|أسطورة نوميديا|
الفصل الثاني : كن حذرا!
[ الجزء 19 ]
دازو أيام قليلة، دوزوها بجوج غير فالدار، نوميديا تتحاول تتأقلم مع هضرة ماسين باش تفهم رمزي ملي يهضر معاها، وماسين تيعلمها كيفاش تهضر وكيفاش تلفت انتباهو بحكم هو عندو نظرة سابقة على رمزي.
وفنفس الوقت كانو تيحققو فالجريمة، وتيقلبو على دليل ملموس لي يخليهوم يطيحو رمزي فالشبكة.
ماسين تكا على الكرسي : أووف، الخنجر هو الحل باش يدخل رمزي للحبس.
نوميديا بلا متشوف فيه: متنذكرش بلي وافقت على هاد الصفقة تاع تبلغ بيه، وذكرت بصريح العبارة بلي أنا باغا نق_تلو.
ماسين شد راسو: واخا ،قتليه أنا مغنمنعكش غير قبل خلينا نتأكدو من الخنجر، بما أنه هو أداة الجريمة فراه غيكونو عليه البصمات ولا الأثر تاع الدم، داكشي باش خلينا نتأكدو بلي هو القا_تل وديك الساعة ضبري راسك معاه.
نوميديا سكتات مقتانعة بهضرتو، ولكن سكاتها مادامش بزاف.
نوميديا: خاصني ما نلبس فاللقاء.
ماسين خسر وجهو : واقلة كنت قلت بلي وقفو ليا الصالير، ماشي زادوني فالصالير.
نوميديا: ماشي مشكلتي هاديك، أنا تنعطيك الذهب، بمعنى ملي نتفارقو تقدر تبيعو وتدخل ثروة بيه، وتولي من أغنياء هاد المدينة.
ماسين سكت كيفكر عاوتاني، الحاجة الوحيدة لي تتستحق التفكير فحياتو هي الفلوس.
دور وجهو بعدما بان عليه الاقتناع حتا هو.
ماسين: مبدئيا أنا جبت ليك كسوة تقدري تلبسيها، تنظن مناسبة للقاء بحال هادا، ومكاينش لاش نضسع عليك الفلوس، حيت الذهب لي تتعطيني راه مقابل لخدمتي المتقونة لي تندير معاك.
نوميديا شافت فيه شوفة مبهمة وناضت للبيت.
حتى جا اليوم لي وجدوليه بزاف، كان ماسين واقف بكوستيم بقاميجة محلولة من العنق، لابس معاه صباط تيلمع، مكانتش فكرتو يبان رسمي فاللقاء ولكن كانت فكرة تاع نوميديا لي كانت مصرة أنهم يبانو ضيوف مميزين ويخليوه يكبربيهوم، تيتمشى فالمراح تيتسناها تخرج.
ماسين: واش حتا شحال هادا كنتو تتعطلو باش توجدو؟
حلات نوميديا الباب وخرجات من البيت، لابسة كسوة شيبية، بكمام طويلة، تحت ركبة بسنتمترات، ولابسة معاها صباط بكعب متوسط شراه ليها وأصر أنها تلبسو، وطالقة شعرها البني.
شافت فيه مغوبشة، ممرتاحاش فالكسوة ، طبعا هي محاربة ، مكانتش تتلبس الكساوي والطالون.
قرب ليها ماسين مبتاسم: نتوما البنات فعلا تتخلعو، ميمكنش البنت لي تتلبس السورفيت والصبرديلة هي لي تتلبس الكسوة والطالون .
نوميديا قربات لوجهو مخنزرة: ياكما تتحاول تغزل بيا؟
ماسين رجع لور كيدوز يدو على رقبتو: لا أبدا.
نوميديا هزات راسها بثقة وتمشات للباب: الخادم متيتسناش سيادو يلبسو يخرجو، الخادم تينزل يوجد المركوب باش ميخليش سيادو يتسناو.
ماسين: زيدي نزلي قدامي ونتي تيقتي الدور.
نوميديا دارت عندو تتشوف فيه بتحدي.
ماسين استسلم دغيا، تيعترف بلي عينيها كيخليوه يستسلم لأي حاجة واخا يكون رافضها.
نزل وهي تبعاتو بخطى بطيئة، كتحاول تخلي راسها طبيعية بالطالون ومتديرش شي فضيحة.
أنت تقرأ
أسطورة نوميديا🗡️مكتملة🗡️
Fantasía💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
