|أسطورة نوميديا|
الفصل الثاني : كن حذرا!
[ الجزء 20 ]
شدو الطريق للمتحف، وطول الطريق ماسين تيفكرها فأشنو خاص يديرو فهاد الزيارة
وقف الطوموبيل فالباركينغ تاع المتحف.
نزل ماسين ونزلات حتا نوميديا وتمشاو بجوج بثقة.
بجوجهو ناس تايقين فريوسهوم واخا يكون السبب مختالف فراه ميمكنش نكرو هادشي.
مشا ماسين قاصد واحد من الگارد كور لي كاينين فالباب ، وقاليه بلي باغي يتلاقى رمزي.
والگارد علم الكبير تاعهوم لي دخل قالها ل رمزي.
الگارد: سيدي واحد سميتو ماسين الغازي تيطلب يشوفك.
رمزي لداخل كان كيشوف شي ملفات حتا سمع أش قال.
رمزي باهتمام : لاش جاي هادا عاوتاني ياكما تيتسحابليه بلي عطيتو الفلوس ديك المرة ، غادي يجي يطلبهوم كل مرة.
رجع الزمن برمزي لأكتوبر 2018:
كان جالس وقدامو ماسين، واسترجع جزء من محادثتو معاه.
رمزي:أنا إنسان مزيان ولكن منسمحش لشي واحد يشوه سمعتو خصوصا ملي قربو الإنتخابات.
ماسين: حتا أنا تندير خدمتي وبما أنه كاين الدخان إدن راه كانت العافية، داكشي باش خاص ندير التحقيق.
رمزي: ويلا عطيتك الفلوس باش تسد القضية! ميمكنش توسخ سميتي فقضية بحال هادي وضيع ليا وقتي باش منبعد يبان القاتل هو شخص آخر.
ماسين سكت تيشوف فيه.
رمزي كمل كلامو: شحال خاصك للعملية تالواليدة تاعك؟
هز ماسين راسو بسرعة، مكانش سؤال بريئ، كان مبطن بتهديد خفيف، مفادو أنني عارف عليك كولشي، ومتحاولش تلعب معايا .
دار رمزي لي كان تيتمشى فالمكتب بأريحية:10 ولا 20.
هز الدفتر تاع الشيكات وكتب الرقم لي بغا ومدو ل ماسين.
رمزي:، صرف الشيك وخود الفلوس،ونتمنى الواليدة تاع تبرا، والقضية تسد، والأهم وجهك منشوفوش.
ماسين وقف شاف فالشيك ورجع شاف فرمزي وخرج بلا كلمة.
وفعلا أيام قليلة تسدات القضية وتقدم اعتذار ليه لأنهم شكو فيه.
في الحاضر:
شاف رمزي فالگارد كور وقاليه: دخلو عندي.
ثواني وتحل الباب.
دخل ماسين ودار الطريق لنوميديا باش دخل حتا هي.
رمزي شاف فيهوم ووقف: متوقعتش نشوفك ورا هاد السنين.
ماسين ابتاسم ليه: والا أنا كنت متوقعها ، والا كنت باغي نتوقع، ولكن الظروف.
رمزي: تفضلوا.
جلس ماسين ونوميديا تيشوفو فبعضهوم.
رمزي شاف فماسين و مد يدو لنوميديا: ما شرفتيناش بلآنسة.
ماسين شاف فيها وشافت فيه بصدمة، فكروا فكولشي ،إلا الإسم.
ماسين حاول يتغلب على الموقف: أه هاد الآنسة ، نورة، أستاذة نورة، أستاذة جامعية فكلية التاريخ، جبتها حيت ناوية تجيب الطلاب تاعها للمتحف ، وبغات تاخذ فكرة عليه هي لولة، داكشي باش جبتها لعندك تقدمليها شي جولة تعرفها على المآثر لي عندك ، وتاخذ عليهوم فكرة.
رمزي شاف فيه بسخرية : ياكما تقاعدتي أ سي ماسين ووليت خدام فهادشي تتوري للناس الأماكن وداكشي تاع لي گيد؟
ماسين ضحك ببطء فوجه رمزي، بحالا تيقوليه بايخة عندك هاد النكتة: لا أستاذة نورة صديقة قديمة، طلبات المساعدة ولبيت، كنآمن بلي المعارف القدام تاعي خاص يلقاوني وقتما حتاجوني، منغدرهوم ونخوي بيهوم.
أنت تقرأ
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
