصلتي، شكون هادا لي قلتي غيحل القضية.

ماسين بمكر: فكرت شوية ، وقلت مع راسي بنت زوينة بحالك مكاينش لاش توسخ يدها فالدم،  داكشي باش غدا غنمشيو عند الشاهد الوحيد على الجريمة وغادي نتبتو بلي الخنجر هو الأداة وبلي القا_تل هو رمزي، رمزي غيتشد فالحبس ونتي أترجعي منين جيتي حيت انتاقمتي.

نوميديا غوبشات: متنذكرش بلي قلت باغا نحبسو، أنا باغا نقت_لو، خاصو يموت بالخنجر.

ماسين شاف فيها حتا مشات وهي معصبة رجع للبيسي كيقلب فالقضية.

دازو ساعات قليلة ووصلات الخمسة، تاع الصباح.
باقا السما كحلة، والصمت مكانش غير فالدار بل بالحي كامل.

وقفات عليه دايرة القب تاعها تتبان بحال شي شفار، كتقيسو بالستيلو وتتعيط عليه: كنآمرك تنوض .

ماسين حل عينيه  دايخ ،دور عينيه لقى راسو نعس فالبيرو ، شاف فيها تتعاود نفس الجملة " كنآمرك تنوض": أ نيفرتيتي، أ لخرا، واش تتعرفي الساعة ولالا؟ بايتة تتحلمي بيا؟

نوميديا: خاصنا نمشيو عند الشاهد لي قلتي.

ماسين شاف فالسقف بوجهو منفوخ وعنقو عوج: يا ربي إلا كان هادا هو حمار ليل غير غبرو عليا ، غنولي إنسان صالح،(دار شاف فيها) فين بغيتي تمشي ، واش أنا يلاه ساعتين باش غمضت عيني ، تنوضيني نتيا ، راني موقووووف بغيت نشبع غير نعاس،أش هاد البلا يا ربي، وزايدون الخمسة هادي ، سكان الأرض كاملين ناعسين ، ( سكت تيفكر، وتفكر بلي هضرتو ماشي صحيحة) ماشي كولهوم ولكن هنا كولشي ناعس.

نوميديا خارجة من بيتو بلا متسوق لكلامو : يلاه.

ماسين ناض تيخبط رجليه وتيسب، لبسات سبرديلة خداها ليها وخلات السيور محلولين وهزات جاكيط تاعو لبساتها فوق سورفيت . وجلسات تتسناه.
ماسين لبس فوق سورفيتومونطو و لبس سبرديلة وخرج عندها تيتفوه.

نوميديا شيرات ليه: نتا أ الخادم ، جمع ليا هاد الخيوط.

ماسين دوز يديه على وجهو تيصرط الفقصة ونزل تيجمع ليها السيور بلا ميهضر، ماعارفش أش مصبرو باش يقت_لها ،ولكن صابر.

خرجو بجوج وركبو الطوموبيل، وتوجهو لفين كاين  منزل الشاهد.